Mu Bayibolu, mazu nga Chiheberi ngakuti na·vaʼʹ, ngo ngafwatulikiya kuti “uchimi,” ngang’anamuwa kupharazga uthenga wakutuliya kwaku Chiuta, cheruzgu, fundu za mijalidu yamampha pamwenga vo Chiuta walamula kuti ŵanthu achiti. Ngangang’anamuwa so kukambiya limu chinthu cho Chiuta wakamba kuti chichitikengi kunthazi. Fundu zosi zenizi zisanirika mu mauchimi ngaku Ezekiyeli.—Ezeki. 3:10, 11; 11:4-8; 14:6, 7; 37:9, 10; 38:1-4.

• VIWONA

• VAKUYERUZGIYAPU

• KUYESERE VO VAZAMUCHITIKA

Mubuku la Ezekiyeli mwe viwona, vakuyeruzgiyapu, ntharika kweniso kuyesere vo vazamuchitika.

Mauchimi nganyaki ngo Ezekiyeli wangukamba, ngafiskika kamoza pe cha. Mwakuyeruzgiyapu, mauchimi ngakukwaskana ndi kuweziyapu kusopa kwa uneneska ngangufiskika kamanavi Ayisirayeli ŵati awere mu Charu Chakulayizgika. Kweni mwakukoliyana ndi Mutu 9 wa buku ili, nganandi mwa mauchimi ngenanga ngafiskika ukongwa mazuŵa nganu kweniso ngazamufiskika kunthazi.

Mu vyaka vakuvuli, tawonanga kuti vinthu vo vizumbulika mu viwona vaku Ezekiyeli vimiya vinthu vinyaki. Kweni mubuku ili, ŵanthu, chinthu, malu pamwenga chakuchitika, vikonkhoskeka nge kuti vimiya chinthu chinyaki cha, kupatuwaku asani Malemba ngalongo kuti vimiya nadi chinthu chinyaki. * Mumalu mwaki, buku ili likonkhoska ukongwa kufiskika kwa mauchimi ngaku Ezekiyeli. Likonkhoska so vo tisambirapu pa uthenga, ŵanthu, malu ndipuso vakuchitika vo Ezekiyeli wakulemba.