Nyengu zinyaki masuzgu kweniso mayeseru vingatigundizga, ndipu vingatisuzga kulutirizga kuteŵete Yehova. Kweni tingachiskika asani tiŵanaŵaniya vo Ezekiyeli wangukonkhoska mu chiwona chakukwaskana ndi kuweziyapu kusopa kwauneneska. Ntchifukwa wuli tikamba viyo? Mu chiwona ichi tasambira kuti Chiuta we ndi nthazi zakuweze mvuchi mu viwanga vo vikumira. Mwaviyo, iyu wangatondeka cha kutipaska nthazi pa nyengu yo takumana ndi masuzgu, chinanga ngangaŵa masuzgu ngakulu ukongwa.—Ŵerengani Salimo 18:29; Afi. 4:13.

Kumbukani kuti vyaka vinandi kuvuli Ezekiyeli wechendaweku, mchimi Mozesi wangukambiya limu kuti Yehova we ndi nthazi kweniso wakhumbisiska kugwiriskiya ntchitu nthazi zaki pakovya ŵanthu ŵaki. Mozesi wangulemba kuti: “Chiuta ndi malu ngakubisamaku kwamba kali, manja ngaki ngamuyaya nge pasi paku.” (Doto. 33:27) Mwaviyo, tisimikiza kuti asani tingathaŵiya kwaku Yehova pa nyengu yo takumana ndi masuzgu, iyu wangagwiriskiya ntchitu manja ngaki kuti watisosi ndipuso kuti watiwovyi kuma wima.—Ezeki. 37:10.