MUTU 6
‘Chiuta Wangumulongo Wezi Stefano Kweniso Wangumupaska Nthazi’
Mo tingapharazgiya mwachiganga nge mo Stefano wanguchitiya mukhoti la Sanihedirini
Nkhani iyi yatuliya pa Machitidu 6:8–8:3
1-3. (a) Kumbi ndi vinthu vakuchitiska mantha nivi vo Stefano wangukumana navu, kweni wanguchita wuli? (b) Kumbi tikambiskanengi mafumbu nanga?
STEFANO wanguma mukhoti la Sanihedirini pakati pa akweruzga 71 wo anguja mwakumuzunguliya kuti ayeruzgi mulandu waki. Khoti lenili lenga lakutowa ukongwa ndipu viwoneka kuti lenga kufupi ndi nyumba yakusopiyamu ku Yerusalemu. Akweruzga ŵenaŵa ŵenga anthazi, akutchuka ndipu anandi mwaku yiwu amutinkhanga ukongwa Stefano yo wenga wakusambira waku Yesu. Chinthu chakufipiska so mtima chenga chakuti, Kayafa Wasembi Mura, yo wangulongozga khoti la Sanihedirini pa nyengu iyi, ndiyu so wangulongozga khoti ili pa nyengu yo linguyeruzga kuti Yesu Khristu wabayiki. Yapa ndipu pajumpha waka myezi yimanavi. Kumbi Stefano wanguchita mantha?
2 Pa nyengu iyi chisku chaku Stefano chinguwoneka mwakuziziswa. Akweruzga ŵati amulereska, anguwona kuti chisku chaki “chiwoneka nge chisku cha mungelu.” (Machi. 6:15) Angelu apharazga uthenga wakutuliya kwaku Yehova Chiuta ndichu chifukwa chaki akhumbika cha kuchita mantha kweniso akhumbika kuchita vinthu mwachimangu. Mwenumu ndimu so Stefano nayu wavwiyanga, ndipu chinanga mbakweruzga wo amutinkhanga ukongwa angujiwone ŵija venivi. Ntchifukwa wuli iyu wanguchita mantha cha?
3 Fumbu lenili lingatisambiza vinandi isi Akhristu mazuŵa nganu. Kweniso tikhumbika kuziŵa chifukwa cho Stefano angumumangiya. Kumbi wanguchitapu vinthu wuli kuti walongo kuti we ndi chivwanu chakukho wechendamangiki? Nanga tingamuyezga wuli?
‘Anguchitiska Kuti Ŵanthu Amuko’ (Machitidu 6:8-15)
4, 5. (a) Ntchifukwa wuli tingakamba kuti Stefano wenga wakusambira wakugomezgeka ukongwa mumpingu? (b) Kumbi ‘Chiuta wangumulongo wuli wezi kweniso kumupaska nthazi’ Stefano?
4 Tawona kali kuti Stefano wenga wakusambira wakugomezgeka ukongwa mumpingu wachikhristu wo ungwamba waka sonu. Nge mo tinguwone mu Mutu 5, iyu wenga mugulu la anthulumi 7 akujiyuyuwa wo angujipereka kuti awovyi akutumika pa ntchitu yakupereka chovyu kwa Akhristu anyawu. Kweniso tiwona kuti munthu uyu wenga wakujiyuyuwa nadi asani tiŵanaŵaniya mo Chiuta wangumutumbikiya. Mwakuyeruzgiyapu, pa Machitidu 6:8, tiŵerenga kuti iyu “wachitanga vakuziziswa vikulu ndi visimikizu” nge mo anyaki mwa akutumika achitiyanga. Lemba ili likamba so kuti, “Chiuta wangumulongo wezi kweniso wangumupaska nthazi.” Kumbi venivi ving’anamuwanji?
5 Mazu nga Chigiriki ngakuti “wangumulongo wezi” ngangafwatulika so kuti “lisungu.” Viwoneke limu kuti Stefano wachitanga vinthu mwalisungu ndi ŵanthu kweniso wenga wakufwasa. Venivi vachitiskanga kuti ŵanthu amuyanjengi ukongwa. Iyu walongoronga mwalusu kuti wakopi ŵanthu wo amuvwisiyanga kuti aziŵi kuti vo waŵasambizanga venga vauneneska kweniso kuti vingaŵawovya. Chifukwa chakuti wenga wakujiyuyuwa, wanguzomereza kulongozgeka ndi mzimu waku Yehova, ndipu mzimu wenuwu wagwiranga nadi ntchitu mwaku iyu kweniso ungumupaska nthazi. Mumalu mwa kujikuzga chifukwa cha mphasu ndipuso malusu ngo wenga nangu, iyu wakankhuskanga Yehova kweniso waŵanaŵaniyanga ŵanthu wo waŵapharazgiyanga. Ndichu chifukwa chaki ŵanthu akususka alimbananga nayu!
6-8. (a) Kumbi ŵanthu akususka angumumba mulandu wakuti wanangisa vinthu viŵi nivi Stefano, nanga ntchifukwa wuli? (b) Kumbi chakuwoniyapu chaku Stefano chingaŵawovya wuli Akhristu mazuŵa nganu?
6 Ŵanthu anandi anguza kuti azisuskani ndi Stefano, “kweni angutondeka kususkana ndi zeru kweniso mzimu wo wamuchitiskanga kuti walongorongi.” a Ŵati amala zeru, “angunyengere ŵanthu mwachisisi” kuti apereki ukaboni waboza wakususkana ndi Mkhristu wambula kunanga mwenuyu. “Yiwu anguchitiska kuti ŵanthu, ŵara kweniso alembi,” amuko Stefano mwakumuchichizga ndi kuluta nayu kukhoti la Sanihedirini. (Machi. 6:9-12) Ŵanthu akususka ŵenaŵa angumumba mulandu wakuti wanangisa vinthu viŵi: Yiwu angukamba kuti wanyoza Chiuta ndipuso Mozesi. Munthowa wuli?
7 Akaboni aboza akambanga kuti Stefano wanyoza Chiuta chifukwa wakambanga vinthu viheni vakukwaskana ndi “malu ngakupaturika,” yo ndi nyumba yakusopiyamu ya ku Yerusalemu. (Machi. 6:13) Akambanga so kuti wanyoza Mozesi, chifukwa wakambanga vinthu viheni vakukwaskana ndi Dangu laku Mozesi, kung’anamuwa kuti wasinthanga marangu ngo nganguperekeka ndi Mozesi. Wenuwu wenga mulandu ukulu chifukwa pa nyengu iyi Ayuda ayitumbikanga ukongwa nyumba yakusopiyamu kweniso Dangu laku Mozesi kusazgapu so marangu nganyaki nganandi ngo yiwu angusazgiyamu mu Dangu lenili. Mwaviyo, Stefano amuwonanga kuti ndi munthu wakofya ukongwa yo watenere kubayika chifukwa cha mulandu wenuwu!
8 Chakuchitisa chitima ntchakuti mazuŵa nganu napu, alongozgi a visopa agwiriskiya ntchitu maboza kuti ateŵeti aku Chiuta akumanengi ndi masuzgu. Nyengu zinyaki yiwu achitiska so kuti alongozgi a ndali atombozgengi Akaboni aku Yehova. Kumbi tikhumbika kuchitanji asani ŵanthu atitipusikiziya pamwenga kutimba milandu yaboza? Tingasambira vinandi kwaku Stefano.
Kuchitiya Ukaboni Mwachiganga Vakukwaskana ndi “Chiuta Waunkhankhu” (Machitidu 7:1-53)
9, 10. Kumbi ŵanthu akususka akambanji vakukwaskana ndi vo Stefano wangulongoro mukhoti la Sanihedirini, nanga isi titenere kukumbukanji?
9 Nge mo takonkhoske kukwamba kwa mutu uwu, chisku chaku Stefano chawonekanga chambula mantha pamwenga kuti nge mungelu wachivwisiya mulandu wo amumbanga. Kayafa wangumufumba kuti: “Kumbi venivi vauneneska?” (Machi. 7:1) Yeniyi yenga nyengu yakuti Stefano walongoro ndipu wangulongoro nadi!
10 Ŵanthu anyaki akususka akamba kuti chinanga kuti Stefano wangulongoro kwa nyengu yitali kweni wangumuka cha mulandu wo amumbanga. Kweni uneneska ngwakuti Stefano wakutilongo chakuwoniyapu chamampha ukongwa cha mo ‘tingamukiya’ ŵanthu wo asuska uthenga wamampha. (1 Petu. 3:15) Kumbukani kuti Stefano amumbanga mulandu wakunyoza Chiuta mwakukamba vinthu viheni vakukwaskana ndi nyumba yakusopiyamu kweniso kuti wanyoza Mozesi mwakukamba vinthu viheni vakukwaskana ndi Dangu. Stefano wangukonkhoska mwakudumuwa vigaŵa vitatu va mbiri ya Ayisirayeli ndipu fundu zinyaki wanguzikonkhoska mwakuvwika umampha ukongwa. Sonu tiyeni tikambiskani vigaŵa vitatu venivi chechosi pakuchija.
11, 12. (a) Kumbi Stefano wanguchigwiriskiya wuli ntchitu mwalusu chakuwoniyapu chaku Abrahamu? (b) Ntchifukwa wuli Stefano wanguzumbuwa Yosefi?
11 Nyengu ya apapi akali. (Machi. 7:1-16) Stefano wangwamba kukamba vakukwaskana ndi Abrahamu yo Ayuda amutumbikanga ukongwa chifukwa cha chivwanu chaki. Pakwamba kukonkhoska nkhani yakukhumbika yeniyi yo wosi ayiziŵanga umampha, Stefano wangudidimizga ukongwa fundu yakuti Yehova “Chiuta waunkhankhu” wanguwoneke Abrahamu kakwamba wachija ku Mesopotamiya. (Machi. 7:2) Pavuli paki, iyu wanguchija mu Charu Chakulayizgika nge mulendu. Abrahamu wengavi nyumba yakusopiyamu pamwenga Dangu laku Mozesi. Mwaviyo, penga pambula kuvwika kukamba kuti munthu wangaja cha wakugomezgeka kwaku Chiuta kwambula nyumba yakusopiyamu kweniso Dangu laku Mozesi!
12 Ŵanthu wo amuvwisiyanga Stefano wachilongoro, amutumbikanga so ukongwa Yosefi yo wenga mphapu yaku Abrahamu. Kweni Stefano wanguŵakumbusa kuti abali ŵaki chayiwu aku Yosefi, wo ŵenga so apapi a mafuku nga Isirayeli angumutombozga munthu murunji mwenuyu ndipu angumugulisa ku ukapolu. Kweni Chiuta wangugwiriskiya ntchitu Yosefi mwenuyu kuti wataski Ayisirayeli kuti aleki kufwa ndi nja. Tikayika cha kuti Stefano wanguwona kuti penga kuyanana pakati paku Yosefi ndi Yesu Khristu, kweni wangukhumba cha kutolo fundu yeniyi kuti ŵanthu wo amuvwisiyanga aleki kumuvundukiya.
13. Kumbi vo Stefano wangukonkhoska vakukwaskana ndi Mozesi vingumuka wuli mulandu waki, nanga venivi vingutolo fundu niyi?
13 Nyengu yaku Mozesi. (Machi. 7:17-43) Stefano wangukonkhoska fundu zinandi zakukwaskana ndi Mozesi. Iyu wanguchita umampha chifukwa anandi mwa ŵanthu wo ŵenga mukhoti la Sanihedirini ŵenga Asaduki wo akananga kugomezga mabuku nganyaki ngosi nga mu Bayibolu kupatuwaku ngo ngangulembeka ndi Mozesi pe. Kumbukani so kuti Stefano wambikanga mulandu wakuti wanyoza Mozesi. Mwaviyo, vo Stefano wangukonkhoska vingumuka umampha mulandu wo amumbanga chifukwa vingulongo kuti wamutumbikanga ukongwa Mozesi kweniso Dangu. (Machi. 7:38) Iyu wangukamba kuti Mozesi nayu angumukana ŵanthu wo wakhumbanga kuŵataska. Yiwu angumukana pa nyengu yo wenga ndi vyaka 40. Kweniso pati pajumpha vyaka vakujumpha 40, ŵanthu angulimbana nayu kananandi waka po waŵalongozganga. b Mwaviyo, yapa sonu Stefano wangwamba kutolo fundu yaki yikulu kamanakamana. Fundu yaki yenga yakuti: Ŵanthu aku Chiuta anguŵakana mwakuwerezawereza ŵanthu wo Yehova wangusankha kuti aŵalongozgengi.
14. Kumbi Stefano wanguvumbuwa fundu zinyaki nizi mwakugwiriskiya ntchitu nkhani yaku Mozesi?
14 Stefano wanguŵakumbusa so ŵanthu wo amuvwisiyanga kuti Mozesi wangukambiya limu kuti mu Isirayeli mwazamuyuka mchimi wa nge iyu. Kumbi mchimi mwenuyu wenga yani, nanga ŵanthu atingi amulonderiyengi wuli? Stefano wangumuka mafumbu ngenanga kukumaliya. Iyu wangukamba so fundu yinyaki yakukhumbika yakuti: Mozesi wangusambira kuti Chiuta wangasambusa malu ngengosi kuti ngaje ngakupaturika nge mo venge ndi malu ngo penga chivwati cho chalilimanga motu po Yehova wakambiskananga nayu. Sonu kumbi penapa ŵanthu akhumbika kusopa Yehova munyumba yimoza pe yakusopiyamu nge yo yenga ku Yerusalemu? Tiyeni tiwoni.
15, 16. (a) Ntchifukwa wuli chihema nachu chenga chakukhumbika pa vinthu vo Stefano wangukonkhoska? (b) Kumbi Stefano wanguyigwiriskiya wuli ntchitu nyumba yakusopiyamu yaku Solomoni wachikonkhoska?
15 Chihema kweniso nyumba yakusopiyamu. (Machi. 7:44-50) Stefano wangukumbusa khoti ili kuti ku Yerusalemu kwechendazengeki nyumba yeyosi yakusopiyamu, Chiuta wangukambiya Mozesi kuti wapangi chihema chakusopiyamu cho ayendanga nachu. Pakuti Mozesi nayu wasopiyanga muchihema chenichi, palivi yo watingi wakambengi kuti nyumba yakusopiyamu yenga yakukhumbika ukongwa kuphara chihema.
16 Pavuli paki, Solomoni wati wazenga nyumba yakusopiyamu ku Yerusalemu, Chiuta wangumuwovya kuti wakambi fundu yinyaki yakukhumbika ukongwa mu pempheru laki. Ndipu Stefano wangukonkhoska fundu yeniyi kuti: “Wapachanya Limu waja munyumba zakuzengeka ndi manja nga ŵanthu cha.” (Machi. 7:48; 2 Mbiri 6:18) Mbuneneska kuti Yehova wangagwiriskiya ntchitu nyumba yakusopiyamu kuti wafiski khumbu laki, kweni ivi ving’anamuwa kuti wangatondeka cha kufiska khumbu laki kwambula nyumba yeniyi. Mwaviyo, ŵanthu wo asopa Chiuta akhumbika cha kuŵanaŵana kuti angasopa Chiuta mwauneneska pijapija asani atimusope munyumba yakuzengeka ndi manja nga ŵanthu! Stefano wangudidimizga fundu yakukhumbika yeniyi mwakuko mazu nga mubuku la Yesaya ngakuti: “Yehova wakamba kuti, kuchanya ndiku kwe mpandu wangu waufumu ndipu charu chapasi ntchakukandapu maphazi ngangu. Kumbi ndi nyumba yamtundu wuli yo mungandizenge? Pamwenga nge pani malu ngangu ngakupumuliyapu? Asi janja langu ndilu likupanga vinthu vosi venivi?”—Machi. 7:49, 50; Yesa. 66:1, 2.
17. Kumbi vo Stefano wangukonkhoska (a) vingulongo wuli kuti ŵanthu wo amuvwisiyanga ŵenga ndi maŵanaŵanu ngaheni (b) vingumuka wuli mulandu waki?
17 Vo Stefano wangukonkhoska mukhoti la Sanihedirini kufika pa nyengu iyi, vinguvumbuwa pakweru kuti ŵanthu wo amumbanga mulandu ŵenga ndi maŵanaŵanu ngaheni. Iyu wangulongo kuti Yehova wangangamiya pa chinthu chimoza cha pamwenga midawuku, kweni wasinthasintha nthowa zo wagwiriskiya ntchitu kuti wafiski khumbu laki. Ŵanthu yaŵa ayitumbikanga ukongwa nyumba yakusopiyamu kweniso midawuku yo yingujalikiskika pasi pa Dangu laku Mozesi, kweni atondekanga kuvwisa chifukwa cho Chiuta wangupereke Dangu ndipuso nyumba yakusopiyamu! Mwaviyo, pa vo Stefano wangukamba, yiwu akhumbikanga kujifumba fumbu lakukhumbika lakuti: Asi kuvwiya Yehova ndiyu nthowa yamampha ukongwa yakulongore kuti titumbika Dangu ndipuso nyumba yakusopiyamu? Kukamba uneneska, vo Stefano wangukonkhoska vingumuka mulandu waki chifukwa vingulongo kuti vo iyu wachitanga venga nadi vakwenere pakuti wayesesanga kuvwiya Yehova.
18. Kumbi tingamuyezga wuli Stefano?
18 Kumbi tingasambiranji pa vo Stefano wangukonkhoska? Vo iyu wangukonkhoska vilongo kuti wangaziŵanga umampha Malemba. Mwakuyanana waka, nasi tikhumbika kufwiyapu kusambira Mazu ngaku Chiuta asani tikhumba kuti tisambizengi “umampha mazu ngauneneska.” (2 Timo. 2:15) Chakuwoniyapu chaku Stefano chititisambiza so kuti tikhumbika kulongoro mwalusu ndipuso mwalisungu ndi ŵanthu. Ŵanthu wo wakambiskananga nawu ŵenga akunonopa mtima ndipuso akali! Kweni wangufiska kukambiskana nawu kwa nyengu yitali chifukwa wakonkhoskanga vinthu vo yiwu akoliyananga navu kweniso vo avitumbikanga ukongwa. Ndipuso iyu wakambiskananga nawu mwaulemu mwakuti wadananga ŵanthu arara kuti “ada.” (Machi. 7:2) Mwakuyanana waka, nasi tikhumbika kukambiskana ndi ŵanthu uneneska wa mu Mazu ngaku Chiuta “mwakuzika kweniso ndi ulemu ukulu.”—1 Petu. 3:15.
19. Kumbi Stefano wangupereka wuli uthenga wacheruzgu chaku Yehova mwachiganga mukhoti la Sanihedirini?
19 Chinanga kuti veviyo, tingatondekanga cha kukambiyaku ŵanthu uneneska wa mu Mazu ngaku Chiuta chifukwa chakopa kuŵaguŵiska kweniso tingayeŵangapu mani cha asani tipharazga uthenga wacheruzgu. Stefano ntchakuwoniyapu chamampha ukongwa pa nkhani iyi. Kwambula kukayika, iyu wanguwona kuti akweruzga akumira mitima a khoti la Sanihedirini angusintha cha chinanga kuti iyu wangukonkhoska maukaboni nganandi. Mwaviyo, mzimu wakupaturika, ungumuwovya kuti wamalizi kulongoro ndipu wanguŵakambiya mwambula mantha kuti yiwu ŵenga nge apapi ŵawu akali wo angukana Yosefi, Mozesi ndipuso achimi wosi. (Machi. 7:51-53) Akweruzga ŵenaŵa ndiwu angubaya Mesiya yo Mozesi kweniso achimi anyaki wosi angukambiya limu kuti wazengi. Venivi vilongo kuti akweruzga yaŵa ndiwu anguswa ukongwa Dangu laku Mozesi!
“Ambuya Yesu, Londiyani Mzimu Wangu” (Machitidu 7:54–8:3)
“Sonu ŵati avwa venivi angukwiya ukongwa mumitima yawu ndipu angwamba kumukekechuliya minyu.”—Machitidu 7:54
20, 21. Kumbi khoti la Sanihedirini linguchita wuli lati lavwa mazu ngo Stefano wangukamba, nanga Yehova wangumuchiska wuli?
20 Fundu yauneneska yo Stefano wangukamba yinguŵakwiyisa ukongwa akweruzga. Yiwu angwamba kuchita vinthu mwambula ulemu ndipu angumukekechuliya minyu Stefano. Munthu wakugomezgeka mwenuyu wanguziŵiya limu kuti amuchitiyengi lisungu cha, nge mo anguchitiya ndi Ambuyaki a Yesu.
21 Stefano wakhumbikanga chiganga kuti wakunthiyepu vo vatingi vimuchitikiyengi. Ndipu tikayika cha kuti wanguchiskika ukongwa ndi chiwona cho Yehova wangumulongo pa nyengu yeniyi. Stefano wanguwona unkhankhu waku Chiuta kweniso wanguwona Yesu wama kujanja lamaryi laku Yehova! Stefano wachikonkhoska chiwona chenichi, akweruzga angujala makutu ngawu ndi manja. Chifukwa wuli? Nyengu yinyaki kuvuli, Yesu wangukambiya khoti lenili kuti iyu ndi Mesiya kweniso pambula kuswera wamukuŵa kujanja lamaryi la Awisi. (Mariko 14:62) Chiwona chaku Stefano chingulongo kuti vo Yesu wangukamba venga vauneneska. Chiwona ichi chingusimikiziya so kuti khoti la Sanihedirini ndilu lingupereka kweniso kubaya Mesiya! Mwaliŵiliŵi, akweruzga wosi angudaniriza kuti Stefano amuponyi mya. c
22, 23. Kumbi Stefano wangufwa mwakuyanana ndi Ambuyaki munthowa wuli, nanga ntchifukwa wuli Akhristu mazuŵa nganu angaŵa ndi chivwanu nge chaku Stefano?
22 Stefano wangufwa mwakuyanana ndi Ambuyaki. Iyu wangufwa we ndi chimangu chamumtima, wachigomezga ukongwa Yehova ndipuso wanguŵagowoke ŵanthu wo angumubaya. Iyu wangukamba kuti: “Ambuya Yesu, londiyani mzimu wangu.” Panyaki wangukamba ivi chifukwa wenga wechekuwona chiwona cha Mwana wa munthu we ndi Yehova. Stefano watenere kuti wangaziŵanga mazu ngakuchiska ngo Yesu wangukamba ngakuti: “Ini ndini chiyuka ndi umoyu.” (Yoha. 11:25) Pakumaliya, Stefano wangupemphera kwaku Chiuta mwakudariza kuti: “Yehova, mungaŵambanga mulandu cha chifukwa cha ubudi uwu.” Wati wakamba venivi, wangugona tulu ta nyifwa.—Machi. 7:59, 60.
23 Mwaviyo, Stefano ndiyu wenga Mkhristu wakwamba kubayika chifukwa cha chivwanu chaki. (Wonani bokosi lakuti, “ Stefano Wangubayika Chifukwa Chakuchitiya Ukaboni Wakukwaskana ndi Yesu,” papeji 48.) Kweni chakupaska chitima ntchakuti iyu ndiyu wenga wakumaliya cha. Kutuwa nyengu yeniyi mpaka mazuŵa nganu, ateŵeti aku Yehova akugomezgeka abayika ndi ŵanthu avisopa, andali ndipuso akususka. Kweni nasi te ndi chivwanu nge cho Stefano wenga nachu. Tiziŵa kuti sonu Yesu walamuliya nge Fumu ndipu wagwiriskiya ntchitu nthazi zo Awisi akumupaska. Palivi cho chimutondekesengi kuyuska Akhristu akugomezgeka.—Yoha. 5:28, 29.
24. Kumbi Saulo wanguwovya wuli pakubayika kwaku Stefano, nanga nyifwa ya munthu wakugomezgeka mwenuyu yinguwovya wuli ŵanthu kwa nyengu yitali?
24 Mnyamata munyaki zina laki Saulo wawonanga vosi venivi vichichitika. Iyu wanguzomereza kuti Stefano wabayiki ndipu ndiyu wawoneriyanga vakuvwala va ŵanthu wo amuponyanga mya. Pati pajumpha kanyengu kamanavi, iyu ndiyu walongozganga ntchitu yakofya yakutombozga Akhristu. Kweni nyifwa yaku Stefano yinguwovya ŵanthu kwa nyengu yitali. Mwakuyeruzgiyapu, chakuwoniyapu chaki chinguwovya Akhristu kuti alutirizgi kuja akugomezgeka nge mo iyu wanguchitiya. Kweniso pati pajumpha nyengu, Saulo yo wangwamba kudanika kuti Paulo, vamupwetekanga mumtima asani wakumbuka vo iyu wanguchita pakuzomereza kuti Stefano wabayiki. (Machi. 22:20) Mbuneneska kuti iyu wanguwovya kuti Stefano wabayiki kweni pavuli paki wangukamba kuti: “Ndenga wakunyoza, wakutombozga ndipuso ndenga munthu waganyavu.” (1 Timo. 1:13) Viwoneke limu kuti Paulo wanguluwa cha mazu nganthazi ngo Stefano wangukamba pa zuŵa lenili. Tikamba viyo chifukwa Paulo wangukamba kweniso kulemba fundu zinyaki zo Stefano wangukamba. (Machi. 7:48; 17:24; Ahe. 9:24) Pati pajumpha nyengu, Paulo wangufiska kuyezga chivwanu kweniso chiganga chaku Stefano, munthu yo “Chiuta wangumulongo wezi kweniso wangumupaska nthazi.” Kweni fumbu ndakuti, kumbi ndivu namwi muchitengi?
a Anyaki mwa ŵanthu ŵenaŵa ŵenga a mugulu lo ladanikanga kuti “Sinagogi wa Akufwatulika.” Ŵanthu ŵenaŵa atenere kuti nyengu yinyaki angukoleka ndi Aroma ndipu pavuli paki angufwatulika, pamwenga ŵenga akapolu wo angufwatulika ndipu angung’anamukiya ku Chiyuda. Anyaki mwa ŵanthu yaŵa ŵenga a ku Kilikiya ko Saulo wa ku Tariso watuliyanga. Nkhani iyi yilongopu cha kuti Saulo nayu wenga mugulu la ŵanthu a ku Kilikiya ŵenaŵa wo asuskananga ndi Stefano.
b Fundu zo Stefano wangukonkhoska zisanirika so kunyaki kwekosi cha mu Bayibolu. Mphenapa pe po pasanirika fundu yakuti Mozesi wangusambizika zeru za ku Ijipiti, vyaka vo wenga navu wachithaŵa ku Ijipiti ndipuso utali wa nyengu yo wangujaliya ku Midiyani.
c Vakukayikisa kuti boma la Aroma lazomerezanga khoti la Sanihedirini kupereka cheruzgu chakuti munthu wabayiki. (Yoha. 18:31) Mwemosi mo vingaŵiya, Stefano wangubayika mwakulondo dangu cha kweni wangubayika chifukwa cha ukali wa chigulu cha ŵanthu wo angukwiya ukongwa.
