CHIGAŴA 5
Kutuwa pa Nyengu ya Ukapolu ku Babiloni, Kuzifika Nyengu Yakuzengeka so kwa Mpanda wa Yerusalemu
Panyengu yo Ayisraele ŵenga ku ukapolu ku Babiloni, angukumana ndi masuzgu nganandi ngo ngangwesa chigomezgu chawu. Shadreke, Mesheke ndi Abedenego anguponyeka mu ng’anju ya motu, kweni Chiuta wanguŵatuzgamu ŵamoyu. Pavuli paki, Amede ndi Aperese ŵati athereska Babiloni, Danyele wanguponyeka m’zenji la nkharamu, kweni Chiuta wangumuvikiliya mwa kujala milomu ya nkharamu.
Pakumaliya paki, Sirusi, fumu ya Perese yingutuzga Ayisraele mu ukapolu. Yiwu anguwere kwawu vati vakwana vyaka 70, kutuliya panyengu yo angutoleke ku Babiloni nge akapolu. Chinthu chakwamba cho anguchita ŵati awere ku Yerusalemu, chenga kuzenga nyumba yakusopiyamu yaku Yehova. Kweni arwani ŵawu angulekeska nchitu yawu. Sonu nchitu yakuzenga nyumba yakusopiyamu yinguŵatore vyaka pafupifupi 22, kutuliya po anguwere ku Yerusalemu.
Pavuli paki tisambirengi za ulendu waku Ezra wakuwere ku Yerusalemu kuchitoweska nyumba yakusopiyamu. Iyu wanguluta pati pajumpha vyaka 47 kutuliya po angumalizgiya kuzenga nyumba yakusopiyamu. Ndipu pati pajumpha vyaka 13 kutuliya po Ezra wangulutiya ku Yerusalemu, Nehemiya wanguwovya kuzenga so mpanda wa Yerusalemu wo ungubwangandulika. Chigaŵa CHACHINKHONDI chikonkhoska vinthu vo vinguchitika kwa vyaka 152, kuzifika nyengu iyi.
PA CHIGAŴA ICHI
NKHANI 78
Janja Lilemba Pachimati
Mchimi Danyele wangung’anamuliya mazu ngo ngangulembeka pachimati.
NKHANI 79
Danyele M’zenji la Nkharamu
Dariusi wangulamura kuti Danyele wabayiki, kweni kumbi penga cho iyu watingi wachitengi kuti waleki kufwa?
NKHANI 80
Ŵanthu Ŵaku Chiuta Atuwaku ku Babiloni
Sirusi, Fumu ya ku Perese yingufiska uchimi umoza yati yathereska Babiloni, ndipu mazuŵa nganu yifiska uchimi unyaki.
NKHANI 81
Angugomezga Chovyu Chaku Chiuta
Ayisraele anguphwanya marangu nga munthu kuti avwiyi Chiuta. Kumbi Chiuta wanguŵatumbika?
NKHANI 82
Mordikayi ndi Estere
Fumukazi Vashite yenga wakutowa kweni Fumu Ahaswerusi yingumuleka ndi kusankha Estere kuja fumukazi yasonu. Chifukwa wuli?
NKHANI 83
Mpanda wa Yerusalemu
Panyengu yo Ayisraele azenganga so mpanda, Nehemiya wanguŵakambiya kuti nyengu zosi apingengi malipanga ndi mikondu usiku ndi msana.