MO MUNGAYAMBIYA KUKAMBISKANA NDI ŴANTHU
SAMBIRU 3
Muchitengi Vinthu Mwalisungu
Fundu ya mu Bayibolu: “Chanju . . . ntchalisungu.”—1 Akorinto 13:4.
Vo Yesu Wanguchita
1. Woneriyani VIDIYO, pamwenga ŵerengani Yohane 9:1-7. Pavuli paki ŵanaŵaniyani mafumbu yanga:
-
Kumbi ntchinthu wuli cho Yesu wangwamba kuchita, kuchizga wachibulumutiya pamwenga kumupharazgiya dankha uthenga wamampha?—Wonani Yohane 9:35-38.
-
Kumbi muwona kuti vo Yesu wanguchita, vinguwovya wuli kuti wachibulumutiya wavwisiyi uthenga wamampha?
Kumbi Tisambiranji Kwaku Yesu?
2. Munthu wangaja ndi mtima wakukhumba kuvwisiya asani tilongo kuti titimuŵanaŵaniya.
Muyezgengi Yesu
3. Muŵachitiyengi chitima ŵanthu. Muŵanaŵaniyengi mo yiwu avwiya.
-
Mujifumbengi kuti: ‘Kumbi munthu uyu watenere kuti wafipa mtima ndi vinthu wuli? Kumbi ndi vinthu wuli vo vingamuwovya?’ Kuchita venivi kukuwovyeningi kuti muŵalongo lisungu munthowa yakwenere.
-
Muŵavwisiyengi asani alongoro. Venivi vingalongo kuti muŵanaŵaniya vo yiwu ativiwona kuti vakukhumbika. Asani akukambiyani mo avwiya pamwenga suzgu yo akumana nayu, mungayambisanga nkhani yinyaki cha.
4. Mulongorongi mwalisungu ndipuso mwaulemu. Mo mulongolore mungalongo kuti mutiŵachitiya lisungu ŵanthu kweniso mukhumbisiska kuŵawovya. Muphweriyengi ndi mazu ngo mulongoro kweniso mo mulongolore ndipu mutenere cha kulongoro mazu ngo ngangaŵaguŵiska.
5. Muŵawovyengi. Muyesesengi kusaniya mpata wamampha wo mungawovye munthu munthowa yakwenere. Asani titiŵachitiya lisungu ŵanthu vingawovya kuti aje ndi mtima wakukhumba kuvwisiya uthenga widu.
