Pati pajumpha nyengu, Yesu wangwamba kupharazga kuti: ‘Ufumu waku Chiuta we pafupi.’ Akusambira ŵaki anguluta nayu limoza ku Galileya ndi ku Yudeya. Yesu wati wawere ku Nazarete yo yenga tawuni ya kwawu, wanguluta musinagoge ndipu wangujula mpukutu waku Yesaya. Iyu wanguŵerenga mwakukweza kuti: ‘Yehova wandipasa mzimu utuŵa kuti ndipharazgi uthenga wamampha.’ Kumbi mazu yanga ngang’anamuwanganji? Ngang’anamuwanga kuti chinanga kuti ŵanthu akhumbanga kuwona Yesu wachichita vakuziziswa, chifukwa chikulu cho Yehova wangumupasiya mzimu utuŵa, chenga chakuti wapharazgengi uthenga wamampha. Wati wamala kuŵerenga, wangukambiya ŵanthu wo amuvwisiyanga kuti: ‘Msanawale uchimi uwu wafiskika.’

Pavuli paki, Yesu wanguluta ku nyanja ya Galileya ko wanguchikumana ndi alovi anayi wo anguja akusambira ŵaki. Iyu wanguŵakambiya kuti: “Ndilondoni, ndipu ndikusambuskeningi alovi a ŵanthu.” Ŵanthu yaŵa ŵenga Petro, Andireya, Yakobe ndi Yohane. Nyengu yeniyo, anguleka ntchitu yawu ya ulovi ndipu angumulondo. Anguchipharazga ku Galileya kosi za Ufumu waku Yehova. Yiwu apharazganga mumasinagoge, mumisika ndipuso munthowa. Ŵanthu anandi aŵalondonga kwekosi ko akanga. Mbiri yaku Yesu yingufika kwekosi mpaka ku Siriya.

Pati pajumpha nyengu, Yesu wanguŵapasa nthazi anyaki mwa akusambira ŵaki kuti achizgengi ŵanthu ndipuso atuzgengi viŵanda. Anyaki apharazganga nayu limoza mumatawuni ndi mumizi. Anthukazi anyaki akugomezeka nge Mariya Magadala, Jowana, Suzana ndi anyaki ndiwu aphweriyanga Yesu ndi akusambira ŵaki.

Yesu wati wasambiza akusambira ŵaki wanguŵatuma kuti akapharazgi. Pa nyengu yo apharazganga ku Galileya, ŵanthu anandi anguja akusambira ndipu angubatizika. Penga so anandi wo akhumbanga kuja akusambira ndipu Yesu wanguŵayeruzgiya ndi munda wo wakhumbikanga kuti akolori. Iyu wanguti: ‘Pemphani Yehova kuti watumizi antchitu anandi kuti akakolori mbewu.’ Pavuli paki, wangusankha akusambira 70 ndipu wanguŵatuma ŵaŵi ŵaŵi kuti apharazgi Muyuda mosi. Yiwu angusambiza ŵanthu a mitundu yosi za Ufumu. Ŵati aweku, angumukambiya vo vinguchitika. Pengavi cho Dyaboli watingi wachitengi kuti watondekesi ntchitu yakupharazga.

 Yesu wanguwovya akusambira ŵaki kuti azilutirizi kugwira ntchitu yakukhumbika yeniyi asani iyu waziluta kuchanya. Iyu wanguŵakambiya kuti: ‘Pharazgani uthenga wamampha pacharu chosi. Sambizani ŵanthu Mazu ngaku Chiuta ndi kuŵabatiza.’