BOKOSI 19A
Misinji ya Vitumbiku Yakutuliya Kwaku Yehova
Wonani nkhani zinyaki za mu Bayibolu zo zizumbuwa “msinji” kweniso “maji” kumiya vitumbiku vakutuliya kwaku Yehova. Asani tiŵerenga nkhani zosi zenizi, tichiskika ukongwa kuwona mo Yehova watititumbikiya. Munthowa wuli?
YOWELI 3:18 Uchimi uwu ulongo kasupi wa maji yo watuliya mumalu ngakupaturika nga nyumba yakusopiyamu. Kasupi uyu watenda ndipu wadiriya “Dambu la Vimiti va Akeshiya” lo ndakumira. Mwaviyo, Yoweli ndi Ezekiyeli, wosi anguwona msinji wo waperekanga umoyu kumalu ngakumira. Mu mauchimi ngosi ngaŵi, msinji watuliyanga kunyumba yaku Yehova pamwenga kuti kunyumba yakusopiyamu.
ZEKARIYA 14:8 Mchimi Zekariya wanguwona “maji nga umoyu” ngachituliya mu tawuni ya Yerusalemu. Hafu ya maji ngo, ngalazgiyanga ku nyanja ya kuvuma pamwenga kuti Nyanja Yakufwa ndipu hafu yinyaki yalazgiyanga ku nyanja ya kuzambwi pamwenga kuti Nyanja ya Meditereniyani. Yerusalemu yenga “tawuni ya Fumu yikulu,” Yehova Chiuta. (Mate. 5:35) Zekariya pa kuzumbuwa va tawuni yeniyi watitikumbusa ulamuliru waku Yehova wo wazamukuŵa pacharu chosi chapasi. Maji ngo ngazumbulika mu uchimi uwu, ngalongo kuti Yehova wazamutumbika magulu ngaŵi nga ŵanthu akugomezgeka mu Paradayisu. Gulu lakwamba nda ŵanthu wo azamujumpha ndi umoyu pa chisuzgu chikulu ndipu gulu lachiŵi nda ŵanthu wo azamuyuskika pavuli paki.
CHIVUMBUZI 22:1, 2 Wakutumika Yohane wanguwona msinji wakuyeruzgiya wakuyanana ndi wo Ezekiyeli wanguwona. Msinji uwu watuliyanga ku nyumba yakusopiyamu cha kweni ku mpandu wa Ufumu waku Yehova. Mwakuyanana ndi chiwona chaku Zekariya, chiwona ichi chiwoneka kuti chikamba za vitumbiku vaku Chiuta vo vazamukuŵa mu Ulamuliru wa Vyaka 1,000.
Kweni pe mphambanu yimanavi ŵaka pakati pa vitumbiku vakutuliya ku ulamuliru waku Yehova ndi va msinji wo Ezekiyeli wanguwona mu chiwona vamiyanga. Vitumbiku vosi venivi vituliya kwaku Yehova ndipu viluta ku ŵanthu wosi akugomezgeka.
SALIMO 46:4 Wonani mo vesi limoza ili likonkhoske vigaŵa vosi viŵi kusopa kweniso ulamuliru. Pa vesi ili tiwona msinji wo ukondwesa “tawuni yaku Chiuta” kung’anamuwa Ufumu kweniso ulamuliru ndipuso “chihema chikulu cha Wapachanya Limu” kung’anamuwa kusopa kwauneneska.
Nkhani zosi izi zititisimikiziya kuti Yehova wazamutumbika ŵanthu ŵaki akugomezgeka mu nthowa ziŵi. Tazamuyanduwa ndi vitumbiku ivi kwamuyaya, chakwamba, kutuliya ku ulamuliru waki ndipu chachiŵi kutuliya ku ndondomeku yaki yakukwaskana ndi kusopa kwauneneska. Mwaviyo, tiyeni tiyesesi pasonu panu kulutirizga kumwa “maji nga umoyu” ngakutuliya kwaku Yehova Chiuta kweniso Mwana waki, kung’anamuwa vinthu vo vingazitiwovya kusaniya umoyu wamuyaya!—Yere. 2:13; Yoha. 4:10.
