Kaisare Augusto yo wenga fumu ya Aroma wangulamula kuti Ayuda wosi awere kwawu kuti akalembesi. Mwaviyo, Yosefe ndi Mariya angwenda kuluta ku Betelehemu, ko kwenga kwawu kwaku Yosefe. Pa nyengu iyi ndipu Mariya we pafupi kubala mwana.

Ŵati afika ku Betelehemu, angusaniya kuti malu ngamala ndipu angugona mukhola la viŵetu. Mariya wangubaliya mwana waki mwenumu. Iyu wangumuvunga musalu ndipu wangumugoneka muchakuryiyamu viŵetu.

Kufupi ndi Betelehemu kwenga aliska anyaki wo angugona kwenuku chifukwa alereziyanga mbereri zawu. Mwamabuchibuchi, kunguza mungelu yo wanguma kunthazi kwawu ndipu ukweru waku Yehova unguŵazunguliya. Aliska yaŵa ŵenga ndi mantha ndipu mungelu yo wanguti: ‘Kuwopa cha. Ndaza ndi uthenga wakukondwesa. Musanawale ku Betelehemu kwawa Mesiya.’ Po mungelu yo waŵereŵetanga, kuchanya kunguwoneka angelu  anandi ndipu akambanga kuti: ‘Unkhankhu kwaku Chiuta kuchanya, chimangu pacharu chapasi.’ Pavuli paki, angelu wo anguwoneka cha. Kumbi aliska wo anguchitanji?

Aliska wo anguti: ‘Sonu viyo tiyeni tiluti ku Betelehemu.’ Yiwu anguluta mwaliŵi ndipu angusaniya Yosefe ndi Mariya ŵe mukhola ndi mwana wawu.

Wosi wo anguvwa vo mungelu wangukambiya aliska, anguzizwa. Mariya wanguviŵanaŵaniya ukongwa vo mungelu wangumukambiya ndipu wanguviluwa cha. Aliska anguwere ko kwenga mbereri zawu ndipu awonganga Yehova chifukwa cha vo anguwona kweniso kuvwa.