MUTU 17
“Wakambiskananga Nawu Kutuliya mu Malemba”
Vo vingatiwovya kuti tisambizengi ŵanthu mwakuŵafika pamtima nge mo ŵanthu a ku Bereya achitiyanga
Nkhani iyi yatuliya pa Machitidu 17:1-15
1, 2. Kumbi mbayani wo ŵenga pa ulendu wakuluta ku Tesalonika kutuwa ku Filipi, nanga aŵanaŵananganji?
AKASWIRI a ku Roma angupanga msewu wamampha ukongwa wo wajumphanga mumapiri. Nyengu zinyaki mumsewu uwu mwavwikanga viwawa va mahachi, matayala nga magaleta kweniso viwawa vakupambanapambana nge miswayu ya asilikali, a malonda kweniso amisili akupambanapambana. Anthulumi atatu, Paulo, Sila ndi Timote ŵenga pa ulendu wa makilomita ngakujumpha 130 kutuwa ku Filipi kuluta ku Tesalonika ndipu ajumphanga mumsewu wenuwu. Ulendu uwu wenga wakufyo ukongwa kwaku Paulo ndi Sila. Tikamba viyo chifukwa ŵenga ŵeche ndi vilonda vo angukhwapika ku Filipi.—Machi. 16:22, 23.
2 Kumbi ntchinthu wuli cho chinguwovya anthulumi yaŵa kukunthiyapu ulendu utali wenuwu? Kukambiskana ndiku kunguŵawovya. Yiwu angulutirizga kuŵanaŵaniya vinthu vamampha vo vinguchitikiya mulonda wa jeri ku Filipi, kweniso mo ŵanthu a mubanja laki angujaliya Akhristu. Venivi vinguŵawovya kuti aleki kuwere vuli kweni alutirizgi kupharazga mazu ngaku Chiuta. Kweni ŵe pafupi kufika ku Tesalonika, panyaki ajifumbanga asani Ayuda a mutawuni yeniyi aŵalonderiyengi umampha. Yiwu atenere kuti ajifumbanga kuti: Kumbi atiyukiyengi pamwenga kutipuma nge po anguchitiya ku Filipi?
3. Kumbi chakuwoniyapu chaku Paulo chingatiwovya wuli kuti tije ndi chiganga asani tipharazga?
3 Pavuli paki, Paulo wangulemba vo waŵanaŵananga pa ulendu uwu mukalata yo wangulembe Akhristu a ku Tesalonika. Iyu wangulemba kuti: “Chinanga kuti pakwamba tingusuzgika ukongwa ndipu angutichitiya chipongu ku Filipi nge mo muziŵiya, tinguchita chiganga chifukwa chaku Chiuta widu kuti tikukambiyeni uthenga wamampha waku Chiuta ndipu tinguchita ivi tichisuskika ukongwa.” (1 Ate. 2:2) Viwoneka kuti Paulo wachitanga mantha kusere mutawuni ya Tesalonika chifukwa chakuŵanaŵaniya ukongwa vo vingumuchitikiya ku Filipi. Kumbi muŵanaŵana kuti Paulo wavwanga wuli? Kumbi namwi muchita mantha kupharazga uthenga wamampha? Paulo wathembanga Yehova kuti wamupaski nthazi kweniso kuti wamuwovyi kuja ndi chiganga. Chakuwoniyapu chaku Paulo chingatiwovya kuti tichitengi vinthu nge mo iyu wachitiyanga.—1 Akori. 4:16.
“Wakambiskananga Nawu Kutuliya mu Malemba” (Machitidu 17:1-3)
4. Ntchinthu wuli cho chilongo kuti Paulo wangujaku masabata ngatatu pe cha ku Tesalonika?
4 Nkhani iyi yikamba kuti pa nyengu yo Paulo wenga ku Tesalonika, wapharazganga musinagogi pa Sabata peposi kwa masabata ngatatu. Kumbi venivi ving’anamuwa kuti Paulo wanguja mutawuni yeniyi kwa masabata ngatatu pe? Awa. Tiziŵa cha utali wa nyengu yo Paulo wangujaliya kwenuku wechendayambi kuluta ku Sinagogi. Makalata ngaku Paulo ngalongo so kuti pa nyengu yo iyu ndi anyaki ŵenga ku Tesalonika, agwiranga ntchitu yakuŵawovya kusaniya vinthu vakukhumbikiya pa umoyu. (1 Ate. 2:9; 2 Ate. 3:7, 8) Kweniso pa nyengu yo Paulo wajanga mutawuni yeniyi wangulonde chovyu kutuliya kwa abali aku Filipi kaŵi kosi. (Afi. 4:16) Mwaviyo, venivi vilongo kuti Paulo wangujaku masabata ngatatu pe cha ku Tesalonika kweni watenere kuti wangujaku kwa nyengu yitali.
5. Kumbi Paulo wanguchita wuli kuti waŵafiki pamtima ŵanthu?
5 Paulo wati wamalana ndi mantha ngo wenga nangu ndi kuja ndi chiganga, wangupharazgiya ŵanthu wo awungananga musinagogi. Nge mo wachitiyanga nyengu zosi, Paulo “wakambiskananga nawu kutuliya mu Malemba. Iyu wakonkhoskanga ndi kupereka ukaboni wakulembeka kuti penga pakwenere kuti Khristu wasuzgiki kweniso wayuskiki ku nyifwa. Waŵakambiyanga kuti: ‘Yesu mwenuyu ndiyu Khristu yo nditikupharazgiyani vakukwaskana ndi iyu.’” (Machi. 17:2, 3) Wonani kuti Paulo wakhumbanga kuŵakopa waka cha, mumalu mwaki walongoronga nawu mwakuŵafika pamtima. Iyu waziŵanga kuti ŵanthu wo alutanga ku sinagogi, angaziŵanga Malemba ndipuso angatumbikanga. Kweni suzgu lenga lakuti angavwisisanga cha. Mwaviyo, Paulo wangukambiskana nawu fundu za mu Malemba mwakuŵakonkhoske kweniso kupereka maukaboni ngakuti Yesu waku Nazareti wenga Mesiya wakulayizgika pamwenga kuti Khristu.
6. Kumbi Yesu wangungagwiriskiya wuli ntchitu Malemba, nanga ntchinthu wuli cho chinguchitika?
6 Paulo wangutole chakuwoniyapu chaku Yesu yo wagwiriskiyanga ntchitu fundu za mu Malemba pakusambiza. Mwakuyeruzgiyapu pa nyengu ya uteŵeti waki, Yesu wangukambiya akusambira ŵaki kuti mwakukoliyana ndi vo Malemba ngakamba, Mwana wa munthu watenere kutombozgeka, kubayika kweniso kuyuskika. (Mate. 16:21) Yesu wati wayuskika wanguwoneke kwa akusambira ŵaki. Wenuwu wenga ukaboni wakuti vo wanguŵakambiya venga nadi vauneneska. Chinanga kuti venga viyo, Yesu wanguŵachitiya so vinandi. Bayibolu likamba vo wanguchitiya akusambira anyaki kuti: “Wangwamba kuŵakonkhoske vinthu vakukwaskana ndi iyu kutuliya mu Malemba ngosi, kwambiya vo Mozesi wakulemba mpaka vosi vo achimi akulemba.” Kumbi ntchinthu wuli cho chinguchitika? Akusambira angukamba kuti: “Asi mitima yidu yakoliyanga nge motu wachikambiskana nasi ndipuso wachitijuliya Malemba munthowa?”—Luka 24:13, 27, 32
7. Ntchifukwa wuli tikhumbika kugwiriskiya ntchitu fundu za mu Malemba pakusambiza?
7 Uthenga wa mu Mazu ngaku Chiuta ngwanthazi. (Ahe. 4:12) Mazuŵa nganu, Akhristu agwiriskiya ntchitu Mazu ngenanga pakusambiza nge mo Yesu, Paulo ndi akutumika anyaki achitiyanga. Tikonkhoske ŵanthu vo Malemba ngang’anamuwa ndipu titiŵaŵerenge Bayibolu kuti tiŵalongo ukaboni wa vo tisambiza. Ndipu kuluska vosi uthenga wo tipharazga ngwidu cha. Asani tigwiriskiya ntchitu Bayibolu, titovya ŵanthu kuziŵa kuti vo tipharazga ndi maŵanaŵanu ngidu cha kweni ndi Mazu ngaku Chiuta. Titenere kukumbuka kuti uthenga wo tipharazga ngwidu cha kweni ndi Mazu ngaku Chiuta ndipu ngakuthembeka. Kumbi kuziŵa fundu zenizi kutikuwovyani kuti mupharazgengi mwachiganga nge mo Paulo wanguchitiya?
“Anyaki” Anguja Akusambira (Machitidu 17:4-9)
8-10. (a) Kumbi ŵanthu a ku Tesalonika anguchitanji ŵati ŵavwa uthenga wamampha? (b) Ntchifukwa wuli Ayuda anyaki angumuchitiya sanji Paulo? (c) Kumbi Ayuda wo angususka uthenga wamampha anguchita wuli?
8 Paulo wanguwona kuti vo Yesu wangukamba venga vauneneska. Yesu wangukamba kuti: “Kapolu ndi mura cha kuluska mbuyaki. Asani atombozga ini, namwi azakukutombozgani. Kweniso asani asunga mazu ngangu, azamusunga so mazu nginu.” (Yoha. 15:20) Pa nyengu yo Paulo wenga ku Tesalonika wangukumana ndi ŵanthu amitundu yakupambanapambana. Anyaki ŵenga ndi mtima wakukhumbisiska kuvwisiya uthenga wamampha po anyaki asuskanga. Luka wangukonkhoska za ŵanthu wo ŵenga ndi mtima wakukhumbisiska kuvwisiya kuti: ‘Anyaki mwa Ayuda anguja akusambira pamwenga kuti Akhristu ndipu angukoliyana ndi Paulo kweniso Sila. Ndipu Agiriki anandi wo asopanga Chiuta limoza ndi anthukazi anandiku akuzirwa, nawu anguchita so viyo.’ (Machi. 17:4) Mphakuvwika kuti akusambira asonu ŵenaŵa angukondwa ukongwa chifukwa cha kungavwisa umampha Malemba.
9 Chinanga kuti anyaki awonganga chifukwa cha vo Paulo wasambizanga kweni anyaki angukwiya ukongwa. Ayuda anyaki ku Tesalonika anguchita sanji chifukwa chakuti Paulo wangupharazgiya “Agiriki anandi wo anguzomera uthenga waki.” Ayuda akhumbanga kuti Agiriki asere muchisopa chawu. Yiwu aŵasambizanga fundu za mu Malemba nga Chiheberi ndipu awonanga kuti Agiriki mbawu. Kweni pechendajumphi nyengu yitali, Paulo wangwamba kukopa Agiriki kuti aleki kulondo visambizu va Chiyuda ndipu wachitanga venivi musinagogi. Kanthu kenaka kanguŵapweteka ukongwa Ayuda.
“Yiwu . . . apenjanga kutole Paulo ndi Sila ku gulu la ŵanthu a viwawa.”—Machitidu 17:5
10 Luka wangukonkhoska vo vinguchitika pavuli paki kuti: “Ayuda anguchita sanji, anguwunganisa ŵanthu ankharu yabwekabweka wo ayinganga ŵaka mumsika ndipu angupanga gulu la ŵanthu a viwawa ndi kwambisa vivulupi mutawuni yo. Yiwu anguyukiya nyumba yaku Yasoni, ndipu apenjanga kutole Paulo ndi Sila ku gulu la ŵanthu a viwawa. Ŵati awona kuti atondeka kuŵasaniya, anguko Yasoni ndi abali anyaki ndipu anguluta nawu kwa alongozgi atawuni. Yiwu adanirizanga kuti: ‘Ŵanthu wo atimbanyizga ŵanthu pacharu chosi chapasi asanirika so kunu, ndipu Yasoni waŵalonde kuja alendu ŵaki. Ŵanthu wosi ŵenaŵa asuskana ndi dangu laku Kayisara ndipu akamba kuti kwe fumu yinyaki so, Yesu.’” (Machi. 17:5-7) Kumbi ntchinthu wuli cho Paulo ndi anyaki anguchita gulu la ŵanthu a viwawa lati laŵayukiya?
11. Kumbi Ayuda angumumba mulandu wuli Paulo ndi anyaki wo wapharazgiyanga nawu limoza uthenga wa Ufumu, nanga aŵanaŵaniyanga ukongwa dangu nili? (Wonani mazu ngamumphata.)
11 Ŵanthu wo achita viwawa achitiska kuti vinthu visuzgi ukongwa. Yiwu achita vinthu nge msinji wo watola chifukwa ukoleka cha. Venivi ndivu Ayuda anguchita pakumalana ndi Paulo kweniso Sila. Ayuda ŵati ‘ayambisa vivulupi’ mutawuni yeniyi angukambiya akulamuliya kuti Paulo ndi Sila apalamula milandu yikulu ukongwa. Chinanga kuti Paulo ndi anyaki ndiwu cha wo angwambisa vivulupi ku Tesalonika, kweni mulandu wakwamba wo amumbanga Paulo ndi anyaki wo wapharazgiyanga nawu limoza wenga wakuti “atimbanyiza ŵanthu pacharu chosi chapasi!” Mulandu wachiŵi ndiwu wenga wakofya ukongwa. Ayuda angukamba kuti amishonale yaŵa apharazganga so kuti kwe Fumu yinyaki, Yesu, ko kwenga kuswa dangu la Aroma. a
12. Kumbi ndi vinthu wuli vo vilongo kuti Akhristu a ku Tesalonika atingi akumanengi ndi masuzgu ngakulu?
12 Kumbukani kuti alongozgi avisopa angumumba so mulandu wenuwu Yesu. Yiwu angukambiya Pilato kuti: “Munthu uyu, tamusaniya kuti watimbanyizga charu chidu . . . ndipuso wakamba kuti iyu ndi Khristu fumu.” (Luka 23:2) Viwoneka kuti Pilato wangulamula kuti Yesu wabayiki chifukwa chakopa kuti fumu ya Aroma yingakamba kuti walekere ŵanthu akuyukiya boma. Chifukwa cha milandu yeniyi Akhristu a ku Tesalonika nawu atingi akumanengi ndi masuzgu ngakulu. Buku linyaki likamba kuti: “Venga vakusuzga ukongwa ‘asani munthu waziŵika kuti wambika mulandu wakuyukiya ŵaraŵara a boma la Roma chifukwa kanandi wabayikanga.’” Kumbi vilatu va ŵanthu akuyukiya ŵenaŵa vingufiskika?
13, 14. (a) Ntchifukwa wuli ŵanthu a kuyukiya angutondeka kumika ntchitu yakupharazga? (b) Kumbi Paulo wanguchita wuli vinthu mwakuphwere nge Khristu, nanga tingamuyezga wuli?
13 Ŵanthu akuyukiya angutondeka kumika ntchitu yakupharazga ku Tesalonika. Chifukwa wuli? Chifukwa chakwamba ntchakuti angutondeka kusaniya Paulo ndi Sila. Kusazgiyapu yapa akulamuliya a mutawuni iyi ŵengavi ukaboni weneku wakuti mulandu wo ambanga ŵanthu yaŵa wenga nadi wauneneska. “Ŵati alipira ndalama zo anguŵatchaja,” Yasoni ndi anyaki angutuzgika mujeri. (Machi. 17:8, 9) Kulondo ulongozgi waku Yesu wakuti “jani akuchenje nge njoka kweni akuchita vinthu mwauneneska nge nkhunda,” ndiku kungumuwovya Paulo kuti waleki kuŵika umoyu waki pangozi mwakuti wangutuwaku ko wenga ndi kuchilutirizga kuchipharazga kumalu nganyaki. (Mate. 10:16) Yapa, viwoneke limu kuti Paulo wenga ndi chiganga kweni wanguchita vinthu mwazeru. Kumbi Akhristu mazuŵa nganu angayezga wuli chakuwoniyapu chaku Paulo?
14 Mazuŵa nganu, alongozgi avisopa achiska ŵanthu kuti ayukiyengi Akaboni aku Yehova. Vinthu vaboza vo ŵanthu akamba vichitiska kuti boma litombozgengi Akaboni. Nge mo venge ndi Akhristu akwambiriya, mazuŵa nganu ŵanthu anandi ayukiya Akaboni chifukwa chakuŵachitiya sanji. Akhristu auneneska nawu atesesa kuchita vinthu vo vingaŵawovya kuti aleki kukumana ndi masuzgu. Titesesa kuleka kulimbana ndi ŵanthu wo atanja kukwiya kweniso aleka kuvwa va anyawu, mumalu mwaki tilutirizga kugwira ntchitu yidu mwachimangu kuti asani vinthu vazija umampha tiziweriyeku so.
“Ŵenga ndi Maŵanaŵanu Ngamampha” (Machitidu 17:10-15)
15. Kumbi ŵanthu a ku Bereya anguchitanji ŵati alonde uthenga wamampha?
15 Kuti Paulo ndi Sila avikiliriki, anguŵatumiza ku Bereya ndipu angwenda ulendu wa makilomita pafufupi 65. Ŵati afika waka kwenuku, Paulo wanguluta musinagogi ndipu wangwamba kukambiskana ndi ŵanthu wo anguwungana mwenimo. Paulo wangukondwa ukongwa chifukwa ŵanthu yaŵa ŵenga ndi mtima wakukhumba kuvwisiya! Luka wangulemba kuti Ayuda a ku Bereya “ŵenga ndi maŵanaŵanu ngamampha kuluska a ku Tesalonika, pakuti yiwu angulonde mazu mwakukhumbisiska ndipuso afufuzanga Malemba mwakuphwere zuŵa lelosi kuti asimikizi asani vinthu venivi venga nadi viyo.” (Machi. 17:10, 11) Kumbi mazu ngenanga ngalongo kuti ŵanthu a ku Tesalonika ŵengavi mtima wakukhumba kuvwisiya? Awa. Tikamba viyo chifukwa pati pajumpha nyengu Paulo wanguŵalembe kuti: “Titimuwonga nadi Chiuta mwambula kulekeza, pakuti mwati mwalonde mazu ngaku Chiuta ngo munguvwa kwaku isi, mungungalonde nge kuti ndi mazu nga ŵanthu cha, kweni nge mazu ngaku Chiuta, ndipu ndimu ngaliri nadi. Mazu ngenanga ngagwira so ntchitu mwaku yimwi akugomezga.” (1 Ate. 2:13) Kumbi ntchinthu wuli cho chinguchitiska Ayuda a ku Bereya kuti aje ndi maŵanaŵanu ngamampha?
16. Ntchifukwa wuli ŵanthu a ku Bereya akonkhoskeka kuti ŵenga ndi “maŵanaŵanu ngamampha”?
16 Chinanga kuti ŵanthu a ku Bereya kenga kakwamba kuvwa uthenga wamampha kweni anguwukayikiya cha pamwenga kususka, mumalu mwaki anguwugomezga. Chakwamba, yiwu anguvwisiya mwakuphwere vo Paulo waŵakambiyanga. Pavuli paki, aweliyangamu vo asambira kutuliya mu Malemba kuti asimikizi kuti vo Paulo waŵakambiyanga venga nadi vauneneska. Zuŵa lelosi asambiranga Mazu ngaku Chiuta ndipu asambiranga pa Sabata pe cha. Yiwu afufuzanga mu Malemba fundu zasonu zo asambira kuti asimikizi kuti vo asambiranga venga nadi vauneneska. Pavuli paki, yiwu angulongo kujiyuyuwa ndipu angusintha mwakuti “anandi aku yiwu anguja akusambira.” (Machi. 17:12) Mphakuvwika kuti Luka wangukamba kuti ŵanthu ŵenaŵa ŵenga ndi “maŵanaŵanu ngamampha”!
17. Ntchifukwa wuli chakuwoniyapu cha ŵanthu a ku Bereya ntchamampha ukongwa, nanga isi tingalutirizga wuli kuŵayezga chinanga kuti taja nyengu yitali mu uneneska?
17 Ŵanthu a ku Bereya aziŵanga cha kuti vo anguchita pakulonde uthenga wamampha vazamulembeka mu Mazu ngaku Chiuta kuti chije chakuwoniyapu chamampha kwaku isi mazuŵa nganu. Yiwu anguchita vo Yehova Chiuta wakhumbanga kuti achiti kweniso vo Paulo walindizganga kuti vichitikengi. Mwakuyanana waka, nasi tichiska ŵanthu kuti asambirengi Bayibolu mwakuphwere kuti agomezgengi kuti vo asambira vituliya nadi mu Mazu ngaku Chiuta. Asani taja akusambira, kumbi tikhumbika kuleka kuja ndi maŵanaŵanu ngamampha? Awa, mumalu mwaki tikhumbika kuyesesa kuja ndi mtima wakukhumbisiska kusambira vakukwaskana ndi Yehova kweniso kugwiriskiya ntchitu mwaliŵi vo tasambira. Mwaviyo, tikhumbika kuzomereza Yehova kuti watiwumbi kweniso kutisambiza mwakukoliyana ndi khumbu laki. (Yesa. 64:8) Venivi vichitiskengi kuti Awusefwi akuchanya alutirizgi kutigwiriskiya ntchitu kweniso kukondwa nasi.
18, 19. (a) Ntchifukwa wuli Paulo wangutuwaku ku Bereya, nanga phamphu lo wenga nalu pakupharazga tingaliyezga wuli? (b) Kumbi Paulo wakhumbikanga kupharazgiya ayani kweniso nunkhu?
18 Paulo wangujaku kwa nyengu yitali cha ku Bereya chifukwa Malemba ngakamba kuti: “Ayuda a ku Tesalonika ŵati aziŵa kuti Paulo wapharazga so mazu ngaku Chiuta ku Bereya, anguluta kweniko kuti akayambisi vivulupi ndi kuchitiska chigulu cha ŵanthu kuti chiŵayukiyi. Nyengu yeniyo, abali angutumiza Paulo kunyanja, kweni Sila ndi Timote angujaliya kweniko. Kweni abali wo ŵenga ndi Paulo angwenda nayu mpaka ku Atene ndipu angumusiya ŵati apempheka kuti Sila ndi Timote azi liŵiliŵi kwaku Paulo.” (Machi. 17:13-15) Arwani a uthenga wamampha ŵenga ndi chitatata ukongwa! Yiwu anguthera cha ndi vo anguchita pakudikisa Paulo ku Tesalonika mwakuti anguluta so ku Bereya kuti akayambisi viwawa nge mo anguchitiya ku Tesalonika, kweni vo akhumbanga kuchita vingutondeka. Paulo waziŵanga kuti chigaŵa cho wakhumbanga kupharazgaku chenga chikulu, mwaviyo wangutuwaku ndipu wanguluta kuchigaŵa chinyaki. Mazuŵa nganu, nasi tikhumbika kuyesesa kuti vakuchita va ŵanthu wo akhumba kulekesa ntchitu yakupharazga vileki kufiskika!
19 Paulo wati wachitiya ukaboni mwakukwana kwa Ayuda a ku Tesalonika ndipuso ku Bereya, iyu wangusambira mo wangajaliya ndi chiganga pakupharazga kweniso mo wangakonkhoske ŵanthu fundu za mu Malemba. Nasi tingasambira vinandi kwaku yiwu. Yapa, Paulo wakhumbikanga so kupharazgiya ŵanthu amitundu yinyaki ku Atene. Kumbi vinthu vingumuyende wuli mutawuni yeniyi? Tikambiskanengi venivi mu mutu 18.
a Kaswiri munyaki wangukamba kuti pa nyengu yo penga dangu laku Kayisara, lo lamuzomerezanga cha munthu weyosi kuti wakambengi kuti “kuzengi fumu yinyaki pamwenga ufumu wo wazamutuzgapu pamwenga kuthereska ufumu wa Aroma wo walamuliyanga pa nyengu yeniyo.” Arwani aku Paulo angukamba vinthu vaboza vakukwaskana ndi uthenga wo akutumika apharazganga kuti viwoneki kuti atuswa dangu lenili. Wonani Bokosi lakuti, “ Kayisara Kweniso vo ve Mubuku la Machitidu,” papeji 137.
