BOKOSI 1B
Nkhani zo ze mubuku la Ezekiyeli
Buku la Ezekiyeli lingagaŵika viyo:
CHAPUTALA 1 MPAKA 3
Mu chaka cha 613 B.C.E., pa nyengu yo Ezekiyeli wajanga limoza ndi Ayuda anyaki ku ukapolu ku Babiloni, wanguwona Yehova muchiwona ndipu Yehova wangumutuma kuti wakakambi uchimi kwa Ayuda wo ajanga mumphepeti mwa msinji wa Kebara.
CHAPUTALA 4 MPAKA 24
Pakati pa 613 ndi 609 B.C.E., Ezekiyeli wangupereka uthenga wa cheruzgu chakukwaskana ndi Yerusalemu kweniso ŵanthu ŵaki wo ŵenga akugaruka kweniso asopanga angoza.
CHAPUTALA 25 MPAKA 32
Kwambiya mu 609 B.C.E., chaka cho Ababiloni angwambiya kuzingiriza Tawuni ya Yerusalemu kakumaliya, uthenga wacheruzgu wo Ezekiyeli wangukamba wakukwaskana ndi Yerusalemu ungusintha ndipu unguluta ku ŵanthu wo atinkhanga Yerusalemu a muvyaru vakuzunguliya nge Aamoni, Aedomu, Ayijipiti, Amowabu, Afilisiti, Asidoni ndipuso ŵanthu a ku Turo.
CHAPUTALA 33 MPAKA 48
Kwambiya mu 606 B.C.E., Yerusalemu ndi nyumba yakusopiyamu vati vaja mahami, Ezekiyeli wakambanga uthenga wakukondwesa wa chilindizga wakuti Yehova Chiuta waweziyengepu kusopa kwa uneneska.
Buku la Ezekiyeli likulembeka mwakukoliyana ndi nyengu kweniso vakuchitika. Mauchimi ngakukwaskana ndi kubwangandulika kwa Yerusalemu ndi nyumba yakusopiyamu, ngangukambika mauchimi nganandi ngakukwaskana ndi kuweziyapu kusopa kwauneneska ngechendakambiki. Venivi vakuvwika chifukwa mauchimi ngakukwaskana ndi kuweziyapu kusopa kwauneneska ngalongo kuti kusopa kungumala panyumba yakusopiyamu.
Kweniso, mauchimi ngaku Ezekiyeli ngakukwaskana ndi arwani ŵawu a vyaru vapafupi (chaputala 25 mpaka 32) ngasanirika pakati pa uthenga wacheruzgu chakukwaskana ndi Yerusalemu ndi mauchimi ngakukwaskana ndi kuweziyapu kusopa kwauneneska. Kaswiri munyaki wangukamba vakukwaskana ndi uthenga waku Ezekiyeli wakukwaskana ndi cheruzgu cha ŵanthu a mitundu yinyaki kuti: “Uthenga wenuwu ukuŵikika pamalu ngamampha ukongwa, chifukwa kukwamba Ezekiyeli wakonkhoska kuti Chiuta wangukwiyiya ŵanthu Ŵaki ndipu kukumaliya wakonkhoska kuti wanguŵachitiya lisungu. Venivi vilongo kuti chilangu cho Yehova wangupaska arwani ŵawu yenga nthowa yakutaskiya ŵanthu ŵaki.”
