Kuvuli uku, mabuku ngidu ngakonkhoskanga kuti matchalitchi nga Chikhristu ngamiya Yerusalemu wakugaruka. Vinthu viheni vo vachitikanga mu Yerusalemu wambula kugomezgeka, kusazgapu kusopa angoza kweniso vinyeda vo venga peposi, vititikumbusa vinthu vo vichitika mazuŵa nganu mu matchalitchi nga Chikhristu. Kweni mu vyaka va pambula kuswera yapa, mabuku ngidu kusazgiyapu buku ili lo muŵerenga, ngakuleka kukamba vinthu nge kuti vimiya vinthu vinyaki pakukonkhoska mauchimi, kupatuwaku asani Bayibolu lakonkhoska chifukwa chakuvwika umampha chakuchitiya viyo. Kumbi pe chifukwa chakuvwika cha mu Malemba chakukambiya kuti matchalitchi nga Chikhristu ngamiya Yerusalemu? Awa.

Wonani fundu izi: Nyengu yinyaki, Yerusalemu lenga likulu la kusopa kwauneneska kweni pavuli paki, ŵanthu wo ajanga mwenumu angugaruka. Kweni mwakupambana ndi venivi, matchalitchi nga Chikhristu ngakusopapu cha mwauneneska. Kutuliya po matchalitchi ngenanga ngakwambiya mu 300 C.E., nyengu zosi ngasambiza visambizu vaboza.

Kusazgiyapu yapa, Yerusalemu wati wabwangandulika ndi Ababiloni, Yehova wanguyiweziyapu so tawuni yeniyi chifukwa wayiyanjanga ndipu yinguja so likulu la kusopa kwauneneska. Kweni Chiuta wakungayanjapu cha matchalitchi nga Chikhristu ndipu asani ngazibwangandulika pa chisuzgu chikulu, ngazamuŵaku so cha.

Mwakukoliyana ndi fundu zo takambiskana, kumbi tingakambanji? Asani tiwona mauchimi nga mu Bayibolu ngo ngangufiskika pa Yerusalemu wambula kugomezgeka, tingakamba kuti: ‘Venivi viyanana ŵaka ndi vo tiwona mu matchalitchi nga Chikhristu mazuŵa nganu.’ Kweni palivi chifukwa chechosi cha mu Malemba cho tingakambiya kuti matchalitchi nga Chikhristu ngamiya Yerusalemu.