1-3. (a) Ntchifukwa wuli Ezekiyeli wangupembuzgika ndi chiwona cha nyumba yakusopiyamu? (Wonani chithuzi cho che pachanya.) (b) Kumbi tikambiskanengenji mu mutu uwu?

YERUZGIYANI kuti muwona Ezekiyeli yo we ndi vyaka 50. Iyu waŵanaŵaniya vyaka 25 vo waja ku ukapolu. Pa nyengu iyi ndipu nyumba yakusopiyamu ku Yerusalemu yaja mahami kwa nyengu yitali. Asani Ezekiyeli waŵanaŵananga kuti nyengu yinyaki wazamuteŵete nge wasembi panyumba yeniyi, ndikuti pa nyengu iyi wanguziŵa kuti venivi vingachitika cha. Yapa ndipu kwaja vyaka 56 kuti ukapolu umali. Mwaviyo, Ezekiyeli wanguziŵa kuti vakukayikisa kuti iyu walutirizgengi kuja ndi umoyu mpaka po ŵanthu aku Yehova aweriyengi kucharu chawu ndi kuchizenga so nyumba yakusopiyamu. (Yere. 25:11) Kumbi iyu wanguguŵa chifukwa cha maŵanaŵanu ngenanga?

² Yehova wangumuchitiya lisungu ukongwa Ezekiyeli, chifukwa pa nyengu yeniyi, Iyu wangumulongo chiwona cho chakonkhoskanga vinthu vinandi. Chiwona chenichi chingumupembuzga ukongwa munthu wakugomezgeka mwenuyu, kweniso chingumupaska chilindizga. Mu chiwona chenichi, Chiuta wangutole mchimi mwenuyu kucharu chaki ndipu wangumumika paphiri litali ukongwa. We paphiri litali lenili, iyu wangukumana ndi “munthu yo wawonekanga nge mkuŵa.” Munthu mwenuyu yo wenga mungelu wangumulongo nyumba yakusopiyamu yakuziziswa ukongwa. (Ŵerengani Ezekiyeli 40:1-4.) Vo wawonanga, vawonekanga nge vichitika nadi! Vo Ezekiyeli wanguwona vitenere kuti vingumuchiska  kweniso wanguzukuma navu. Chinanga kuti nyumba yakusopiyamu yo wanguwona yenga ndi vinthu vinandi vo venga vachilendu cha kwaku iyu, kweni nyumba yeniyi yenga yakupambana ukongwa ndi nyumba yakusopiyamu yo yenga ku Yerusalemu.

³ Chiwona chakuziziswa chenichi chikulembeka mu machaputala 9 ngakumaliya nga buku la Ezekiyeli. Tiyeni tikambiskani maŵanaŵanu ngo titenere kuŵa nangu tichisambira chiwona chenichi kuti tichivwisi. Pavuli paki, tiwonengi asani nyumba yakusopiyamu yo Ezekiyeli wanguwona, ndiyu nyumba yakusopiyamu yikulu yauzimu yo wakutumika Paulo wanguyikonkhoska pati pajumpha vyaka vinandi. Pakumaliya, tikambiskanengi mo chiwona chenichi chingumukwaskiya Ezekiyeli ndi anyaki wo wenga nawu ku ukapolu.

4. Kumbi kali tachikonkhoskanga wuli chiwona cha nyumba yakusopiyamu, nanga sonu tawona kuti chikhumbika kukonkhoskeka mu nthowa wuli?

⁴ Kali mabuku ngidu ngakonkhoskanga kuti Ezekiyeli wanguwona nyumba yakusopiyamu yikulu yaku Yehova yo wakutumika Paulo wangukambirika kuti walembi mukalata yaki yakuluta kwa Aheberi. * Chifukwa cha fundu yeniyi, vawonekanga kuti venga vakuvwika kukonkhoska kuti vinthu vakupambanapambana vo Ezekiyeli wanguwona pa nyumba yakusopiyamu, vamiyanga vinthu vinyaki mwakukoliyana ndi vo Paulo wangukonkhoska vakukwaskana ndi chihema. Kweni tati tayipemphere nkhani yeniyi ndi kuŵanaŵaniyapu ukongwa, tawona kuti tikhumbika kukonkhoska mu nthowa yambula kusuzga chiwona chaku Ezekiyeli cha nyumba yakusopiyamu.

5, 6. (a) Kumbi wakutumika Paulo wangulongo wuli kuti ngwakujiyuyuwa wachikonkhoska chihema? (b) Kumbi Paulo wangukambanji vakukwaskana ndi vinthu vinyaki vo venga pachihema, nanga fundu yeniyi yingatiwovya wuli pa nkhani ya kuvwisa chiwona chaku Ezekiyeli cha nyumba yakusopiyamu?

⁵ Veumampha ukongwa kuti tikonkhoska kuti vinthu vosi vo Ezekiyeli wanguwona mu chiwona cha nyumba yakusopiyamu vimiya vinthu vinyaki cha. Ntchifukwa wuli tikamba viyo? Ŵanaŵaniyani chakuwoniyapu ichi. Pa nyengu yo Paulo wakonkhoskanga vakukwaskana ndi chihema chakukumanaku kweniso nyumba yakusopiyamu, iyu wanguzumbuwa vinthu vo venga pachihema nge chakuperekiyapu sembi chagolidi, chibenekeleru cha bokosi la phanganu ndipuso msuku wagolidi wo mwenga mana. Kumbi iyu wangukamba kuti vinthu venivi vimiya vinthu vinyaki? Viwoneke limu kuti mzimu wakupaturika ungumukambiyapu cha kuti wachiti venivi. Mumalu mwaki, Paulo wangulemba kuti: “Iyi ndi nyengu yakukonkhoske vinthu venivi cha.” (Ahe. 9:4, 5) Paulo walongozgekanga ndi mzimu wakupaturika ndipu wangulindizga Yehova mwakujiyuyuwa.—Ahe. 9:8.

⁶ Titenere so kugwiriskiya ntchitu fundu yeniyi pakukonkhoska chiwona chaku Ezekiyeli cha nyumba yakusopiyamu. Chiwona chenichi nachu che ndi vinthu vinandi. Nasi tingachita umampha kulindizga Yehova mwakujiyuyuwa kuti wativumbuliyi asani pe vinyaki vo tikhumbika kuziŵa pa nkhani iyi. (Ŵerengani Mika 7:7.) Sonu kumbi titenere kukamba kuti palivi so chinyaki cho mzimu waku Yehova watiwovya kuziŵa chakukwaskana ndi chiwona chenichi? Awa!

7, 8. (a) Kumbi ndi fundu wuli yo tasintha mo tayivwiyanga kali? (b) Kumbi chiwona cha nyumba yakusopiyamu chaku Ezekiyeli chipambana wuli ndi nyumba yakusopiyamu yauzimu yo Paulo wangukonkhoska?

⁷ Nge mo takambiyapu kali, kwa vyaka vinandi mabuku ngidu ngakonkhoskanga kuti Ezekiyeli wanguwona nyumba yakusopiyamu yikulu yauzimu  yaku Yehova, yo Paulo wangukambirika kuti walembi mukalata yaki yakuluta kwa Aheberi. Kweni kufufuza mwakukwana nkhani yeniyi, kwatiwovya kuziŵa kuti nyumba yo Ezekiyeli wanguwona, yenga nyumba yakusopiyamu yikulu yauzimu cha. Ntchifukwa wuli tikamba viyo?

⁸ Chakwamba, nyumba yakusopiyamu yo Ezekiyeli wanguwona yikoliyana cha ndi vo Paulo wangukonkhoska. Ŵanaŵaniyani ivi: Wakutumika Paulo wangukonkhoska mwakuvwika umampha kuti chihema cho chengaku mu nyengu yaku Mozesi, chenga ŵaka chithuzi cha chinthu chinyaki chapade ukongwa. Mwakuyanana ndi nyumba yakusopiyamu yaku Solomoni kweniso yaku Zerubabeli, chihema chenga ndi chipinda chinyaki cho chadanikanga kuti “Malu Ngakupaturika Ukongwa.” Paulo wangukamba kuti chipinda chenichi chenga malu “ngakupaturika ngakupangika ndi manja,” ndipu wangukonkhoska so kuti chenga malu chayingu cha, kweni chenga ŵaka ‘chakuwoniyapu cha malu chayingu.’ Kumbi malu chayingu ngenga nanga? Paulo wangukamba kuti: “Kuchanya chayiku.” (Ahe. 9:3, 24) Kumbi Ezekiyeli wanguwona kuchanya? Awa. Chiwona chaku Ezekiyeli chilongopu cha kuti iyu wanguwona vinthu vakuchanya.—Yeruzgiyani ndi Daniyeli 7:9, 10, 13, 14.

9, 10. Pa nkhani ya sembi, kumbi nyumba yakusopiyamu yo Ezekiyeli wanguwona yipambana wuli ndi nyumba yakusopiyamu yikulu yauzimu yo Paulo wangukonkhoska?

⁹ Nkhani yakukwaskana ndi sembi yipereka so ukaboni unyaki wanthazi wakuti chiwona cha nyumba yakusopiyamu chaku Ezekiyeli, ndi vo Paulo wangukonkhoska vipambana. Ezekiyeli wanguvwa ulongozgi wakuvwika umampha wakukwaskana ndi mo angapereke sembi. Ulongozgi uwu waperekekanga ku ŵanthu, alongozgi kweniso kwa asembi. Yiwu akhumbikanga kupereka sembi za maubudi ngawu. Akhumbikanga so kupereka sembi za chimangu, zo atenere kuti aryiyanga pamoza muvipinda vakuryiyamu munyumba yakusopiyamu. (Ezeki. 43:18, 19; 44:11, 15, 27; 45:15-20, 22-25) Kumbi sembi zenizi zo zaperekekanga kaŵikaŵi ziperekeka so munyumba yakusopiyamu yikulu yauzimu?

¹⁰ Kwamuka nkhwambula kusuzga. Paulo wangukonkhoska kuti: “Khristu wati waza nge wasembi mura wa vinthu vamampha vo vachitika kali, wanguporota muchihema chikulu kweniso chamampha ukongwa, chakupangika ndi manja nga ŵanthu cha, kung’anamuwa kuti cha mu chilengedu ichi cha. Iyu wangusere mumalu ngakupaturika ndi ndopa za mbuzi cha pamwenga za matholi nganthulumi, kweni ndi ndopa zaki. Wanguseremu kamoza pe mbwenu mpaka muyaya, ndipu wakutisaniriya utaski wamuyaya.” (Ahe. 9:11, 12) Mwaviyo, munyumba yakusopiyamu yikulu yauzimu, sembi yikuperekeka kamoza pe mbwenu. Sembi yeniyi ndi sembi yakuwombole yo yinguperekeka ndi Yesu Khristu, Wasembi Mura Mukulu. Venivi vilongore limu kuti chiwona cho Ezekiyeli wanguwona cha nyumba yakusopiyamu yo mwaperekekanga sembi zinandi za mbuzi ndi ng’ombi, yenga nyumba yakusopiyamu yikulu yauzimu cha.

11. Ntchifukwa wuli penga pakwenere cha kuti Chiuta wavumbuwi uneneska wakukwaskana ndi nyumba yakusopiyamu yikulu yauzimu mu nyengu yaku Ezekiyeli?

¹¹ Venivi vititiwovya kuziŵa chifukwa chachiŵi cho tikambiya kuti Ezekiyeli wanguwona nyumba yakusopiyamu yikulu yauzimu cha: Nyengu yaku Chiuta yakuvumbuliya uneneska wenuwu ndipu yechendakwani. Kumbukani kuti chiwona chaku Ezekiyeli, kakwamba chalutanga kwa Ayuda wo ŵenga ku ukapolu ku Babiloni. Yiwu ŵenga pasi pa Dangu laku Mozesi. Ukapolu wati wamala, yiwu anguwere ku Yerusalemu ndipu anguzenga so nyumba yakusopiyamu kweniso guŵa la sembi kuti  ayambi so kulondo Dangu lakukwaskana ndi kusopa kwauneneska. Pavuli paki, yiwu angulutirizga kupereka sembi pa guŵa lenili kwa vyaka pafufupi 600. Ŵanaŵaniyani mo Ayuda atingi achitiyengi asani chiwona chaku Ezekiyeli chenga cha nyumba yakusopiyamu yikulu yauzimu, yo wasembi mura wanguperekiyamu umoyu waki nge sembi yo yinguchitiska kuti sembi zinyaki zosi zileki kuperekeka! Kumbi yiwu atingi avwisengi? Kumbi venivi vatingi vichitiskengi cha kuti ayambi kuwona kuti Dangu laku Mozesi lenga lambula kukhumbika? Nyengu zosi, Yehova wavumbuwa uneneska pa nyengu yakwenere kweniso pa nyengu yo wawona kuti ŵanthu ŵaki angavwisa.

12-14. Kumbi pe kukoliyana wuli pakati pa nyumba yakusopiyamu yo Ezekiyeli wanguwona, ndi vo Paulo wangukonkhoska vakukwaskana ndi nyumba yakusopiyamu yauzimu? (Wonani bokosi lakuti “Nyumba Zakusopiyamu Zakupambana, Tisambirapu so Vakupambana.”)

¹² Sonu kumbi pe kukoliyana wuli pakati pa chiwona cha nyumba yakusopiyamu cho Ezekiyeli wanguwona, ndi vo Paulo wangukonkhoska vakukwaskana ndi nyumba yakusopiyamu yauzimu? Kumbukani kuti Paulo wachikonkhoska nyumba yakusopiyamu yauzimu, wangugwiriskiya ntchitu nyumba yakusopiyamu ya mu chiwona chaku Ezekiyeli cha, kweni wangugwiriskiya ntchitu chihema cho chengaku mu nyengu yaku Mozesi. Mbuneneska kuti Paulo wanguzumbuwa vinthu vinyaki vo venga munyumba yakusopiyamu yaku Solomoni ndipuso yaku Zerubabeli, kweniso vo venga munyumba yakusopiyamu yo Ezekiyeli wanguwona mu chiwona. Chinanga kuti ve viyo, Ezekiyeli ndi Paulo akukonkhoska vinthu vakupambana. * Kweni vo munyaki wakulemba vititiwovya kuvwisa umampha vo munyaki wakulemba. Munthowa wuli?

 ¹³ Nkhani ziŵi izi za mu Bayibolu zikoliyana munthowa iyi: Kutuliya kwaku Paulo tisambira ndondomeku yo Yehova wakujalikiska pa nkhani yakusopa, kweni kwaku Ezekiyeli tisambira fundu zo Yehova wakhumba kuti tilondongi pakusopa. Kuti watisambizi ndondomeku yo Yehova wakujalikiska pa nkhani ya kusopa, Paulo wangukonkhoska vo vinthu vinyaki vo ve munyumba yakusopiyamu yauzimu ving’anamuwa, nge wasembi mura, sembi, guŵa la sembi ndipuso Malu Ngakupaturika Ukongwa. Kweni kuti watilongo fundu zapachanya zo Yehova wakhumba kuti tilondongi pakusopa, mu chiwona chaki cha nyumba yakusopiyamu, Ezekiyeli wangukonkhoska vinthu vakupambanapambana vo vititiwovya kusambira vinandi vakukwaskana ndi fundu zaku Yehova.

¹⁴ Kumbi kusintha mo tavwiyanga chiwona chaku Ezekiyeli, kung’anamuwa kuti chiwona ichi chilivi ntchitu kwaku isi mazuŵa nganu? Awa. Kuti tiziŵi mo chiwona chenichi chititiwovye, tiyeni tiwoni mo Ayuda wo ŵengaku mu nyengu yaku Ezekiyeli kweniso wo ŵengaku pavuli paki, anguyanduliya.

15. (a) Kumbi ndi fundu yikulu niyi yo yenga mu chiwona chaku Ezekiyeli? (b) Kumbi uthenga wo we mu chaputala 8 cha buku la Ezekiyeli upambana wuli ndi uthenga wo usanirika mu machaputala 40 mpaka 48?

¹⁵ Kuti tiziŵi vo Bayibolu limuka pa fumbu lenili, tiyeni tikambiskani mafumbu nganyaki ngo ngangatiwovya kuti tiziŵi nkhani yosi. Fumbu  lakwamba, kumbi chiwona chenichi chenga ndi fundu yikulu niyi? Fundu yaki yenga yakuti kusopa kwauneneska kuweriyengepu! Ezekiyeli wanguyivwisa umampha ukongwa fundu yeniyi. Pa nyengu iyi ndipu iyu walemba kali uthenga wo usanirika mu chaputala 8 cha buku la Ezekiyeli. Mu uthenga wenuwu, Yehova wangumukonkhoske Ezekiyeli kuti kusopa kungutimbanyizgika ukongwa panyumba yakusopiyamu ku Yerusalemu. Sonu Ezekiyeli watenere kuti wangukondwa ukongwa wachilemba uthenga wo sonu usanirika mu chaputala 40 mpaka 48, wo upambana ndi uthenga wo wangulemba pakwamba. Mu machaputala ngenanga, iyu wangukonkhoska vakukwaskana ndi kusopa kwauneneska kwambula kutimbanyizgika, ko Yehova wakhumba kweniso ko kukoliyana ndi Dangu laku Mozesi.

16. Kumbi chiwona chaku Ezekiyeli cha nyumba yakusopiyamu chisimikiziya wuli vo Yesaya wangukambiya limu?

¹⁶ Kuti kusopa kwauneneska kuweriyepu nge mo Yehova mweneku wakhumbiya, kukhumbika kukwezeka. Kweche vyaka vakujumpha 100, mchimi Yesaya wangulemba kuti: “Mu mazuŵa ngakumaliya, phiri la nyumba yaku Yehova lazamujalikiskika pachanya pa mapiri, ndipuso lazamukwezeka pachanya pa mitunthu.” (Yesa. 2:2) Yapa Yesaya wanguwone limu kuti kusopa kwauneneska kwazamuweriyapu ndipuso kwazamukwezeka, nge kuti kwaŵikika pachanya paphiri litali ukongwa. Sonu kumbi Ezekiyeli wenga pani wachiwona chiwona chakutuliya kwaku Chiuta? Iyu wenga “pachanya pa phiri litali ukongwa,” ndipu walereskanga nyumba yaku Yehova! (Ezeki. 40:2) Mwaviyo, chiwona chaku Ezekiyeli chingusimikiziya kuti kusopa kwauneneska kwazamuweriyapu.

17. Konkhoskani vo visanirika mu Ezekiyeli chaputala 40 mpaka 48.

¹⁷ Mwakudumuwa, wonani vo Ezekiyeli wanguwona ndi kuvwa vo vikulembeka mu Ezekiyeli chaputala 40 mpaka 48. Iyu wawonanga mungelu wachipima mageti, mpanda, mabalaza kweniso malu ngakupaturika nga nyumba yakusopiyamu. (Ezeki. 40-42) Pavuli paki, panguchitika chinthu chinyaki chakuziziswa: Yehova wanguza mwaunkhankhu panyumba yakusopiyamu! Iyu wangupereka ulongozgi ku ŵanthu ŵaki wo angulanda, asembi kweniso alongozgi. (Ezeki. 43:1-12; 44:10-31; 45:9-12) Ezekiyeli wanguwona msinji uchisika kutuwa kumalu ngakupaturika wo ungupinga umoyu ndi vitumbiku, ndipu wadiranga mu Nyanja Yakufwa. (Ezeki. 47:1-12) Iyu wanguwona so charu chichigaŵika vigaŵavigaŵa, ndipu kusopa kwauneneska kwachitikiyanga pakati pacharu cho. (Ezeki. 45:1-8; 47:13–48:35) Kumbi chiwona chenichi chenga ndi uthenga wuli? Viwoneke limu kuti Yehova wasimikiziyanga ŵanthu ŵaki kuti kusopa kwauneneska kwazamuweriyapu ndipuso kwazamukwezeka. Chifukwa chakuti iyu wazamusanirikanga panyumba yeniyi, wazakuyitumbika ndipu wazamuchitiska kuti vitumbiku visapaliyi kutuwa munyumba yaki yakusopiyamu ndi kuchitiska kuti charu cho chichizgiki kweniso kuti muje umoyu ndi chimangu.

18. Kumbi chiwona cha nyumba yakusopiyamu chatingi chifiskikengi nadi nge mo Ezekiyeli wanguchiwone? Konkhoskani.

¹⁸ Fumbu lachiŵi, kumbi chiwona cho Ezekiyeli wanguwona chatingi chifiskikengi nadi nge mo wanguchiwone? Awa. Ezekiyeli kweniso ŵanthu anyaki wo wenga nawu ku ukapolu wo wanguŵakonkhoske chiwona chenichi, atenere kuti anguziŵa kuti chiwona ichi chifiskikengi nge mo iyu wanguchiwone cha. Ntchifukwa wuli tikamba viyo? Kumbukani kuti Ezekiyeli wanguwona nyumba yakusopiyamu ye “pachanya pa phiri litali ukongwa.” Chinanga kuti mazu ngenanga ngakoliyana ukongwa ndi  uchimi waku Yesaya, kweni ngapambana ndi malu ngo nyumba yakusopiyamu chayiyu yinguzengeka. Nyumba yakusopiyamu yaku Solomoni yinguzengeka pa Phiri la Moriya ku Yerusalemu, ndipu paphiri lenili ndipu yatingi yikazengekengi so. Kweni kumbi Phiri la Moriya lenga “phiri litali ukongwa”? Awa. Phiri lenili linguzingilizika so ndi mapiri nganyaki ngo utali waki wayanananga nalu, ndipuso nganyaki ngenga ngatali ukongwa kuphara phiri lenili. Kweni nyumba yosi yakusopiyamu yo Ezekiyeli wanguwona yenga yikulu ukongwa. Malu ngaki ngosi ngenga ngasani ukongwa ndipuso ngenga ndi mpanda ukulu. Mwaviyo, nyumba yakusopiyamu yo Ezekiyeli wanguwona yatingi yikwanengepu cha pa Phiri la Moriya. Yatingi yikwanengi so cha chinanga ndi mutawuni yosi ya Yerusalemu yo yengaku mu nyengu yaku Solomoni! Kweniso ŵanthu wo ŵenga ku ukapolu, anguziŵa kuti vingachitika cha kuti msinji chayiwu uyendi kutuwa mumalu ngakupaturika nga nyumba yakusopiyamu, ndi kuchidira mu Nyanja Yakufwa kuti ukachizgi maji ngakufwa ngenanga. Chakumaliya, Charu Chakulayizgika chenga chamapiri, sonu patingi paŵengi pakusuzga kugaŵiya mafuku mphaka zakunyoloka nge mo Ezekiyeli wangukonkhoske mu chiwona chaki. Mwaviyo, vo Ezekiyeli wanguwona mu chiwona vatingi vifiskikengi nge mo iyu wanguviwone cha.

19-21. Kumbi Yehova wakhumbanga kuti ŵanthu achitenji pavuli pakuvwa chiwona chaku Ezekiyeli, nanga ntchifukwa wuli akhumbikanga kuchita viyo?

¹⁹ Fumbu lachitatu, kumbi ŵanthu wo ŵengaku mu nyengu yaku Ezekiyeli akhumbikanga kuchitanji pavuli pakuvwa chiwona chenichi? Yiwu akhumbikanga kuchita soni chifukwa cha kuvwa fundu zapachanya zaku Yehova zakukwaskana ndi kusopa kwauneneska. Yehova wangukambiya  Ezekiyeli kuti: “Konkhoske a munyumba yaku Isirayeli vakukwaskana ndi nyumba yakusopiyamu.” Ezekiyeli wakhumbikanga kukonkhoska nyumba yakusopiyamu mwakuvwika umampha, ndipu venivi vatingi vichitiskengi kuti Ayisirayeli aje nge ‘asanda pulanu yaki.’ Ntchifukwa wuli Ayisirayeli akhumbikanga kuyiŵanaŵaniya ukongwa nyumba yakusopiyamu yeniyi? Kumbi Yehova wakhumbanga kuti yiwu azengi nyumba yeniyi? Awa. Kweni mwakukoliyana ndi vo Yehova wangukamba, chifukwa chaki chenga chakuti “achiti soni chifukwa cha kunanga kwawu.”—Ŵerengani Ezekiyeli 43:10-12.

²⁰ Ntchifukwa wuli chiwona chenichi chatingi chikwaskengi njuŵi ya ŵanthu a mitima yamampha ndi kuŵachitiska soni? Wonani vo Chiuta wangukambiya Ezekiyeli: “Yiwi mwana wa munthu, yivwa, wona ndipuso vwisiya mwakuphwere vinthu vosi vo nditikukambiya vakukwaskana ndi marangu nga nyumba yakusopiyamu yaku Yehova.” (Ezeki. 44:5) Ezekiyeli wanguvwa vakukwaskana ndi marangu mwakuwerezawereza. (Ezeki. 43:11, 12; 44:24; 46:14) Ezekiyeli wakumbusikanga so fundu zaku Yehova mwakuwerezawereza, kusazgapu fundu zakupimiya utali wa vinthu kweniso uzitu wa vinthu. (Ezeki. 40:5; 45:10-12; yeruzgiyani ndi Nthanthi 16:11.) Tikamba viyo chifukwa chakuti mu chiwona chimoza pe chenichi, Ezekiyeli wangulemba mazu ngakuti “kupima” kweniso ngakuti “mwesu” maulendu ngakujumpha 50!

²¹ Kumbi Yehova wakhumbanga kuŵasambizanji ŵanthu ŵaki po wangukamba vakukwaskana ndi kupima, mwesu kweniso marangu? Mwakugwiriskiya ntchitu mazu ngenanga, viwoneka kuti Yehova wakhumbanga kuŵakumbusa fundu yauneneska yakukhumbika ukongwa iyi: Yehova pe ndiyu wajalikiska fundu zakukwaskana ndi kusopa kwauneneska. Ŵanthu wo anguleka kulondo fundu zenizi akhumbikanga kuchita soni! Kumbi chiwona chenichi chinguŵasambiza wuli Ayuda fundu yeniyi? Mu Mutu 14, tikambiskanengi vakuwoniyapu vinyaki. Venivi vitiwovyengi kuziŵa umampha vo isi mazuŵa nganu tisambirapu pa chiwona chenichi.