KUMBI nchinthu wuli cho chichitika yapa? Mnyamata yo wagona po wapwetekeka ukongwa. Munthu yo watuwa m’nyumba ndi anyaki yo ndi Paulo. Kumbi wamuwona so Timote? Kumbi mnyamata yo wawa kutuliya pawindu?

Hinya, ivi ndivu vinguchitika nadi. Paulo wakambanga nkhani ku akusambira a ku Troa. Iyu wanguziŵa kuti wapambanengi nawu kwa nyengu yitali, chifukwa chakuti watuwangaku mawa laki. Sonu iyu wangulutirizga kukamba nkhani mpaka pakati pausiku.

Mnyamata yo zina laki lenga Eutuko. Iyu wanguja pawindu ndipu wanguwa chifukwa chakuti wangugona tulu. Wangutuwa pawindu la nyumba yachitatu yakuyerekana kufika pasi. Ndichu chifukwa chaki ŵanthu yaŵa awoneka kuti ŵe ndi chitima ukongwa. Sonu yiwu anguchita mantha kuti panyaki wafwa ndipu ŵati amuto angusaniya kuti wafwa nadi.

Paulo wati wawona kuti mnyamata uyu wafwa, iyu wangugona pachanya pa mwana yo ndi kumuvumbatiya. Ndipu wangukamba kuti: ‘Mungafipanga mtima cha. Iyu ngwamoyu.’ Mnyamata yo wanguyuka nadi. Ichi chenga chakuziziswa. Paulo wangumuyuska mwana uyu. Ndipu wumba wosi wa ŵanthu ungukondwa ukongwa.

Sonu ŵanthu wosi anguluta so m’chipinda cha pachanya kuchirya chakurya. Paulo wangulutirizga kupharazga mpaka mulenji. Panyengu iyi, Eutuko wangugona so cha. Pavuli paki, Paulo, Timote ndi anyaki wo ŵenga nawu paulendu uwu angukwera boti. Kumbi waziŵaku ko alutanga?

Yapa ndipu Paulo wamaliza waka ulendu waki wachitatu wakupharazga ndipu sonu walutanga kwawu. Paulendu uwu, Paulo wanguja mu msumba wa Efeso vyaka vitatu. Ulendu uwu wenga utali ukongwa kuluska wachiŵi.

Wati watuwa ku Troa, wanguma pa Mileto kwa kanyengu kamanavi. Pakuti ku Efeso kwenga kufupi ndi ku Mileto, Paulo wangutuma uthenga ku ŵala a mpingu wa ku Efeso kuti wazikambiskani nawu kakumaliya. Pavuli paki boti le pafupi kusoka, yiwu anguchita chitima ukongwa kuwona kuti Paulo waluta.

Pakumaliya paki, boti lingufika so ku Kaisarea. Panyengu iyi, Paulo wajanga m’nyumba ya wakusambira Filipu, ndipu mchimi Agabu wangumutcheŵeske limu Paulo. Iyu wangukamba kuti Paulo wamuja m’jeri asani waluta ku Yerusalemu. Ndipu ivi ndivu vinguchitika nadi. Sonu Paulo wati waja m’jeri kwa vyaka viŵi ku Kaisarea, angumutole ku Roma kuti wakayeruzgiki ndi Kaisare yo wawusanga m’charu cha Roma. Tiyi tiwoni vo vinguchitika paulendu wakuluta ku Roma.