SOLOMONI wanguja fumu weche mnyamata. Iyu wayanjanga Yehova ndipu wavwiyanga malangu ngamampha ngo awiski a Davidi amupaskanga. Yehova wangukondwa nayu Solomoni ndipu zuŵa linyaki usiku wangulongoro nayu kuporote mumalotu, iyu wanguti: ‘Solomoni, ukhumba kuti ndikupaskenji?’

Solomoni wangumuka kuti: ‘Yehova Chiuta wangu, nde mwanamana ukongwa ndipu ndiziŵa cha mo ndingawusiya. Sonu ndipaskeni zeru kuti ndiwusi ŵanthu ŵinu mwakwenere.’

Yehova wangukondwa ndi vo Solomoni wangupempha. Ndipu wangumukambiya kuti: ‘Chifukwa chakuti wapempha zeru m’malu mwakupempha umoyu utali pamwenga chuma, ndikupaskengi zeru zinandi kuluska munthu weyosi pacharu. Kweni ndikupaskengi so vinthu vo waleka kupempha nge, chuma kweniso ulemu.’

Pati pajumpha nyengu yimanavi, anthukazi ŵaŵi anguza kwaku Solomoni ndi nkhani yakusuzga. Sonu munthukazi yumoza wangukamba kuti: ‘Ini ndi munyangu uyu tija m’nyumba yimoza. Ini ndingubala mwana munthurumi ndipu zuŵa lachitatu, munyangu nayu wangubala so mwana munthurumi. Sonu usiku mwana waki wangufwa. Kweni ndati ndagona iyu wanguto mwana waki wakufwa ndi kumugoneka po ndingugoneka mwana wangu, ndipu wanguto mwana wangu. Ndati ndayuka ndingumulereseska mwana wakufwa ndipu ndinguwona kuti wenga wangu cha.’

Iyu wati wamala kukonkhoska, munthukazi munyaki yuwa wangumuka kuti: ‘Awa, mwana wamoyu ngwangu kweni wakufwa yo ngwaki.’ Ndipu munthukazi wakwamba yuwa wangumuka kuti: ‘Awa, mwana wakufwa ngwaku ndipu wamoyu ngwangu.’ Anthukazi yaŵa asuskananga waka viyo. Kumbi Solomoni wanguchita wuli?

Iyu wangutuma munthu kuti wakato lipanga, ndipu wati waza nalu wangukamba kuti: ‘Cheketa mwana wamoyu vigaŵa viŵi ndipu weyosi umupaski chigaŵa chimoza.’

Kweni yo wenga mweneku wa mwana wanguliya ndipu wanguti: ‘Awa! Chondi kubaya cha mwana yo. Mupaskeni munyangu!’ Kweni munyaki yuwa wanguti: ‘Kutipaska cha mwana yo, mucheketeni pakati.’

Pakumaliya paki, Solomoni wangukamba kuti: ‘Kumubaya cha mwana yo. Mupaskeni munthukazi wakwamba yo. Iyu ndiyu mweneku wa mwana.’ Solomoni wanguziŵa ivi chifukwa chakuti mweneku wa mwana wangumuyanja ukongwa mwana waki ndipu wanguzomerezga kuti amupaski munthukazi munyaki kuluska kuti amubayi. Sonu ŵanthu ŵati avwa mo Solomoni wangumaliskiya nkhani iyi, angukondwa ukongwa kuti fumu yawu yenga yazeru.

Panyengu yo Solomoni wawusanga, Chiuta wangutumbika ŵanthu. Iyu wanguchitiska kuti m’charu cho mumengi vakurya vinandi nge, tirigu, barile, mphereska, nkhuyu kweniso vakurya vinyaki. Ŵanthu avwalanga vakuvwala vamampha ndipu ajanga m’nyumba zamampha. Munthu weyosi wenga ndi vinthu vinandi vamampha ukongwa.