ŴANTHU masawuzandi nganandi angwamba ulendu wakutuwa ku Babiloni kuluta ku Yerusalemu. Kweni ŵati afika anguchisaniya kuti msumba wa Yerusalemu wenga mahami. Pengavi weyosi yo wajangamu. Ndipu Ayisraele akhumbikanga kwamba so kuzenga chechosi.

Chinthu chakwamba cho anguzenga chenga guŵa la sembi. Yanga ngenga malu ngeningo aperekiyangapu sembi pamwenga vawanangwa kwaku Yehova. Pati pajumpha myezi yimanavi, Ayisraele angwamba kuzenga nyumba yakusopiyamu. Kweni arwani ŵawu wo ajanga mu vyaru va pafupi nawu akhumbanga cha kuti Ayisraele azengi nyumba yakusopiyamu. Sonu angwesa kuŵawofya kuti aleki kuzenga. Pakumaliya paki, arwani wo angukambiya fumu yifya ya ku Perese kuti yiŵiki dangu lakukanizga nchitu yakuzenga nyumba yakusopiyamu.

Sonu pangujumpha vyaka 17 kutuliya panyengu yo Ayisraele angutuwa ku Babiloni. Yehova wangutuma achimi ŵaki Hagayi ndi Zekariya kuti akambiyi ŵanthu kuti ayambi so nchitu yakuzenga. Ŵanthu angugomezga kuti Chiuta waŵawovyengi ndipu anguŵavwiya achimi. Ndipu yiwu angwamba so nchitu yakuzenga chinanga kuti penga dangu lakuŵakanizga kuzenga.

Sonu Tatenayi bwana mula wa ku Perese, wanguza kuzifumba Ayisraele ko anguto mazaza ngakuzenge nyumba yakusopiyamu. Ayisraele angumukambiya kuti panyengu yo ŵenga ku Babiloni, Fumu Sirusi yinguŵakambiya kuti: ‘Lutani sonu, ku Yerusalemu ndipu mukazengi nyumba yakusopiyamu yaku Yehova, Chiuta winu.’

Tatenayi wangutumiza kalata ku Babiloni yakufumba asani Sirusi wangukamba nadi mazu yanga. Kweni panyengu iyi ndipu Sirusi wafwa. Sonu pambula kuswera, fumu yifya ya ku Perese yinguweza kalata yo. Ndipu yinguzomerezga kuti Sirusi wanguŵatuma nadi. Sonu fumu iyi yingulemba so kuti: ‘Azomerezgi Ayisraele kuti amuzenge Chiuta wawu nyumba yakusopiyamu. Ndipu nditikulamula kuti uŵawovyi.’ Sonu vyaka vinayi ve pafupi kukwana, nyumba yakusopiyamu yingumala kuzengeka ndipu Ayisraele angukondwa ukongwa.

Kutuwa panyengu yo angumalizgiya kuzenga nyumba yakusoyimu, pangujumpha vyaka pafupifupi 48. Kweni ŵanthu a ku Yerusalemu ŵenga akavu, ndipu msumba ndi nyumba yakusopiyamu yaku Chiuta vawonekanga umampha cha. Ku Babiloni kwenga munthu wa Chiyisraele, Ezra. Iyu wanguvwa kuti nyumba yakusopiyamu yaku Chiuta yikhumbika kunozgeka. Sonu kumbi waviziŵa vo iyu wanguchita?

Ezra wanguluta kuchikumana ndi Arataserese, yo panyengu iyi wenga fumu ya ku Perese. Iyu wenga fumu yamampha ndipu wangupaska Ezra vawanangwa vinandi kuti waluti navu ku Yerusalemu. Ezra wangupempha Ayisraele wo ŵenga ku Babiloni kuti amupingizgeku vawanangwa ivi, kuluta navu ku Yerusalemu. Ndipu ŵanthu pafupifupi 6,000 anguzomera. Yiwu angupinga siliva ndi golidi munandi kweniso vinthu vinyaki vakuzirwa.

Ezra wangufipa mtima chifukwa chakuti munthowa mwenga ŵanthu aheni. Ŵanthu yaŵa atingi akaŵaphangengi siliva ndi golidi yo angupinga kweniso kuŵabaya. Sonu Ezra wanguwunganiska ŵanthu wosi nge mo uwone pachithuthuzi ichi. Ndipu anguromba kwaku Yehova kuti waŵavikiliyi paulendu utali wakuwere ku Yerusalemu.

Yehova wanguŵavikiliya nadi. Ndipu pati pajumpha myezi yinayi, yiwu angufika umampha ku Yerusalemu. Ivi vilongo kuti Yehova wangavikiliya ŵanthu wo atimugomezga