1. Kumbi Yesu wangudidimizga fundu wuli usiku wakuti wafwengi mawa?

USIKU wakuti wafwengi mawa, Yesu wangukonkhoska vo vazamuchitikiya akusambira ŵaki. Iyu wanguromba kwa Awiski kuti: “Ndiromba cha kuti muŵatuzgi mucharu, kweni kuti muŵasungi ku muheni yo. Kuti mbacharu cha, uli ndimo ini kuti ndiliri wacharu cha.” (Yohane 17:15, 16) M’rombu laki lakutuliya pasi pa mtima, Yesu wangulongo kuti waŵayanjanga akusambira ŵaki ndipuso wangulongo kukhumbika kwa mazu ngo wangukambiya anyaki mwa akusambira ŵaki usiku weniwo, ngakuti: “Mwe acharu cha.” (Yohane 15:19) Yesu wakhumbisiskanga kuti akusambira ŵaki aje akulekana ndi charu.

2. Kumbi Yesu wakambanga “charu” nichi?

² “Charu” cho Yesu wakambanga, mbanthu wosi wo ŵe kutali ndi Chiuta, ŵeniwo awusika ndi Satana, ndipu ŵe ndi mbunu kweniso ŵe ndi mzimu wakujikuzga wakutuliya kwaku Satana. (Yohane 14:30; Ŵaefesu 2:2; 1 Yohane 5:19) Mbuneneska kuti kwanjana “ndi charu mbumawongu paku Chiuta.” (Yakobe 4:4) Kumbi wo akhumba kulutirizga kujisunga m’chanju chaku Chiuta, angaleka wuli kuja acharu penipo ŵe m’charu chenicho? M’mutu wunu tikambiskanengi nthowa zinkhondi izi: (1) Kuja akugomezgeka ku Ufumu waku Chiuta wo uwusika ndi Khristu ndipuso kuleka kuchitaku ndali, (2) kukana mzimu wacharu, (3) kuvwala ndi kujitoweska  mwakwenere, (4) kuja ndi jisu lakulereska chinthu chimoza ndipuso (5) kuvwala vidya vosi vauzimu.

3. (a) Nchifukwa wuli Yesu wanguchitaku cha ndali? (b) Nchifukwa wuli tingakamba kuti Akhristu akusankhika ateŵete nge akumiya Khristu? (Wonani so mazu ngam’mphata.)

³ Yesu wanguchitaku cha ndali kweni wanguŵika maŵanaŵanu ngaki ngosi pa kupharazga Ufumu waku Chiuta, weniwo iyu walindizganga kuzija Fumu. (Danyele 7:13, 14; Luka 4:43; 17:20, 21) Ndichu chifukwa chaki po wakambiskananga ndi Pontio Pilato yo wenga Nduna ya Aroma, Yesu wangukamba kuti: “Ufumu wangu kuti ngwacharu chinu cha.” (Yohane 18:36) Akhristu akugomezgeka, atimuyezga mwakuja akugomezgeka kwaku Khristu ndi Ufumu waki ndipuso apharazga Ufumu wenuwu pacharu chosi. (Mateyu 24:14) Wakutumika Paulo wangulemba kuti: ‘Viyo te mathenga [akumiya] pachifukwa chaku Khristu, tininizikiya imwi pachifukwa chaku Khristu, kuti: “Mwanjaniskikiyi kwaku Chiuta.”’ *—2 Ŵakorinte 5:20.

4. Kumbi Akhristu wosi auneneska alongo wuli kuti mbakugomezgeka ku Ufumu waku Chiuta? (Wonani bokosi lakuti, “ Akhristu Akwamba Achitangaku Cha Ndali.”)

⁴ Ŵanthu wo amiya charu chinyaki, achitaku cha ndali za m’charu cho agwiramu nchitu. Yiwu nchitu yawu njakumiya pamwenga kulutiska panthazi nchitu za boma pamwenga charu cho akutuliya. Ivi viyanana ŵaka ndi Akhristu akusankhika wo ‘msumba wawu ngwakuchanya.’ (Ŵafilipi 3:20) Chifukwa cha phamphu lawu pa kupharazga Ufumu, awovya ŵanthu mamiliyoni nganandi ‘ambereri zinyaki’ kuti ‘ayanjaniskikiyi kwaku Chiuta.’ (Yohane 10:16; Mateyu 25:31-40)  Ambereri zinyaki ŵenaŵa, ateŵete Khristu chifukwa atovya abali wo amuwusiya limoza ndi Yesu. Magulu ngosi ngaŵi ngakoliyana pakugwira nchitu yakulutiska panthazi Ufumu wakuwusika ndi Mesiya, ndipu ngachita ndali cha chinanga nkhamanavi.—Ŵerengani Yesaya 2:2-4.

5. Kumbi Akhristu apambana wuli ndi Ayisraeli akali, nanga kupambana kwenuku kuwoneke m’nthowa nizi?

 ⁵ Akhristu aleka kuchitaku ndali chifukwa akhumba kuja akugomezgeka kwaku Khristu. Mwakupambana ndi Ayisraele wo ŵenga a m’charu chimoza, isi mazuŵa nganu tituliya m’vyaru vakupambanapambana. (Mateyu 28:19; 1 Petro 2:9) Mwaviyo, asani tingachita ndali, tiŵengevi wanangwa pakupharazga uthenga wa Ufumu ndipu titimbanyizgengi kukoliyana kwidu nge Akhristu. (1 Ŵakorinte 1:10) Ndipuso asani tingachitaku nkhondu, tingabaya Akhristu anyidu ŵeniwo tilangulika kuti tiŵayanjengi. (Yohane 13:34, 35; 1 Yohane 3:10-12) Penga pakuvwika kuti Yesu wakambiyi akutumika ŵaki kuti angachitanga nkhondu cha. Iyu wanguŵakambiya so kuti ayanjengi arwani ŵawu.—Mateyu 5:44; 26:52; wonani bokosi lakuti, “ Kumbi Nde Nadi Kuchigaŵa Chaku Yehova?”

6. Kumbi kujipereka kwinu kwaku Chiuta kukwaska wuli mo muchitiya ndi Kaisare?

⁶ Nge Akhristu auneneska tikujipereka ku munthu weyosi cha, chinanga nkhu mawupu nga ŵanthu pamwenga charu kweni tikujipereka kwaku Chiuta. Lemba la 1 Ŵakorinte 6:19, 20, likamba kuti: “Ndipu kuti mwe waku mwaŵeni cha; chifukwa mungugulika ndi mtengu.” Mwaviyo, chinanga kuti Akhristu apereka ‘vaku Kaisare kwaku Kaisare,’ nge ulemu, misonkhu ndipuso kumuvwiya asani mphakukhumbika kuchita viyo, kweni yiwu apereka “vaku Chiuta kwaku Chiuta.” (Marko 12:17; Ŵaroma 13:1-7) Ivi visazgapu kusopa kwawu, chanju chawu chakutuliya pasi pa mtima ndipuso kumuvwiya mwakugomezgeka. Yiwu mbakunozgeka kupereka umoyu wawu chifukwa chaku Chiuta.—Luka 4:8; 10:27; ŵerengani Machitidu 5:29; Ŵaroma 14:8.

7, 8. Kumbi “mzimu wacharu” nchinthu wuli, nanga ugwira wuli nchitu mu munthu?

⁷ Nthowa yinyaki yo Akhristu alekiyana ndi charu, nkhukana mzimu waki uheni. Paulo wakulemba kuti: “Talonde  isi, mzimu wacharu cha, kweni Mzimu wakutuliya kwaku Chiuta.” (1 Ŵakorinte 2:12) Kwa Akhristu a ku Efesu wangukamba kuti: “Mwaku ngeningo mungwendayenda ulaka ndi . . . charu chenichi, kwakuzomerezgana ndi fumu ya mitufu ya mude mzimu wo sonu utataliyamu [ugwira nchitu] mu ŵana amtafu.”—Ŵaefesu 2:2, 3.

⁸ Nge po yiliri “mphepu,” mzimu wacharu uwoneka cha kweni uchitiska ŵanthu kuti aleki kuvwiya Chiuta ndipu utiŵachitiska so kuti aje ndi ‘chilakalaka cha liŵavu, ndi chilakalaka cha masu.’ (1 Yohane 2:16; 1 Timote 6:9, 10) Mzimu wenuwu we ndi “mtufu” pa liŵavu lidu lambula kufikapu, ngwakusuzga kuwuziŵa, ngwakusuzga kutuwamu m’munthu ndipu usanirika peposi nge mphepu. Uchitiska munthu kuti wayambi kuja ndi mijalidu yiheni nge mbunu, kujikuzga, kuleka kukhorweseka ndi vo wenavu ndipuso kuja ndi mzimu wakujithemba kweniso wakugarukiya. * Tingakamba kuti mzimu wacharu uchitiska kuti mijalidu yaku Diabolo yiyambi kukuwa m’mtima wa munthu.—Yohane 8:44; Machitidu 13:10; 1 Yohane 3:8, 10.

9. Kumbi mzimu wacharu ungasere wuli m’maŵanaŵanu ndi m’mtima widu?

⁹ Kumbi mzimu wacharu ungasere m’maŵanaŵanu ndi m’mtima winu? Hinya, asani titiwuzomerezga ndi kuleka kuvikiriya mtima widu. (Ŵerengani Nthanthi 4:23.) Kanandi mzimu wenuwu utamba mwambula kuwoneke, panyaki ungayamba chifukwa cha ŵanthu wo ticheza nawu, wo angawoneka kuti mbamampha kweni atanja Yehova cha. (Nthanthi 13:20; 1 Ŵakorinte 15:33) Mungaja so ndi mzimu uheni wenuwu asani muŵerenga mabuku ngaheni, kuwonere vinthu vakuyuska chiryokuryoku chakugonana, vakukondweska vambula kwenere, masaza nga maphara ndipuso kuvwisiya visambizu va ampatuku. Kukamba uneneska, tingatore  mzimu wenuwu kuporote mu munthu weyosi pamwenga chinthu chechosi cho chilongo maŵanaŵanu ngaku Satana kweniso charu chaki.

10. Kumbi tingawukanizga wuli mzimu wacharu?

¹⁰ Kumbi tingawukanizga wuli mzimu wakofya wacharu ndi kulutirizga kuja m’chanju chaku Chiuta? Mwakugwiriskiya nchitu umampha chakurya chauzimu cho Yehova watitipaska ndipuso kulutirizga kuromba kuti mzimu  wakupaturika utiwovyi. Yehova we ndi nthazi kuruska Diabolo ndipuso charu chiheni cho chilongozgeka ndi Satana. (1 Yohane 4:4) Mwaviyo, tikhumbika kuja pafupi ndi Yehova mwakuromba.

11. Kumbi ŵanthu anandi mazuŵa nganu avwala wuli?

¹¹ Kavwalidu, kujitoweska ndi uchanda wa munthu ndivu vilongo mzimu wo utimulongozga. M’vyaru vinandi ŵanthu avwala umampha cha, mwakuti munthu munyaki wakupharazga makani pa TV wangukamba kuti, pambula kuswera yapa kuŵengi kwakusuzga kuziŵa kuti huli ndi nili. Nyuzipepala yinyaki yingukamba kuti: Chinanga mbasungwana wo ŵechendafiki vyaka 13, nawu atoliyaku kavwalidu kenaka. Yiwu “avwala vakuvwala vakulongo liŵavu ndipuso vambula kupaska ulemu.” Jalidu linyaki, nkhuvwala kwambula kujiphwere ko kulongo mzimu wakugarukiya ndipuso kuleka kujitumbika.

12, 13. Kumbi ndi fundu nizi zo zingatilongozga pa nkhani ya kavwalidu ndi kujitoweska?

¹² Nge ateŵeti aku Yehova tikhumbika kuwoneka umampha, vo ving’anamuwa kuvwala vakuvwala vakutowa, vo vingaleka kuguŵiska ŵanthu ndipuso vakwenere malu ngo tili. Nyengu zosi kuvwala kwidu kulekengi kuchitiska “soni” kweni kujengi kwa “chinjeru” pamoza ndi “nchitu zamampha” zakwenere ŵanthu wo “azomerezga uwopa Chiuta.” Chilatu chidu chikulu nkhukhumba kuti ŵanthu atiwoni cha, kweni kuti tilutirizgi ‘kujisunga m’chanju chaku Chiuta.’ (1 Timote 2:9, 10; Yuda 21) Mwaviyo, tikhumbisiska kuti kutowa kwidu kujengi kwa ‘munthu wakubisama mumtima . . . , yo pa masu ngaku Chiuta ngwakuzirwa ukongwa.’—1 Petro 3:3, 4.

¹³ Kumbukani kuti kavwalidu ndi kujitoweska kwidu, vingakwaska so mo ŵanthu awone kusopa kwauneneska. Mazu nga Chigiriki ngo ngakufwatulikiya kuti “soni” asani angagwiriskiya nchitu pa nkhani ya mijalidu, ngang’anamuwa kutumbika pamwenga kuŵanaŵaniya mo anyidu angatiwone. Mwaviyo,  pa nkhani ya kavwalidu titenere kuŵanaŵaniya njuŵi ya anyidu kuruska wanangwa widu wo te nawu wakusankha vakuvwala vo tikhumba. Kuruska vosi, tikhumba kutumbika Yehova ndi ŵanthu ŵaki ndipuso kulongo kuti te ateŵeti ŵaki wo achita “vosi ku unkhankhu waku Chiuta.”—1 Ŵakorinte 4:9; 10:31; 2 Ŵakorinte 6:3, 4; 7:1.

14. Kumbi ndi mafumbu nanga ngo titenere kujifumba pa nkhani ya kavwalidu ndi kawonekeru kidu?

¹⁴ Kuvwala umampha ndipuso kujitoweska nkhwakukhumbika ukongwa asani tiluta mu uteŵeti wakumunda pamwenga asani te pa maunganu ngachikhristu. Jifumbeni kuti: ‘Kumbi kavwalidu ndi kawonekeru kangu kachitiska kuti ŵanthu alereskengi ŵaka ini? Kumbi kachitiska soni ŵanthu anyaki? Kumbi ndiwona kuti wanangwa wangu pa nkhani ya kavwalidu ndi kawonekeru ndiwu wakukhumbika ukongwa kuruska kuja wakwenere kulonde maudindu mumpingu?’—Sumu 68:6; Ŵafilipi 4:5; 1 Petro 5:6.

15. Nchifukwa wuli m’Bayibolo mulivi mundandanda wa marangu pa nkhani ya kavwalidu ndi kujitoweska?

¹⁵ M’Bayibolo mulivi mundandanda wa marangu ngo Akhristu atenere kulondo pa nkhani ya kavwalidu, kujitoweska ndipuso uchanda. Yehova watitikanizga cha kugwiriskiya nchitu zeru ndi wanangwa widu wakusankha vinthu. M’malu mwaki wakhumba kuti tije ŵanthu akukhwima, wo aŵanaŵaniya fundu za m’Bayibolo ndipuso “ŵeniwo mu kupiripita ŵe  ndi vinjeru vawu vakurongosoleka [vakusambizika] kuteska [kupambaniska] chamampha ndi so chiheni.” (Ŵahebere 5:14) Kuruska vosi, Chiuta wakhumba kuti chanju chidu paku iyu ndi abali ŵidu ndichu chitilongozgengi. (Ŵerengani Marko 12:30, 31.) Kuŵanaŵaniya fundu zenizi kutiwovyengi kuti tivwalengi ndi kujitoweska mwakwenere. Ukaboni wa venivi uwoneke mo ŵanthu aku Yehova avwaliya kwekosi ko awungana pacharu chapasi.

16. Kumbi mzimu wa charu upambana wuli ndi vo Yesu wasambizanga, nanga ndi mafumbu nanga ngo tingajifumba?

¹⁶ Mzimu wacharu ngwakunyenga ndipu uchitiska kuti ŵanthu anandi awonengi kuti ndalama ndipuso vinthu vakuliŵavu ndivu vipaska likondwa. Kweni Yesu wangukamba kuti: “Umoyu wa munthu kuti uŵiya mu ufurwi [unandi] waku vo wenavu cha.” (Luka 12:15) Yesu wang’anamuwanga  kuti ŵanthu ajinolengi mwakujumpha mwesu cha, kweni iyu wang’anamuwanga kuti, ŵanthu wo ‘mbasawuchi mu mzimu’ ndipuso wo alutirizga kuja ndi jisu ‘lakulereska chinthu chimoza,’ ndiwu aja ndi umoyu walikondwa. (Mateyu 5:3; 6:22, 23) Jifumbeni kuti: ‘Kumbi ndigomezga nadi vo Yesu wangukamba pamwenga ndilongozgeka ŵaka ndi “uskewu wa ŵatesi [aboza]?” (Yohane 8:44) Kumbi vo ndikamba, vilatu vangu, vo ndiwona kuti vakuzirwa pa umoyu wangu kweniso vo ndichita, vilongo kuti nde munthu wamtundu wuli?’—Luka 6:45; 21:34-36; 2 Yohane 6.

17. Zumbuwani vitumbiku vinyaki vo ŵanthu wo alutirizga kuja ndi jisu lakulereska chinthu chimoza asaniya.

¹⁷ Yesu wangukamba kuti: “Zeru yirunjiskika ndi machitidu ngaki.” (Mateyu 11:19) Ŵanaŵaniyani vitumbiku vinyaki vo ŵanthu wo alutirizga kuja ndi jisu lakulereska chinthu chimoza asaniya. Yiwu asisipulika ndi nchitu ya Ufumu. (Mateyu 11:29, 30) Afipa mtima cha ndipu kuchita viyo kutiŵawovya kuti alekengi kusuzgika ukongwa maŵanaŵanu. (Ŵerengani 1 Timote 6:9, 10.) Chifukwa chakuti akhorwa ndi vo ŵenavu, asaniya nyengu yinandi yakucheze ndi mabanja ngawu ndipuso Akhristu anyawu. Ivi vichitiska kuti agonengi tulu tamampha ukongwa. (Wakutaula 5:12) Asaniya so likondwa chifukwa chakupaska m’nthowa zakupambanapambana. (Machitidu 20:35) Yiwu ‘mbasambasi mu chigomezgu,’ ndipu aja ndi likondwa la mumtima kweniso akhorwa ndi vo ŵenavu. (Ŵaroma 15:13; Mateyu 6:31, 32) Ivi ndi vitumbiku vapachanya ukongwa.

18. Kumbi Bayibolo litimukonkhoska wuli murwani widu, nthowa zaki ndipuso mtundu wa nkhondu yo tenayu?

¹⁸ Akhristu wo atijisunga m’chanju chaku Chiuta, avikilirika mwauzimu kwaku Satana yo wakhumba kuti aleki kuja ndi umoyu walikondwa kweniso kuti atondeki kuzisaniya umoyu wamuyaya. (1 Petro 5:8) Paulo wangukamba kuti: “Limbanu lidu kuti le ku ŵanthu cha, kweni ndi maufumu, ndi mitufu,  ndi akuwusa charu amdima wamakono, ndi va mzimu va uheni mu vakuchanya.” (Ŵaefesu 6:12) Mazu ngakuti “limbanu” ngalongo kuti ŵanthu apumana ndi manja. Nkhondu iyi njakugwiriskiya nchitu futi cha, pamwenga mauta kuti munthu wami patali ndi yo wapumana nayu. Kweniso mazu ngakuti “maufumu,” “mitufu,” ndi “akuwusa charu” ngalongo kuti mizimu yiheni njakunozgeka ukongwa kuchita nkhondu yeniyi ndipu yichitiya dala.

19. Konkhoskani vidya vosi vauzimu va Akhristu.

¹⁹ Chinanga kuti te akubuda ndipuso titondeka kuchita vinthu vinyaki, kweni tingapunda. M’nthowa wuli? Mwakuvwala “vidya vosi vaku Chiuta.” (Ŵaefesu 6:13) Pakukonkhoska vidya venivi, lemba la Ŵaefesu 6:14-18 likamba kuti: “Viyo mani, pakujichinyiriya muchiunu ndi uneneska, ndi kuvwala chapachifuŵa cha urunji, kujimangiya ku marwayo [maphazi] nginu dongosoru la evangeli wa chimangu; pachanya paku vosi mujitole nguru ya chivwanu, ndi yeniyo muziŵa kuzimwa mivwi yosi yakukole ya muheni yo. Ndipu jitoliyeni chivekeru chakumutu cho mbutaski, ndi so lipanga la mzimu, lenilo ndi mazu ngaku Chiuta. Mu kuromba ndi kuninizika murombiyengi nyengu zosi mumzimu.”

20. Kumbi nkhondu yidu yipambana wuli ndi ya asilikali a charu?

²⁰ Chifukwa chakuti vidya vauzimu venivi nchawanangwa chakutuliya kwaku Chiuta, kuti tivikiliriki tikhumbika kuvivwara nyengu zosi. Mwakupambana ndi asilikali wo aja nyengu yitali ŵechendaluti ku nkhondu, Akhristu apumuwa cha pa nkhondu ya pakati pa umoyu ndi nyifwa, yo yimalengi cha mpaka po Chiuta wazamutuzgiyapu charu chaku Satana ndi kuponya m’chizenji mizimu yosi yiheni. (Chivumbuzi 12:17; 20:1-3) Mwaviyo, mungavukanga cha asani mulimbana ndi maunthombolu pamwenga maŵanaŵanu ngaheni, chifukwa tosi tikhumbika ‘kujijenyeska’ pamwenga kuti kujipumuntha kuti tilutirizgi kuja akugomezgeka kwaku Yehova. (1 Ŵakorinte 9:27) Mbuneneska kuti pa nyengu yo tileka kuchita nkhondu ndipu titenere kutcheŵa.

21. Kumbi ndi vinthu wuli vo vingatiwovya kuti tipundi pankhondu yidu yauzimu?

 ²¹ Tingapunda cha nkhondu iyi asani tithemba nthazi zidu. Ndichu chifukwa chaki Paulo watitikumbuska kukhumbika kwa kuromba kwaku Yehova “nyengu zosi mumzimu.” Titenere so kuvwiya Yehova mwakusambira Mazu ngaki ndipuso kuwungana ndi “asilikali” anyidu nyengu zosi, chifukwa te tija cha pankhondu iyi. (Filimone 2; Ŵahebere 10:24, 25) Wosi wo mbakugomezgeka pa vigaŵa vosi ivi, apundengi ŵaka cha kweni avikiriyengi so chivwanu chawu asani chisuskika.

22, 23. (a) Nchifukwa wuli titenere kuvikiriya chivwanu chidu nyengu zosi, nanga ndi mafumbu nanga ngo titenere kujifumba? (b) Tikambiskanengenji m’Mutu 6?

²² Yesu wangukamba kuti, “chifukwa kuti mwe acharu cha, . . . chitikutinkhani charu cho.” (Yohane 15:19) Mwaviyo, nyengu zosi Akhristu atenere kuvikiriya chivwanu chawu ndipu atenere kuchita viyo mwaulemu ndipuso mwakufwasa. (Ŵerengani 1 Petro 3:15.) Jifumbeni kuti: ‘Kumbi ndiziŵa chifukwa cho Akaboni aku Yehova nyengu zinyaki achitiya vinthu mwakupambana ndi ŵanthu anandi? Asani ndasankha kuchita vinthu vakupambana ndi vo ŵanthu anandi achita, kumbi nde ndi chigomezgu chosi kuti vo Bayibolo kweniso muŵanda wakugomezgeka wakamba vauneneska? (Mateyu 24:45; Yohane 17:17) Asani ndikhumba kuchita vinthu vakukondweska Yehova, kumbi ndikhumba ŵaka kupambana ndi ŵanthu anyaki pamwenga ndikondwa kuchita viyo?’—Sumu 34:2; Mateyu 10:32, 33.

²³ Kanandi khumbu lidu lakuja akulekana ndi charu liyeseka m’nthowa zambula kuwoneka. Mwakuyeruzgiyapu, nge mo takambiya pakwamba, Diabolo watesesa kunyenga ateŵeti aku Yehova kuti achitengeku vinthu va m’charu kuporote mu vakukondweska. Kumbi tingasankha wuli vakukondweska vamampha vo vingatiwovya kuti tije ndi njuŵi yamampha? Tikambiskanengi nkhani iyi m’Mutu 6.