SAMBIRU 59
Mungalutirizga Kuja Akugomezgeka Asani Mutombozgeka
Nyengu yeyosi Akhristu angasuskika ndipuso angatombozgeka. Kumbi titenere kuchita mantha?
1. Ntchifukwa wuli tiziŵa kuti titombozgekengi?
Bayibolu likamba mwakuvwika umampha kuti: “Ŵanthu wosi wo akhumba kuja ndi umoyu wakujipereka kwaku Chiuta mwakukoliyana ndi Khristu Yesu, nawu azamutombozgeka.” (2 Timote 3:12) Yesu wangutombozgeka chifukwa wenga chigaŵa cha charu chaku Satana ichi cha. Isi nasi te acharu cha, ndichu chifukwa chaki tizizwa cha asani titombozgeka ndi maboma nga charu ichi kweniso mawupu nga visopa.—Yohane 15:18, 19.
2. Kumbi tinganozgeke wuli kutombozgeka?
Tikhumbika kumugomezga ukongwa Yehova sonu. Muyesesengi kupemphera ndipuso kuŵerenga Mazu ngaku Yehova zuŵa lelosi. Musanirikengi pa maunganu nyengu zosi. Vinthu vosi venivi vikuwovyeningi kuti muje ndi chiganga kuti mufiski kukunthiyapu asani ŵanthu anyaki pamwenga a mubanja linu atikutombozgani. Wakutumika Paulo yo kanandi watombozgekanga wangukamba kuti: “Yehova ndiyu watindiwovya; ndiwopengi cha.”—Aheberi 13:6.
Kupharazga nyengu zosi naku kungatiwovya kuti tije ndi chiganga. Kupharazga kutitiwovya kuti timuthembengi ukongwa Yehova kweniso kuti tilekengi kopa ŵanthu. (Nthanthi 29:25) Asani mupharazga mwachiganga sonu, mungazipharazga mbwenu asani boma layamba kukaniza ntchitu yidu.—1 Atesalonika 2:2.
3. Kumbi kulutirizga kuja akugomezgeka asani titombozgeka kutitiwovya wuli?
Mbuneneska kuti palivi yo wakondwa ndi kutombozgeka, kweni asani takunthiyapu tija ndi chivwanu chanthazi. Tija pa ubwezi wakukho ndi Yehova chifukwa tiwona mo watitiwovye asani nthazi zidu zamaliya limu chifukwa chakutombozgeka. (Ŵerengani Yakobe 1:2-4.) Yehova vitimuŵaŵa ukongwa asani tisuzgika kweni wakondwa asani wawona kuti tikunthiyapu. Bayibolu likamba kuti: “Asani mukunthiyapu masuzgu chifukwa cha kuchita vinthu vamampha, Chiuta wawona kuti venivi vamampha.” (1 Peturo 2:20) Asani tikunthiyapu, Yehova wazakutipaska umoyu wamuyaya mucharu chifya cho mwazamuŵavi ŵanthu akususka kusopa kwauneneska.—Mateyu 24:13.
SAMBIRANI VINANDI
Wonani vo vingatiwovya kulutirizga kuja akugomezgeka kwaku Yehova chinanga kuti titombozgeka kweniso wonani mphotu yo wazakutipaska.
4. Mungakunthiyapu asani mususkika ndi ŵanthu a mubanja linu
Yesu waziŵanga umampha kuti ŵanthu anyaki a mubanja lidu angakondwa cha asani titeŵete Yehova. Ŵerengani Mateyu 10:34-36, pavuli paki kambiskanani fumbu ili:
-
Kumbi ndi vinthu wuli vo ŵanthu anyaki a mubanja lidu angakamba pamwenga kuchita asani tasankha kuteŵete Yehova?
Kuti muwoni chakuwoniyapu pa nkhani iyi, woneriyani VIDIYO, pavuli paki kambiskanani fumbu lo le mumphata.
-
Kumbi mungachita wuli asani mubali pamwenga mubwezi winu watikugongowesani kuti muleki kuteŵete Yehova?
Ŵerengani Salimo 27:10 ndipuso Mariko 10:29, 30. Asani mwaŵerenga lemba lelosi pakulija, kambiskanani fumbu ili:
-
Kumbi vo lemba ili likamba vingakuwovyani wuli asani munthu wa mubanja linu pamwenga mubwezi winu watikususkani?
5. Lutirizgani kuteŵete Yehova chinanga kuti mutombozgeka
Pakhumbika chiganga kuti tilutirizgi kuteŵete Yehova asani ŵanthu anyaki atitigongowesa pamwenga atitikaniza. Woneriyani VIDIYO, pavuli paki kambiskanani fumbu lo le mumphata.
-
Kumbi vakuwoniyapu va muvidiyo iyi vakuchiskani wuli?
Ŵerengani Machitidu 5:27-29 ndi Aheberi 10:24, 25. Asani mwaŵerenga lemba lelosi pakulija, kambiskanani fumbu ili:
-
Ntchifukwa wuli tikhumbika kulutirizga mbwenu kusopa Yehova chinanga kuti ntchitu yidu yakupharazga pamwenga maunganu vingakanizika?
6. Yehova wakuwovyeningi kuti mukunthiyepu
Akaboni aku Yehova amisinkhu ndipuso mitundu yakupambanapambana, angulutirizga kuteŵete Yehova mwakugomezgeka chinanga kuti atombozgekanga. Kuti muwoni vo vinguŵawovya, woneriyani VIDIYO. Pavuli paki kambiskanani fumbu ili.
-
Nge po tawone muvidiyo, kumbi ntchinthu wuli cho chinguŵawovya Akaboni ŵenaŵa kuti akunthiyepu?
Ŵerengani Aroma 8:35, 37-39 ndipuso Afilipi 4:13. Asani mwaŵerenga lemba lelosi pakulija, kambiskanani fumbu ili:
-
Kumbi lemba ili lingakuwovyani wuli kuja ndi chigomezgu kuti mungafiska kukunthiyapu mayeseru ngengosi?
Ŵerengani Mateyu 5:10-12, pavuli paki kambiskanani fumbu ili:
-
Kumbi mungachita wuli kuti mukondwengi chinanga kuti mutombozgeka?
Ŵanthu mamiliyoni nganandi wo asopa Yehova, alutirizga kumuteŵete mwakugomezgeka chinanga kuti asuskika. Namwi mungafiska kuchita viyo!
ŴANTHU ANYAKI AKAMBA KUTI: “Ndingafiska cha kukunthiyapu asani nditombozgeka.”
-
Kumbi ndi malemba nanga ngo ngangaŵawovya kuja ndi chigomezgu kuti angafiska kukunthiyapu?
KUMBI MWASAMBIRANJI?
Yehova wawonga ukongwa asani tiyesesa kumuteŵete chinanga kuti titombozgeka. Iyu ngwakunozgeka kutiwovya kuti tifiski kukunthiyapu!
Kuweriyamu
-
Ntchifukwa wuli Mkhristu waziŵa kuti watombozgekengi?
-
Kumbi mungachita wuli kuti munozgeke kutombozgeka?
-
Kumbi ndi vinthu wuli vo vingakuwovyani kuja ndi chigomezgu kuti mungafiska kukunthiyapu mayeseru ngengosi?
FUFUZANI
Wonani mo mubali munyaki wachinyamata wakonkhoske mo Yehova wangumuwovye kuti wakunthiyepu pa nyengu yo wenga mujeri chifukwa cha kukana kuchitaku vandali.
Wonani vo vinguwovya banja linyaki kuti lilutirizgi kuteŵete Yehova mwakugomezgeka kwa vyaka vinandi chinanga kuti lasuskikanga.
Wonani mo mungajaliya achiganga asani mutombozgeka.
“Munozgekiyengi Kutombozgeka Kweche Sonu” (Chigongwi cha Alinda, July 2019)
Kumbi titenere kuchita wuli asani tisuskika ndi ŵanthu a mubanja lidu, nanga tingamalana nangu wuli masuzgu ngo ngaŵapu chifukwa cha kususkika ndi ŵanthu ŵenaŵa?
“Uneneska Uzisa ‘Chimangu Cha Kweni Lipanga’” (Chigongwi cha Alinda, October 2017)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
