KUMBI nchinthu wuli cho chichitika yapa? Ŵanthu ŵe pa phwandu likulu. Fumu ya ku Babiloni yadana alendu anandi akuzirwa. Yiwu agwiriskiya nchitu makapu nga golidi ndi siliva kweniso mbali za bakuli zo zingutoleka m’nyumba yakusopiyamu yaku Yehova, ku Yerusalemu. Kweni mwamabuchibuchi, janja la munthu linguwoneka ndipu lingwamba kulemba pachimati. Ndipu ŵanthu wosi anguchita mantha.

Panyengu iyi, Beleshazara mzuku waku Nebukadanezara ndiyu wenga fumu. Iyu wangudana ŵanthu ŵaki azeru ndipu wanguŵakambiya kuti: ‘Yo wangaŵerenga malemba yanga ndi kundikambiya vo ngang’anamuwa, wapaskikengi vawanangwa vinandi ndipuso wajengi fumu yachitatu yakuzirwa ukongwa mu ufumu wangu.’ Kweni pengavi yumoza wa ŵanthu azeru yo wanguŵerenga pamwenga kukamba vo malemba ngang’anamuwanga.

Anyinawu ŵa fumu anguvwa chiwawa ndipu angusere m’chipinda chikulu mo ŵanthu wo aryiyanga. Iwu angukambiya fumu kuti: ‘Lekani kuchita mantha, mu ufumu winu mwe munthu mweniyo we ndi mzimu wa achiuta atuŵa. Panyengu yo ambuyamwi a Nebukadanezara ŵenga fumu, angumusankha iyu kuja mula wa ŵanthu azeru wosi. Zina laki ndi Danyele. Tumani munthu wakamudani ndipu wazamukukambiyani vosi vo malemba yanga ngang’anamuwa.’

Nyengu yeniyo anguchimuto Danyele. Wati wakana kulonde chawanangwa chechosi, wangwamba kukamba chifukwa cho kali Yehova wanguŵatuzgiya pa ufumu a Nebukadanezara wo ŵenga ambuyaki aku Beleshazara. Danyele wangukamba kuti: ‘Iwu ŵenga akujikuzga ndipu Yehova wanguŵalanga.’

Danyele wangukambiya Beleshazara kuti: ‘Kweni iwi uziŵa vosi vo vinguŵachitikiya, kweni nawiso utijikuzga nge mo ŵenge a Nebukadanezara. Wato makapu ndi mbali zabakuli m’nyumba yakusopiyamu yaku Yehova ndipu waryiyamu. Utumbika achiuta akupangika ndi vimiti kweniso akupangika ndi mya, m’malu mwakutumbika Mlengi Mula. Ichi ndichu chifukwa chaki Chiuta watuma janja kuti lilembi mazu yanga.

Danyele wangukamba kuti: ‘Mazu ngo ngalembeka ngakuti: ‘MENE, MENE, TEKEL, PARSIN.’

‘MENE, kung’anamuwa kuti Chiuta wawerenga mazuŵa nga ufumu winu ndipu wawumaliza. TEKEL, kung’anamuwa kuti mwapimika pasikelu ndipu mwasanirika kuti mupereŵera. PARSIN, kung’anamuwa kuti ufumu winu waperekeka kwa Amedi ndi Aperese.’

Danyele weche kuŵeleŵeta, Amedi ndi Aperese angwamba kulonda Babiloni. Yiwu angulonda msumba ndi kubaya Beleshazara. Mazu ngo ngangulembeka pachimati ngangufiskika usiku weniwo. Kweni nchinthu wuli cho chinguchitikiya Ayisraele? Tichiziŵengi pambula kuswela yapa, kweni tiyi tiwoni dankha vo vinguchitikiya Danyele.