Pati pajumpha mazuŵa 10 kutuliya po Yesu wanguwere kuchanya, akusambira ŵaki angulonde mzimu utuŵa. Pa Pentekoste mu chaka cha 33 C.E., ŵanthu anguza ku Yerusalemu kutuliya mu vyaru vinandi kuzichita phwandu. Akusambira aku Yesu akukwana 120 anguwungana muchipinda chamuchanya. Mwamabuchibuchi, panguchitika chinthu chakuziziswa. Kanthu kakuwoneka nge mulipu wa motu kenga pa mutu pa wakusambira weyosi ndipu wosi angwamba kulongoro vineneru vakupambanapambana. Munyumba yo mwenga chiwawa chikulu nge mwenga chimphepu.

Alendu akutuliya muvyaru vinyaki wo anguza ku Yerusalemu, anguvwa chiwawa chenichi ndipu angutchimbiriya kunyumba yo kuti akawoni vo vachitikanga. Ŵanthu yaŵa anguzizwa ukongwa ŵati ŵavwa akusambira achilongoro vineneru vakupambanapambana. Yiwu angukamba kuti: ‘Kweni ŵanthu yaŵa mba ku Galileya. Kumbi alongoro wuli vineneru vidu?’

Pavuli paki, Petro ndi akutumika anyaki anguma kunthazi kwa chigulu cha ŵanthu wo. Petro wanguŵakambiya mo Yesu wangubayikiya ndipuso  kuti Yehova wakumuyuska kwa akufwa. Petro wanguti: ‘Sonu Yesu we kuchanya kujanja lamaryi laku Chiuta ndipu watipunguliya mzimu wo wangulayizga. Ndichu chifukwa chaki mwavwa ndi kuwona vakuziziswa ivi.’

Ŵanthu wo angukwaskika ukongwa ndi vo Petro wangukamba ndipu angufumba kuti: “Tichitenji?” Iyu wanguŵakambiya kuti: ‘Lapani maubudi nginu ndipu mubatiziki mu zina laku Yesu. Mulondiyengi so mphasu ya mzimu utuŵa.’ Pa zuŵa lenili, ŵanthu pafupifupi 3 sawuzandi angubatizika. Kutuliya zuŵa ili, chiŵerengeru cha akusambira chingwamba kukuwa mwaliŵi. Mwakuwovyeka ndi mzimu utuŵa, akutumika angujalikiska mipingu yinandi kuti asambizengi akusambira vinthu vosi vo Yesu wanguŵalamuliya.