1-6. Konkhoskani vakuchitika vo vilongo kuti Akaboni apharazga muvigaŵa ndipuso pa nyengu zakupambanapambana.

 MSUNGWANA munyaki yo ndi Kaboni waku Yehova ku Ghana, zina laki Rebecca, wapharazganga kusukulu ko wasambiranga. Pakuluta kusukulu, nyengu zosi wapinganga mabuku ngidu muchikwama chaki. Pa nyengu yakupumuwa, wayesesanga kusaniya mpata wakupharazgiya ŵana a sukulu anyaki. Rebecca wasambiranga Bayibolu ndi ŵana anandi a mukilasi laki.

² Pachirwa cha Madagascar, cho che kuvuma kwa Africa, apayiniya ŵaŵi ayendanga pasi nyengu zosi mtunda wa makilomita pafufupi 25 kuti akafiki kumuzi unyaki wakutali. Kuchigaŵa ichi kutotcha ukongwa. Kwenuku yiwu asambiranga Bayibolu ndi ŵanthu anandi wo akhumbisiskanga kuziŵa vinandi.

³ Chifukwa chakukhumbisiska kuti apharazgiyi ŵanthu wo aja mumphepeti mwa msinji wa Paraguay ndi Paraná, Akaboni a ku Paraguay angupanga boti mwakuwovyana ndi Akaboni 15 a muvyaru vinyaki. Boti lenili lenga likulu lakuti ŵanthu 12 angajamu nge nyumba. Mwakugwiriskiya ntchitu boti lenili, apharazgi aphamphu apharazganga uthenga wamampha wa Ufumu muvigaŵa vo atingi afiskengi cha kufikaku.

⁴ Ku Alaska, charu cho che kumpotu chayiku kwa charu chapasi, Akaboni asaniriyangapu mwaŵi wakupharazgiya alendu wo azanga mucharu chawu muchihanya. Pa nyengu yakufunda yeniyi, ŵanthu a mitundu yakupambanapambana azanga mucharu ichi mumasitima, ndipu Akaboni amanga padowoku ndi mabuku nga vineneru vakupambanapambana kuti aŵapharazgiyi. Muchigaŵa chenichi, ndegi yinguwovya so ukongwa pakupharazgiya ŵanthu a kumizi yakutali. Venivi vinguwovya kuti uthenga wamampha ufikiyi ŵanthu wo adanika kuti Aleuti, Athabasika, Asimishi kweniso Atilingiti.

⁵ Larry yo waja ku Texas mucharu cha America, wenga ndi chigaŵa chapade cho wapharazgangaku. Iyu wajanga kunyumba yo asungiyaku ŵanthu akukota kweniso wo atama ndipu wapharazgiyanga ŵanthu wo wajanga nawu limoza kwenuku. Chinanga kuti iyu wayendanga panjinga ya ŵanthu akupunduka chifukwa cha ngozi yo yingumuchitikiya, Larry wayesesanga mbwenu kupharazga. Iyu wakambiyangaku ŵanthu anyaki uthenga wamampha wa Ufumu, kweniso vo wagomezganga kuti Ufumu wenuwu wazamuwovya kuti waziyambi so kwenda umamphaumampha.—Yesa. 35:5, 6.

⁶ Kuti akachiti unganu wadera, Akaboni anyaki ku Myanmar, angwenda ulendu wa mazuŵa ngatatu paboti kutuwa ku Mandalay. Chifukwa chakukhumbisiska kupharazga uthenga wamampha, yiwu angupingiya limu mabuku ndipu  agaŵiyanga ŵanthu wo angukwera nawu boti. Peposi po boti ili lama, apharazgi aphamphu ŵenaŵa, asikanga mwaliŵiliŵi ndi kuluta mutawuni pamwenga muzi wo, ndi kuchigaŵiya mabuku. Asani boti ili lama, ŵanthu anyaki asikanga ndipu mwakweranga so ŵanthu anyaki wo ajanga nge chigaŵa chasonu chakuti apharazgi yaŵa apharazgeku.

7. Kumbi ndi nthowa nizi zo ateŵeti aku Yehova agwiriskiya ntchitu pakuchitiya ukaboni Ufumu waku Chiuta, nanga chilatu chawu ntchinthu wuli?

⁷ Mwakuyanana ndi abali ndi azichi wo akambika mu ndimi izi, ateŵeti aku Yehova pacharu chosi, ayesesa kuchitiya “mwakukwana ukaboni wakukwaskana ndi Ufumu waku Chiuta.” (Machi. 28:23) Yiwu apharazgiya ŵanthu kunyumba ndi nyumba, mumisewu, atiŵalembe makalata ndipuso pafoni. Ayesesa so kusaniya mipata yakuchitiya ukaboni Ufumu waku Chiuta kwali ŵe mubasi, atenda pasi pamwenga kuntchitu pa nyengu yakupumuwa. Mbuneneska kuti pe nthowa zinandi zakupharazgiya kweni chilatu chidu ntchimoza, kupharazga uthenga wamampha kwekosi ko kungasanirika ŵanthu.​—Mate. 10:11.

8, 9. (a) Ntchifukwa wuli tingakamba kuti kuluta panthazi kwa ntchitu yakupharazga nkhwakuziziswa ukongwa? (b) Kumbi ndi fumbu nili lo tingakhumbika kuliŵanaŵaniya, nanga titenere kuchitanji kuti tisaniyi kwamuka kwaki?

⁸ Kumbi namwi mwe mugulu la ŵanthu wo apharazga uthenga wa Ufumu mwaphamphu muvyaru vakujumpha 235? Asani ndi viyo, ndikuti namwi mugwiraku ntchitu yakupharazga Ufumu yo yiluta panthazi ukongwa! Vo apharazgi afiska pakugwira ntchitu yeniyi pacharu chosi, vakuziziswa ukongwa. Chinanga kuti Akaboni aku Yehova akumana ndi masuzgu ngakulungakulu, nge kukanizgika ndi boma ndipuso kutombozgeka, yiwu alutirizga mbwenu kuchitiya ukaboni mwakukwana Ufumu waku Chiuta ku ŵanthu amitundu yosi.

⁹ Fumbu lo tingakhumbika kuliŵanaŵaniya ndakuti: Ntchifukwa wuli masuzgu ndipuso vakuchita va ŵanthu wo alongozgeka ndi Satana, vatondeka kuweze vuli ntchitu yakupharazga Ufumu? Kuti fumbu lenili limukiki, tikhumbika kuŵanaŵaniya vo vachitikanga mu nyengu ya akutumika. Tikamba viyo chifukwa isi Akaboni aku Yehova mazuŵa nganu, tilutirizga waka ntchitu yo yingwamba pa nyengu yeniyi.

10. Kumbi Yesu wangujipereka ukongwa pa ntchitu niyi, nanga ndi vinthu wuli vo waziŵanga vakukwaskana ndi ntchitu yeniyi?

¹⁰ Yesu Khristu ndiyu wangwambisa mpingu wachikhristu. Iyu wangujipereka ukongwa pa ntchitu yakupharazga uthenga wamampha wa Ufumu waku Chiuta ndipu wawonanga kuti ntchitu iyi njakukhumbika ukongwa pa umoyu waki. Ndichu chifukwa chaki nyengu yinyaki wangukamba kuti: “Nditenere so kuchipharazga uthenga wamampha wa Ufumu waku Chiuta ku matawuni nganyaki, chifukwa chenichi ndichu ndikuziya.” (Luka 4:43) Yesu wanguziŵa kuti ntchitu yeniyi yo wangwambisa, watingi wayifiskengi cha yija. Wepafupi kufwa, iyu wangukambiya limu kuti uthenga wa Ufumu wazamupharazgika “ku mitundu yosi.” (Mariko 13:10) Kweni kumbi ntchitu yeniyi yatingi yigwirikengi wuli, nanga mbayani wo atingi ayigwirengi?

11. Kumbi ndi ntchitu yakukhumbika niyi yo Yesu wangupaska akusambira ŵaki, nanga ndi vinthu wuli vo vatingi viŵawovyengi kufiska ntchitu iyi?

 ¹¹ Yesu wati wayuskika wanguwoneke kwa akusambira ŵaki ndipu wanguŵapaska ntchitu yakukhumbika ukongwa. Iyu wanguti: “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi mu zina la Ada, la Mwana, ndipuso la mzimu wakupaturika. Mukaŵasambizengi kuti asungengi vinthu vosi vo ndikukulamulani. Ndipu awonani! ini ndiŵengi namwi limoza mazuŵa ngosi mpaka pakumaliya pa nyengu yinu.” (Mate. 28:19, 20) Mazu ngakuti “ndiŵengi namwi limoza,” ngalongonga kuti Yesu waŵawovyengi akusambira ŵaki pa ntchitu yakupharazga ndi kusambiza ŵanthu. Yiwu akhumbikanga nadi chovyu chenichi, chifukwa Yesu wanguŵakambiya limu kuti ‘mitundu yosi ya ŵanthu yazakuŵatinkha.’ (Mate. 24:9) Kweniso penga chinthu chinyaki cho chatingi chiŵawovyengi. Wepafupi kuluta kuchanya, Yesu wanguŵakambiya kuti mzimu wakupaturika wazakuŵawovya kuti azichitiyi ukaboni “mpaka kuvigaŵa vakutali ukongwa va charu chapasi.”​—Machi. 1:8.

12. Kumbi tikhumbika kuŵanaŵaniya mafumbu ngakukhumbika nanga, nanga ntchifukwa wuli tikhumbika kuziŵa kwamuka kwaki?

¹² Sonu tiyeni tiŵanaŵaniyi mafumbu ngakukhumbika ukongwa yanga: Kumbi akutumika aku Yesu ndipuso akusambira anyaki pa nyengu yo, awonanga kuti ntchitu yakupharazga njakukhumbika ukongwa? Kumbi kagulu kamanavi kenaka ka anthulumi ndi anthukazi achikhristu, kanguchitiya nadi ukaboni mwakukwana Ufumu waku Chiuta chinanga kuti atombozgekanga ukongwa? Kumbi Yehova, Yesu ndipuso angelu anguŵawovya nadi? Mafumbu ngenanga kweniso nganyaki nganandi ngamukika mubuku la Machitidu. Ntchifukwa wuli tikhumbika kuziŵa kwamuka kwa mafumbu ngenanga? Yesu wangulayizga kuti ntchitu yo wangupaska akusambira ŵaki yazamulutiriya “mpaka pakumaliya pa nyengu yinu.” Venivi vilongo kuti Yesu wangupereka ntchitu iyi kwa Akhristu wosi kusazgapu so isi tija mu nyengu yinu yakumaliya. Mwaviyo, tiyeni tiyesesi kuvwisa nkhani zo ze mubuku la Machitidu.

13, 14. (a) Kumbi ndiyani yo wakulemba buku la Machitidu, nanga vo wakulemba wangutuwa navu pani? (b) Kumbi mubuku la Machitidu mwe nkhani wuli?

¹³ Kumbi ndiyani yo wakulemba buku la Machitidu? Buku ili lizumbuwa cha yo wakulilemba. Kweni mazu ngakwamba nga mubuku lenili ngalongo kuti yo wakulilemba, ndiyu so wakulemba Uthenga Wamampha wa mubuku la Luka. (Luka 1:1-4; Machi. 1:1, 2) Mwaviyo, kwamba kali ukongwa, ŵanthu agomezga kuti Luka yo wenga “dokotala wakwanjiwa” kweniso kaswiri pa nkhani yakulemba mbiri, ndiyu wakulemba buku la Machitidu. (Ako. 4:14) Buku la Machitidu likonkhoska vinthu vo vinguchitika vyaka pafufupi 28, kwambiya nyengu yo Yesu wangulutiya kuchanya mu 33 C.E. mpaka cha m’ma 61 C.E. po wakutumika Paulo wenga mujeri ku Roma. Pakukonkhoska nkhani zinyaki za mubuku ili, Luka walongo kuti wengapu vinthu vo vichichitika. (Machi. 16:8-10; 20:5, 6; 27:1) Luka wafufuzanga nkhani mwalusu ndipu tikayika cha kuti vinthu vinyaki vo wakulemba wafumbanga kwaku Paulo, Baranaba, Filipu kweniso ŵanthu anyaki wo azumbulika mu nkhani zo.

 ¹⁴ Kumbi mubuku la Machitidu mwe nkhani wuli? Mubuku laki la Uthenga Wamampha, Luka wakulembamu vo Yesu wangukamba ndi kuchita. Kweni mubuku la Machitidu, Luka wakukonkhoska vo akusambira aku Yesu angukamba ndi kuchita. Mwaviyo mubuku la Machitidu, mwe nkhani za ŵanthu wo angugwira ntchitu yikulu yakupharazga chinanga kuti ŵanthu anyaki wo ŵenga Akhristu cha aŵawonanga kuti “ŵenga ambula kusambira ndipuso ambula kutchuka.” (Machi. 4:13) Mwakudumuwa, tingakamba waka kuti buku la mu Bayibolu lenili, lititikonkhoske mo mpingu wachikhristu ungwambiya kweniso mo ungulutiya panthazi. Buku la Machitidu lilongo mo Akhristu a mu nyengu ya akutumika angugwiriya ntchitu yakupharazga kweniso mtima wo angulongo pa ntchitu iyi. (Machi. 4:31; 5:42) Lilongo so mo mzimu wakupaturika unguwovye pa ntchitu yakupharazga uthenga wamampha. (Machi. 8:29, 39, 40; 13:1-3; 16:6; 18:24, 25) Buku la Machitidu likamba so ukongwa fundu yikulu ya mu Bayibolu ya mo Ufumu waku Chiuta utowesiyengi zina laki kuziya mwaku Khristu. Kweniso lilongo mo uthenga wa Ufumu unguwandiya mwakuziziswa chinanga kuti ŵanthu asuskanga mwanthazi.—Machi. 8:12; 19:8; 28:30, 31.

15. Kumbi kusambira buku la Machitidu kutiwovyengi wuli?

¹⁵ Kukamba uneneska, tikondwengi ndipuso chivwanu chidu chijengi chakukho chifukwa chakusambira buku la Machitidu! Tikwaskikengi ukongwa mumtima asani tiŵanaŵaniya mo Akhristu akwambiriya angulongore chiganga ndipuso phamphu pa ntchitu yakupharazga. Venivi vitichiskengi kuti tiyezgengi chakuwoniyapu chawu. Kweniso vitiwovyengi kuja akunozgeka kugwira ntchitu yo Yesu wakutipaska ‘yakusambiza ŵanthu kuti aje akusambira.’ Buku ili lapangika kuti likuwovyeni kuzivwisa umampha nkhani za mubuku la Machitidu.

16. Kumbi ndi vifukwa vitatu nivi vo buku ili lalembeke?

¹⁶ Buku ili lalembeke ukongwa vifukwa vitatu ivi: (1) kuti tileki kukayika kuti Yehova wagwiriskiya ntchitu mzimu waki wakupaturika pakulongozga ntchitu yakupharazga Ufumu ndi kusambiza ŵanthu kuti aje akusambira aku Yesu, (2) kuti chakuwoniyapu cha Akhristu a mu nyengu ya akutumika chitiwovyi kuchita uteŵeti widu mwaphamphu, ndipuso (3) kuti titumbikengi ukongwa gulu laku Yehova ndipuso abali wo alongozga pa ntchitu yakupharazga kweniso kuwonere mipingu.

17, 18. Kumbi buku ili lalembeka munthowa wuli, nanga mwe so vinthu vinyaki nivi vo vitiwovyengi pakusambira Bayibolu pakutija?

¹⁷ Kumbi buku ili lalembeka munthowa wuli? Buku ili lagaŵika vigaŵa 8, ndipu chigaŵa chechosi chikonkhoskapu chigaŵa chimanavi cha buku la Machitidu. Mitu ya mubuku ili yikonkhoska nkhani za mubuku la Machitidu vesi ndi vesi cha, kweni yikonkhoska waka vinthu vo tisambirapu ndipuso mo tingavigwiriskiya ntchitu. Kukwamba kwa mutu wewosi kwe mazu ngo ngakonkhoska fundu yikulu yo tisambirengi mu mutu wo ndipuso lemba la mubuku la Machitidu lo likonkhoskekengi.

¹⁸ Mubuku ili mwe so vinthu vinyaki vo vitiwovyengi ukongwa pakusambira Bayibolu pakutija. Mwe vithuzi vakutowa vo vilongo vakuchitika  vakupambanapambana va mubuku la Machitidu, ndipu vitiwovyengi kuŵanaŵaniya vo vachitikanga pa nyengu yeniyo. Mitu yinandi ye ndi mabokosi ngo nge ndi fundu zinyaki zakusazgiyapu zo zitiwovyengi ukongwa. Mabokosi nganyaki ngakonkhoska mbiri za ŵanthu a mu Bayibolu wo tingayezga chivwanu chawu. Penipo nganyaki ngakonkhoska vinandi vakukwaskana ndi malu, vakuchitika ndipuso ŵanthu anyaki wo azumbulika mubuku la Machitidu.

19. Kumbi ndi mafumbu nanga ngo tikhumbika kujifumba nyengu zosi?

¹⁹ Buku ili litiwovyengi kuti tijifufuzi mwakutuliya pasi pamtima. Kaya mwapharazga uthenga wa Ufumu kwa nyengu yitali wuli, mungachita umampha kujifufuza nyengu zosi kuti muwonengi vinthu vo muŵika panthazi pa umoyu winu kweniso mo muwone ntchitu yakupharazga. (2 Akori. 13:5) Jifumbeni kuti: ‘Kumbi ntchitu yakupharazga ndeche kuyiwona kuti yikhumbika kugwirika mwaliŵi? (1 Akori. 7:29-31) Kumbi ndipharazga uthenga wamampha ndi mtima wosi kweniso mwaphamphu? (1 Ate. 1:5, 6) Kumbi ndigwiraku mwakukwana ntchitu yakupharazga ndi kusambiza ŵanthu kuti aje akusambira?’—Ako. 3:23.

20, 21. Ntchifukwa wuli tikhumbika kugwira mwaliŵi ntchitu yakupharazga, nanga tisimikizi mtima kuchitanji?

²⁰ Nyengu zosi titenere kukumbuka kuti tikupaskika ntchitu yakukhumbika ukongwa yakupharazga ndi kusambiza ŵanthu kuti aje akusambira aku Yesu. Ntchitu iyi yikhumbika kugwirika mwaliŵi chifukwa umaliru wa nyengu yinu wepafupi ukongwa. Maumoyu nga ŵanthu anandi nge pa ngozi ndipu akhumbika kuŵawovya. Tiziŵa cha kuti mbanthu alinga a mtima wamampha wo angavwisiya uthenga widu. (Machi. 13:48) Kweni mbudindu widu kuwovya ŵanthu ŵenaŵa maji ngechendafiki mukhosi.​—1 Timo. 4:16.

²¹ Mwaviyo, tikhumbika kuyezga Akhristu a mu nyengu ya akutumika wo apharazganga uthenga wa Ufumu mwaphamphu. Kusambira buku ili kukuwovyeningi kugwiraku ntchitu yakupharazga mwaphamphu ndipuso mwachiganga. Tiyeni tisimikizi mtima kuti tilutirizgengi kuchitiya “mwakukwana ukaboni wakukwaskana ndi Ufumu waku Chiuta.”—Machi. 28:23.