Satana ndi viŵanda mbakofya ndipuso mbankhaza kwamba kali. Kuvuli uku, Satana wangubaya viŵetu ndi ateŵeti a munthu wakugomezgeka Jobu. Pavuli paki wangubaya ŵana aku Jobu 10 mwakuchitiska kuti “mphepu yikuru” yibwanganduwi nyumba yo ŵengamu. Ivi vati vachitika, Satana “wangumupweteka Jobu ndi vironda vakutupa kutuwa ku phazi la rundi laki kwachifika pa liwombu la mutu waki.”—Jobu 1:7-19; 2:7.

M’nyengu yaku Yesu, viŵanda vinguchitiska ŵanthu anyaki kuja ambuwu ndipuso achibulumutiya. (Mateyu 9:32, 33; 12:22) Vingusuzga munthu munyaki ndipu vingumuchitiska kuti wajitemengi ndi mya. (Marko 5:5) Vinguchitiska so kuti mnyamata munyaki wakamburengi ndi kumuponye pasi kweniso ‘kumuchitiska kuti wanyutukengi.’—Luka 9:42.

Mazuŵa nganu Satana ndi viŵanda abaya ŵanthu nge mo achitiyanga kali. Ndipu vakuchita vawu viheni valuta panthazi ukongwa kutuliya pa nyengu yo  angudikiskikiya kuchanya. Vakuchitika va pacharu chosi chapasi vilongo nkhaza zawu. Viŵanda vichitiska kuti ŵanthu anyaki atamengi. Anyaki vitiŵasuzga usiku, vitiŵachitiska kuti alekengi kugona tulu pamwenga kuŵaloteska malotu ngakofya. Vichitiska so anyaki kuti achitengi vinthu vaureŵi. Ndipu anyaki vitiŵafunthisa, vitiŵachitiska kuti abayengi anyawu, pamwenga kujibaya.

Lintina, yo waja ku Suriname, wakamba kuti viŵanda pamwenga kuti mizimu yiheni, vingubaya ŵanthu 16 a m’banja lawu ndi kumuchitiska kuti wasuzgiki ndi matenda kwa vyaka 18. Iyu wakonkhoska kuti viŵanda “vikondwa ukongwa asani visuzga ŵanthu wo aleka kuvikhumba mpaka kuŵabaya.”

Kweni Yehova wakhoza kuvikiliya ateŵeti ŵaki ku nthazi zaku Satana.—Nthanthi 18:10.