Musinthengisinthengi nthazi ya mazu. Mukwezengi nthazi ya mazu asani mukhumba kulongo fundu zikuluzikulu ndipuso kuchiska akuvwisiya. Muchitengi so venivi asani muŵerenga Malemba ngo nge ndi uthenga wacheruzgu. Kweni musisengi nthazi ya mazu nginu asani muŵerenga nkhani yakuchitiska mantha, yakufipiska mtima pamwenga asani mukhumba kuti akuvwisiya aje ndi mtima wakukhumba kuvwa vinandi.

Musinthengisinthengi kavwikiru ka mazu nginu. Kwezani kavwikiru ka mazu nginu kuti mukambi nkhani ndi mtima wosi pamwenga asani mukhumba kukamba ukulu wa chinthu, utali wa po chinthu chili pamwenga kutalika kwa mtunda. Kweni musisengi kavwikiru ka mazu nginu asani nkhani yinu nja chitima pamwenga njakufipiska mtima.

Musinthengisinthengi mazu. Mwakuyeruzgiyapu, mungakamba mwakuthaŵiriya pamwenga mwakuzikira. Mukambengi mwakuthaŵiriya asani mukamba vinthu vakukondwesa. Ndipu mukambengi mwakuzikira asani mutamba kukamba fundu zikuluzikulu.