SAMBIRU 55
Muwovyengi Mpingu Winu
Ŵanthu mamiliyoni nganandi pacharu chosi chapasi ateŵete Yehova mwakukondwa mumipingu ya Akaboni aku Yehova masawuzandi nganandi. Yiwu awonga ukongwa chifukwa cha ulongozgi wo alonde, ndipu atovya mipingu yawu munthowa zakupambanapambana. Kumbi namwi mutovya mpingu winu?
1. Kumbi mungayigwiriskiya wuli ntchitu nyengu yinu kweniso nthazi zinu kuti muwovyi mpingu?
Weyosi wangawovya mpingu. Mwakuyeruzgiyapu, kumbi mumpingu winu mwe ŵanthu akukota pamwenga wo atama? Kumbi mungaŵawovya kuti asanirikengi pa maunganu? Pamwenga kumbi mungaŵawovyaku ntchitu zinyaki zapakhomu ndipuso kuchiŵaguliya vinthu kumsika? (Ŵerengani Yakobe 1:27.) Kweniso tingajipereka kuti tiwovyeku kunozga Nyumba ya Ufumu. Palivi yo watitichichizga kuchita vinthu venivi. Kweni ‘titijipereka mwakukhumbisiska’ chifukwa chakwanja Chiuta ndipuso abali ŵidu.—Salimo 110:3.
Akaboni akubatizika angawovya so mpingu munthowa zinyaki. Abali wo afiska vo Bayibolu likamba angateŵete nge ateŵeti akovya ndipuso nge ŵara. Kweniso abali ndi azichi angawovya ukongwa ntchitu yakupharazga mwakuteŵete nge apayiniya. Anyaki angajipereka kuti agwirengeku ntchitu yakuzenga malu ngakusopiyamu pamwenga kuluta ku mipingu yo yikhumbika chovyu.
2. Kumbi tingagwiriskiya wuli ntchitu ndalama zidu ndipuso vinthu vidu vinyaki kuti tiwovyi mpingu?
Tosi ‘tingatumbika Yehova ndi vinthu vidu vakuzirwa.’ (Nthanthi 3:9) Tikondwa ukongwa kupereka ndalama kweniso vinthu vidu vinyaki kuti viwovyi mpingu widu kweniso ntchitu yakupharazga yapacharu chosi. (Ŵerengani 2 Akorinto 9:7.) Ndalama ndipuso vinthu vinyaki vo tipereka, vitovya so abali wo akumana ndi masoka. Anandi asankha ‘kuŵika pamphepeti kanthu kanyaki’ kuti apereki. (Ŵerengani 1 Akorinto 16:2.) Tingapereka ndalama kuziya mutimabokosi to tisanirika mumalu ngo tiwungana pamwenga tingatumiza kuziya pa donate.pr418.com. Yehova wakutipaska mwaŵi wakulongo kuti titimuyanja, ndipu tingachita venivi asani tipereka vinthu vo tenavu.
SAMBIRANI VINANDI
Wonani nthowa zinyaki zo mungawovye mpingu.
3. Tingapereka ndalama ndipuso vinthu vidu vinyaki
Yehova watanja ŵanthu wo apereka ndi mtima wosi, ndipu Yesu nayu watanja ŵanthu aviyo. Mwakuyeruzgiyapu, Yesu wanguwonga choko chinyaki cho chenga ndi tindalama timanavi ukongwa, kweni chingupereka mbwenu kwaku Yehova. Ŵerengani Luka 21:1-4, pavuli paki kambiskanani mafumbu yanga:
-
Kumbi tikhumbika kupereka ndalama zinandi pe kuti tikondwesi Yehova?
-
Kumbi Yehova ndi Yesu atuvwa wuli asani tipereka ndi mtima wosi?
Kuti muwoni mo ndalama zo tipereka zigwiriya ntchitu, woneriyani VIDIYO. pavuli paki kambiskanani fumbu ili:
-
Kumbi ndalama zo tipereka zigwiriskikiya wuli ntchitu kuti ziwovyi mipingu pacharu chosi chapasi?
4. Tingapereka nthazi kweniso nyengu yidu
Mu nyengu yakali, ŵanthu wo asopanga Yehova agwiranga mwaphamphu ntchitu yakunozga malu ngawu ngakusopiyamu kuti ngaleki kunangika. Kweni kuti ntchitu yeniyi yifiskiki, pakhumbikanga ndalama pe cha. Ŵerengani 2 Mbiri 34:9-11, pavuli paki kambiskanani fumbu ili:
-
Kumbi Myisirayeli weyosi wanguchita wuli kuti wawovyi ntchitu yakunozga nyumba yaku Yehova pamwenga kuti malu ngakusopiyamu?
Kuti muwoni vo Akaboni aku Yehova achita mazuŵa nganu mwakukoliyana ndi chakuwoniyapu chenichi, woneriyani VIDIYO. pavuli paki kambiskanani mafumbu yanga:
-
Ntchifukwa wuli tikhumbika kutowesa ndi kunozga Nyumba ya Ufumu nyengu zosi?
-
Kumbi ndi nthowa zinyaki nizi zo yimwi mungawovye?
5. Abali atenere kuyesesa kuti alonde maudindu nganyaki mumpingu
Malemba ngachiska anthulumi achikhristu kuti ayesesengi kufiska fundu za mu Bayibolu kuti alonde maudindu mumpingu. Kuti muwoni chakuwoniyapu, woneriyani VIDIYO. pavuli paki kambiskanani fumbu lo le mumphata.
-
Nge po tawone mu vidiyo, kumbi Ryan wanguyesesa wuli kuti waje wakwenere kulonde udindu kuti wawovyengi mpingu mwakukwana?
Bayibolu likonkhoska fundu zo mubali yo wakhumba kuteŵete nge mteŵeti wakovya kweniso nge mura watenere kufiska. Ŵerengani 1 Timote 3:1-13, pavuli paki kambiskanani mafumbu yanga:
-
Kumbi abali wo akhumba kuti aje ateŵeti akovya pamwenga ŵara atenere kufiska fundu nizi za mu Malemba?
-
Nanga ŵanthu a mubanja lawu nawu akhumbika kufiska fundu nizi?—Wonani vesi 4 ndi 11.
-
Kumbi weyosi mumpingu wayanduwa wuli asani abali atesesa kufiska fundu zenizi kuti aje ŵara pamwenga ateŵeti akovya?
MUNTHU MUNYAKI WANGAFUMBA KUTI: “Kumbi ndalama zo Akaboni aku Yehova agwiriskiya ntchitu zituwa pani?”
-
Kumbi mungamuka wuli?
KUMBI MWASAMBIRANJI?
Yehova wawonga ukongwa asani titovya mpingu mwakugwiriskiya ntchitu nyengu yidu, nthazi zidu, ndalama zidu ndipuso vinthu vidu vinyaki.
Kuweriyamu
-
Kumbi tingagwiriskiya wuli ntchitu nyengu yidu kweniso nthazi zidu kuti tiwovyi mpingu?
-
Kumbi tingagwiriskiya wuli ntchitu ndalama zidu ndipuso vinthu vidu vinyaki kuti tiwovyi mpingu?
-
Kumbi yimwi muwona kuti mungawovya mpingu munthowa zinyaki nizi?
FUFUZANI
Wonani chifukwa cho Chiuta wakuleke kukambiya ateŵeti ŵaki kuti aperekengi chatchumi.
“Kumbi Bayibolu Likambanji pa Nkhani ya Kupereka Chatchumi?” (Nkhani ya pa webusayiti)
Kumbi ‘kuyesesa’ kuti munthu uje ndi udindu mumpingu kung’anamuwanji?
“Kumbi Muyesesa?” (Chigongwi cha Alinda, September 15, 2014)
Wonani abali anyaki achiganga wo atijipereka ukongwa kuti akapereki mabuku kwa Akhristu anyawu.
Ŵerengani nkhani iyi kuti muwoni ukaboni wakuti tipambana ukongwa ndi mo visopa vinyaki visaniriya ndalama.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
