UTEŴETI WA PA BETELI Apharazgi akubatizika a vyaka 35 ndipuso kusikiya pasi wo akhumba kuchiteŵete pa Beteli, atenere kusanirika pa unganu wo uchitikengi pa Chinkhondi ndi musana. Nyengu ndi malu ngakuchitiyaku unganu uwu vipharazgikengi.

SUKULU YA APHARAZGI A UFUMU Apayinya a vyaka vapakati pa 23 ndi 65 wo akhumba kusazgiyaku uteŵeti wawu, apempheka kuti akasanirikepu pa unganu waku wo akhumba kuchisere Sukulu ya Apharazgi a Ufumu. Unganu uwu uchitikengi pa Sabata ndi musana. Nyengu ndi malu ngakuchitiyaku unganu uwu vipharazgikengi.

AKULONDE ALENDU Akulonde alendu aŵikika kuti akuwovyeni. Avwiyeni asani atikukambiyani za ko mungamika njinga, galimotu, ko mutenere kwenda pamwenga asani atikupasani ulongozgi pa nkhani ya kusunga malu kweniso pa nkhani zinyaki.

UBATIZU Mipandu yakunthazi yo ye pafupi ndi pulatifomu yazamusungikiya wo aluta ku ubatizu, mungajapu pijapija asani pe kusintha. Wosi wo aluta ku ubatizu atenere kuja pamipandu yeniyi nkhani ya ubatizu yechendayambi, pa Chisulu ndi mulenji. Weyosi watenere kupinga chakuvwala chaulemu cho wamubatizikiya.

VAKUPEREKA Tagwirisiya ntchitu ndalama zinandi kuti malu ngidu ngakuchitiyapu unganu ngaje ngamampha ndipuso kuti tije ndi vipangizu vakukweze mazu. Tagwirisiya so ntchitu ndalama zenizi pa vinthu vinyaki vo vawovya kuti unganu uyendi umampha kweniso kuti utiwovyi kuja pa ubwezi ndi Yehova. Ndalama zo mupereka zitovya kulipiriya vinthu vo tagwirisiya ntchitu pa unganu wunu kweniso zitovya pa ntchitu yapacharu chosi. Pa unganu wunu, paŵikika mabokosi nga vakupereka kuti muŵikengemu ndalama asani mungayanja. Ndalama zosi zo mupereka ziwongeka ukongwa. Wupu Wakulongozga utikuwongani mosi chifukwa chakovya pa ntchitu ya Ufumu.

CHIPATALA Ziŵani kuti chipatala ichi ntcha matenda nga MABUCHIBUCHI PE.

VINTHU VO VASOŴA NDI VO VASANIRIKA Chechosi cho tatondo tikachipereki ku Dipatimenti ya Vinthu vo Vasoŵa ndi vo Vasanirika. Asani mwataya chinthu, lutani ku dipatimenti yeniyi kuti mukawoneku. Ŵana wo asoŵa atenere kuperekeka ku dipatimenti yeniyi. Kweni dipatimenti iyi ndi malu ngakusungiyaku ŵana cha. Chondi mwapapi, phweriyani ŵana ŵinu ndipuso mujengi nawu pamoza.

MALU NGAKUJAPU Chondi ŵanaŵaniyani anyinu. Kumbukani kuti mutenere kusungiya malu ŵanthu a m’banja linu, wo mwaziya nawu limoza pamwenga wo musambira nawu Bayibolu pe. Mutenere cha kuŵika vinthu pamalu ngo mujengepu cha.

UTEŴETI WAKUJIPEREKA Asani mukhumba kuti mugwireku ntchitu pa unganu wachigaŵa, lutani ku Dipatimenti ya Uteŵeti Wakujipereka.