FUNDU ZAKUKUMALIYA
Vo Mungachita Kuti Muleki Jalidu Lakuseŵeresa Viŵalu Vakubisika
Jalidu lakuseŵeresa viŵalu vakubisika litimukondweska cha Chiuta ndipu jalidu lenili, lichitiska kuti munthu waje ndi maŵanaŵanu ngakujikondweska ndipuso waŵanaŵanengi vinthu viheni. * Munthu yo waseŵeresa viŵalu vakubisika, wangayamba kuwona anyaki nge ŵanthu akuti wagonanengi ŵaka nawu ndi chilatu chakuti wamaliski chiryokuryoku chakugonana. Iyu wawona kuti kugonana kwa ŵanthu akutolana ndi nthowa yakulongoliyana chanju cha, kweni nkhukhumba kuti munthu wakondwi ndipuso wamaliski ŵaka chiryokuryoku chakugonana cho we nachu. Kweni chinanga kuti wangaŵanaŵana viyo, chiryokuryoku chakugonana chimaliya limu cha. Chifukwa chakuti waseŵereska viŵalu vakubisika, iyu watondeka kukanizga viŵalu vaki kuti vileki kuchita vinthu vo vikanizgika nge ‘ureŵi, vinthu va unyakazi [ndipuso] ulakalaka [wambula kwenere].’
Wakutumika Paulo wakulemba kuti: “Mwaŵakwanjiwa, tijitozgi ku ukazuzi wosi wa liŵavu ndi mzimu, ndipu tiŵi akhovu mu chopu chaku Chiuta.” (2 Ŵakorinte 7:1) Asani muyesesa kweni vitikusuzgani kulondo ulongozgi wo we m’mazu yanga, mungafipanga mtima cha. Yehova nyengu zosi ‘ngwakunozgeka kugowoka’ ndipuso kukuwovyani. (Sumu 86:5; Luka 11:9-13) Asani mutijisuska m’mtima mwinu ndipuso muyesesa kuti muleki jalidu liheni lenili chinanga kuti nyengu zinyaki mutondeka kuchita viyo, vilongo kuti mwe ndi maŵanaŵanu ngamampha. Kumbukani so kuti ‘Chiuta ndi mukulu kuruska mtima widu, ndipu waziŵa vosi.’ (1 Yohane 3:20) Chiuta wawona ŵaka ubudi widu cha, iyu wawona vosi vo tichita. Chifukwa chakuti waziŵa vosi, iyu watuvwa marombu ngidu ngakutuliya pasi pa mtima ngakumupempha kuti watigowoke. Mwaviyo, tingavukanga cha kuromba kwaku Chiuta mwakujiyuyuwa ndipuso mwakutuliya pasi pa mtima nge mo mwana wachitiya pakuluta kwa awiski asani wakumana ndi masuzgu. Yehova wakutumbikeningi ndipu wakuwovyeningi kuti muje ndi njuŵi yamampha. (Sumu 51:1-12, 17; Yesaya 1:18) Chinanga kuti ve viyo, mukhumbika kuyesesa kuchitapu kanthu mwakukoliyana ndi marombu nginu. Mwakuyeruzgiyapu, yesesani kuleka kuwonere vinthu vakuyuska chiryokuryoku chakugonana kweniso kwenda ndi ŵanthu a mijalidu yiheni. *
Asani mutondeka kuleka lakuseŵeresa viŵalu vakubisika, kambiyani apapi ŵinu achikhristu pamwenga Akhristu akukhwima mwauzimu kweniso munyinu wakugomezgeka. *
^ ndimi 3 Kuseŵeresa viŵalu vakubisika kung’anamuwa kuvifikinya mwanthazi pamwenga kujinyenyeresa mpaka kujivwa nge kuti ugonana ndi munthu.
^ ndimi 4 Mabanja nganyaki ngaŵika kompyuta pa balaza kuti aleki kuwonere vinthu vakuyuska chiryokuryoku chakugonana pa Intaneti. Anyaki agula pulogilamu yo yijalizga vinthu vakuyuska chiryokuryoku chakugonana asani vikhumba kubuka pa kompyuta. Kweni mapulogilamu yanga ngakugomezgeka viŵi cha.
^ ndimi 5 Pa nkhani ya mo mungachitiya asani mwe ndi jalidu lakuseŵereska viŵalu vakubisika, wonani fundu zo zingakuwovyani m’nkhani yakuti: “Zimene Achinyamata Amadzifunsa: Kodi Ndingathetse Bwanji Chizolowezi Chimenechi?” yo ye mu Galamukani! ya November 2006, ndipuso m’buku la Chichewa la: Mayankho a Zimene Achinyamata Amafunsa, Buku Loyamba, papeji 178-182.
