Akwanjiwa Ateŵeti aku Yehova:

Mwenga mu chaka cha 1971. Ŵanthu wo ŵenga pa Unganu Wachigaŵa wa Chingelezi wa mutu wakuti Zina Laku Chiuta (“Divine Name”) wo unguchitika mu chaka chenichi, angukondwa ukongwa kulonde mabuku ngasonu ngakupambanapambana. Ŵanthu wo ŵenga pa unganu uwu angukamba kuti “akhazanga cha” kuti angalonde mabuku nganandi viyo. Pakukamba za limoza mwa mabuku ngo ngangutuzgika pa unganu uwu, mubali munyaki wangukamba kuti: “Buku ili latilongo vinthu vakukondwesa ukongwa vo vituza kunthazi vo taviziŵanga cha!” Kumbi iyu wakambanga buku nili? Lenga buku la mutu wakuti, ‘Mitundu Yazamuziŵa Kuti Ini Ndini Yehova’—Mu Nthowa Wuli? (“The Nations Shall Know That I Am Jehovah”—How?) Ntchifukwa wuli ŵanthu angukondwa ndi buku lenili? Chifukwa lenga ndi fundu zakunozgeka zo zikonkhoska mauchimi ngo nge mu buku la Ezekiyeli ndipu mauchimi yanga ngakwaska vo vazamuchitikiya ŵanthu wosi kunthazi.

Kutuliya po buku lakuti ‘Know Jehovah’ lingutuzgikiya, chiŵerengeru cha ŵanthu aku Chiuta chakuwa ukongwa kutuwa pa 1.5 miliyoni kufika pa ŵanthu akujumpha 8 miliyoni. (Yesa. 60:22) Ateŵeti aku Yehova ŵenaŵa wo alipu mamiliyoni nganandi aŵereŵeta vineneru vakujumpha 1000. (Zeka. 8:23) Anandi mwaku yiwu, akusambirapu cha buku lo likonkhoska mwakuvwika umampha mauchimi ngo ngakulembeka ndi mchimi Ezekiyeli.

Kusazgiyapu yapa, vyaka vinandi vo vajumpha kutuliya mu 1971, mo tavwiyanga pakwamba fundu zinandi za mu Bayibolu zasintha ukongwa chifukwa chakuti ukweru uŵaliyaŵaliya. (Nthanthi 4:18) Mu chaka cha 1985, tingwamba kuvwisa umampha mo a “mbereri zinyaki” akambikiya kuti mbarunji kuti aje mabwezi ngaku Chiuta. (Yoha. 10:16; Aro. 5:18; Yako. 2:23) Pavuli paki, mu chaka cha 1995, tinguvwisa kakwamba kuti kuyeruzga kwakumaliya kwa ŵanthu wo ŵe nge “mbereri” kweniso “mbuzi” kwazamuchitika pa “chisuzgu chikulu” cho chituza. (Mate. 24:21; 25:31, 32) Kusintha kwa fundu zenizi kwachitiska kuti tisinthi mo tavwiyanga buku la Ezekiyeli.

Mu vyaka vapambula kuswera ukweru walutirizga kuŵaliyaŵaliya. Tiyeni tiwoni vo tisambira mu ntharika zaku Yesu. Fundu zinandi zo tisambira mu ntharika zenizi, sonu titizivwa umampha ukongwa. Zinandi mwa ntharika izi zikamba za vinthu vo vichitikengi pambula kuswera pa chisuzgu chikulu. Mwakuyanana ŵaka, tasintha mo tavwiyanga mauchimi nganyaki nga mu buku la Ezekiyeli. Ndipu nganyaki mwa mauchimi ngenanga ngasazgapu uchimi wakukwaskana ndi Gogi wa Magogi (machaputala  38 ndi 39), ntchitu ya munthulumi yo wenga ndi kachikwama ka mlembi (chaputala 9), kweniso chidika cha viwanga vakumira ndipuso kubanya timiti tiŵi mwakuyeruzgiya (chaputala 37). Fundu zosi zenizi zo tasintha mo tivwiya zingulembeka mu buku lakuti ‘Know Jehovah.’

Mwaviyo, mphakuvwika kuti ŵanthu anandi aku Yehova aja achifumba kuti, “Kumbi ndi zuŵanji po tijengi ndi buku lo likonkhoska mo tivwiya sonu mauchimi ngaku Ezekiyeli?” Buku lenili nda mutu wakuti, Yehova Waweziyapu Kusopa Kwauneneska! Po muŵerenga mitu yosi 22 kweniso kuŵanaŵaniyapu vithuzi vakutowa vo ve mu buku lenili, muzukumengi kuwona kuti tingufufuza mwakuphwere kuti buku ili lilembeki. Tinguŵanaŵaniyapu ukongwa kweniso tingufwiyapu kupemphera kuti tiziŵi chifukwa cho Yehova wanguzomereze kuti buku lakukondwesa la Ezekiyeli lilembeki mu Bayibolu. Tinguŵanaŵaniyapu mwakuphwere  mafumbu ngakuti: Kumbi nkhani za mu buku la Ezekiyeli zinguŵasambizanji ŵanthu a mu nyengu yaki, nanga isi zititisambizanji mazuŵa nganu? Kumbi ndi mauchimi nanga ngo ngakamba za vinthu vo vichitikengi kunthazi? Kumbi mauchimi ngaku Ezekiyeli ngakamba za chinthu chinyaki cho chimiya chinthu chinyaki? Kwamuka kwa mafumbu yanga, kutitiwovya kuti tivwisi buku la Ezekiyeli.

Po muŵerenga buku la Ezekiyeli kutuwa pakwamba mpaka pakumaliya, muzizwengi ndi chigaŵa chakuchanya cha gulu laku Yehova. Muzizwengi so kuwona fundu zapachanya zaku Yehova zo wakhumba kuti ateŵeti ŵaki akuchanya ndi pacharu chapasi, wo atimusopa mwakuzomerezeka ayendiyengi. Buku la Kusopa Kwauneneska, likuwovyeningi kuwonga vo Yehova wachitiyapu kali ŵanthu ŵaki kweniso vo wazakuŵachitiya kunthazi. Muwonengi kuti buku ili lididimizga mwakuwerezawereza fundu ziŵi zikuluzikulu. Chakwamba, kuti tikondwesi Yehova, tikhumbika kuziŵa kweniso kuzomereza kuti iyu ndiyu Fumu Yachilengedu Chosi. Chachiŵi, titenere kusopa Yehova mu nthowa yo iyu wazomereza ndipu tichitengi vinthu mwakukoliyana ndi fundu zaki zapachanya pa umoyu widu.

Tikhumbisiska kuti buku ili likuwovyeni kusopa Yehova mu nthowa yo yitumbika zina laki likulu kweniso lakupaturika. Ndipuso tikhumba kuti likuchiskeni kulutirizga kulindizga nyengu yo mitundu yosi yazamuziŵa kuti iyu ndi Yehova.—Ezeki. 36:23; 38:23.

Tipempha Yehova Awusefwi achanju kuti akutumbikeni po mufwiyapu kuvwisa buku la Ezekiyeli lo yiwu angumuwovya kuti walembi.