VYAKA vinandi vati vajumpha, ŵana aku Nowa angubala ŵana anandi. Ndipu azuku aku Nowa nawuso angubala ŵana. Ndipu ŵanthu angwandana liŵi pacharu chapasi.

Yumoza wa ŵanthu yaŵa wenga Nimirode mzuku chivu waku Nowa. Iyu wenga munthu muheni ukongwa, chifukwa wabayanga nyama ndi ŵanthu viyo. Nimirode wangujipanga yija kuja fumu kuti wawusengi ŵanthu. Kweni Chiuta wangukondwa nayu cha Nimirode.

Panyengu iyi, ŵanthu wosi akambanga chineneru chimoza. Nimirode wakhumbanga kuti ŵanthu wosi ŵaje pamoza ndipu iyu waŵawusengi. Kumbi uziŵa vo wanguchita? Wangukambiya ŵanthu kuti azengi msumba ndipuso chinyumba chitali. Awona pachithuthuzi yapa, yiwu awumba ncherwa.

Yehova Chiuta wangukondwa cha ndi kuzengeka kwa chinyumba ichi. Khumbu laki lenga lakuti ŵanthu wosi angajanga pamoza pe cha, kweni kuti azazi charu chosi. Kweni ŵanthu anguti: ‘Tiyeni tizengi msumba ndipuso chinyumba chitali chifiki ku mtambu, ndipu titchukengi.’ Ŵanthu yaŵa akhumbanga cha kutumbika Chiuta, yiwu akhumbanga kujitumbika.

Mwaviyo, Chiuta wanguŵachitiska kuti aleki kuzenga chinyumba ichi. Kumbi Chiuta wanguchita wuli? Mwamabuchibuchi, iyu wanguŵatimbanyiza ŵanthu wo, m’malu mwakuti alongorongi chineneru chimoza angwamba kulongoro vineneru vakupambanapambana. Ndipu ŵanthu wo azenganga angutimbanyizika, weyosi wavwanga cha vo munyaki wakambanga. Ndichu chifukwa chaki msumba wawu ungudanika kuti Babele, pamwenga kuti Babeloni, kung’anamuwa “Chitimbanyizi.”

Sonu ŵanthu wo, angwamba kutuwaku ku Babele. Wo alongoronga chineneru chimoza anguluta kuchija limoza kuchigaŵa chinyaki cha charu.