SAMBIRU 27
Kumbi Nyifwa Yaku Yesu Yingatitaska Wuli?
Tibuda, tisuzgika ndipuso titufwa chifukwa chakuti Adamu ndi Heva angumuvwiya cha Chiuta. a Kweni vinthu visinthengi pambula kuswera yapa. Yehova wakugwiriskiya ntchitu Mwana waki Yesu Khristu kuti watitaski ku ubudi ndi nyifwa. Bayibolu likamba kuti chifukwa cha nyifwa yaki, Yesu wakupereka sembi yakutiwombole. Yesu wangupereka umoyu waki wakufikapu kuti wawombo mtundu wa ŵanthu. (Ŵerengani Mateyu 20:28.) Yesu wenga ndi wanangwa wakuja kwamuyaya pacharu chapasi. Kweni iyu wangusankha kupereka umoyu waki chifukwa chaku isi. Venivi vikutijuliya nthowa yakuti tisaniyi so vinthu vamampha vo Adamu ndi Heva akutaya. Vo Yesu wanguchita vilongo kuti iyu kweniso Yehova atitiyanja ukongwa. Sambiru ili likuwovyeningi kuti mumuwongengi ukongwa Yesu chifukwa chakuti wakutifwiya.
1. Kumbi nyifwa yaku Yesu yingatiwovya wuli mazuŵa nganu?
Chifukwa chakuti te akubuda, tichita vinthu vinandi viheni vo vileka kukondwesa Yehova. Kweni tingaja pa ubwezi wakukho ndi Chiuta asani titijivwiya chitima chifukwa cha maubudi ngidu. Pavuli paki, tikhumbika kupempha Yehova kuziya mwaku Yesu Khristu kuti watigowoke kweniso tingawerezangapu cha kuchita so ubudi weniwo. (1 Yohane 2:1) Bayibolu likamba kuti: “Khristu wangufwa kamoza pe mbwenu mpaka muyaya chifukwa cha maubudi, munthu murunji wangufwiya ŵanthu ambula urunji, kuti wakulongozgiyeni kwaku Chiuta.”—1 Peturo 3:18.
2. Kumbi nyifwa yaku Yesu yazakutiwovya wuli kunthazi?
Yehova wangutuma Yesu kuti wapereki umoyu waki wakufikapu “kuti weyosi yo wavwana mwaku [Yesu] waleki kunangika, kweni waje ndi umoyu wamuyaya.” (Yohane 3:16) Tiwonga ukongwa vo Yesu wakuchita, ndipu pambula kuswera yapa, Yehova watuzgengepu vinthu vosi viheni vo vikwamba chifukwa chakuleka kuvwiya kwaku Adamu. Ivi ving’anamuwa kuti tingaŵa ndi mwaŵi wakuzija ndi umoyu wambula kumala pacharu chapasi asani tingayigomezga ndi mtima wosi sembi yaku Yesu!—Yesaya 65:21-23.
SAMBIRANI VINANDI
Ziŵani chifukwa cho Yesu wangupereke umoyu waki, ndipuso wonani mo venivi vitikuwovyiyani.
3. Nyifwa yaku Yesu yititifwatuwa ku ubudi ndi nyifwa
Woneriyani VIDIYO, pavuli paki kambiskanani fumbu lo le mumphata.
-
Kumbi Adamu wangutaya mwaŵi wuli wati waleka kuvwiya Chiuta?
Ŵerengani Aroma 5:12, pavuli paki kambiskanani fumbu ili:
-
Kumbi ndi vinthu wuli vo vitikuchitikiyani chifukwa cha kubuda kwaku Adamu?
Ŵerengani Yohane 3:16, pavuli paki kambiskanani fumbu ili:
-
Ntchifukwa wuli Yehova wangutuma Mwana waki kuti wazi pacharu?
-
Adamu wenga munthu wakufikapu, kweni wangumuvwiya cha Chiuta ndipu wakulongozge ŵanthu ku ubudi ndi nyifwa
-
Yesu wenga munthu wakufikapu. Iyu wangumuvwiya Chiuta ndipu wakuwovya ŵanthu kuti azije akufikapu kweniso kwamuyaya
4. Nyifwa yaku Yesu yingawovya ŵanthu anandi
Woneriyani VIDIYO, pavuli paki kambiskanani fumbu lo le mumphata.
-
Kumbi nyifwa ya munthu yumoza yingawovya wuli ŵanthu wosi?
Ŵerengani 1 Timote 2:5, 6, pavuli paki kambiskanani fumbu ili:
-
Adamu wenga munthu wakufikapu yo wakulongozge ŵanthu ku ubudi ndi nyifwa. Yesu nayu wenga wakufikapu. Kumbi vinguchitika wuli kuti Yesu wapereki “sembi yakuwombole yakuyanana” ndi umoyu wakufikapu wo Adamu wangutaya?
5. Sembi yaku Yesu yakuwombole ndi mphasu yo Yehova wakupaskani
Mabwezi ngaku Yehova ngawona kuti sembi yakuwombole ndi mphasu yo Chiuta wakuŵapaska. Mwakuyeruzgiyapu, ŵerengani Agalatiya 2:20, ndipu pavuli paki kambiskanani fumbu ili:
-
Kumbi ndi mazu nanga ngo wakutumika Paulo wangukamba ngo ngalongo kuti wawonanga kuti sembi yakuwombole ndi mphasu yo yikuperekeka kwaku iyu?
Adamu wati wabuda, iyu ndi mphapu yaki yosi ŵenga akwenere kufwa. Kweni Yehova wangutuma Mwana waki kuti wazitifwiyi kuti yimwi namwi muzisaniyi umoyu wamuyaya kunthazi.
Muchiŵerenga mavesi yanga, ŵanaŵaniyani mo Yehova wanguvwiya pa nyengu yo Mwana waki wasuzgikanga. Ŵerengani Yohane 19:1-7, 16-18, pavuli paki kambiskanani fumbu ili:
-
Kumbi mutuvwa wuli chifukwa cha vo Yehova ndi Yesu akukuchitiyani?
MUNTHU MUNYAKI WANGAFUMBA KUTI: “Kumbi munthu yumoza wangafwiya wuli ŵanthu wosi?”
-
Kumbi mungamuka wuli?
KUMBI MWASAMBIRANJI?
Chifukwa cha nyifwa yaku Yesu, Yehova watitigowoke maubudi ngidu kweniso tazamusaniya umoyu wamuyaya.
Kuweriyamu
-
Ntchifukwa wuli Yesu wangufwa?
-
Kumbi sembi yaku Yesu yayanananga wuli ndi umoyu wakufikapu wo Adamu wangutaya?
-
Kumbi nyifwa yaku Yesu yingakuwovyani wuli?
FUFUZANI
Wonani chifukwa cho umoyu wakufikapu wo Yesu wangupereka udanikiya kuti sembi yakuwombole.
“Kumbi Sembi Yaku Yesu Yiwombo Wuli ‘Ŵanthu Anandi’?” (Nkhani ya pa webusayiti)
Wonani vo tikhumbika kuchita kuti tizitaskiki.
Kumbi Yehova wangagowoke munthu chinanga wangachita maubudi ngakulungakulu?
Wonani mo kusambira vakukwaskana ndi sembi yaku Khristu kunguwovye munthu munyaki yo wangusintha nkharu yaki.
a Ubudi ung’anamuwa vinthu viheni vo ŵanthu achita pe cha. Kweni ung’anamuwa so mtima wo tikuhara wakukhumba kuchita vinthu viheni.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
