Yisaki wenga ndi vyaka 40 pa nyengu yo watonga Rebeka. Iyu wangumuyanja ukongwa. Pati pajumpha kanyengu ŵenga ndi ŵana anthurumi amuwoli.

Mura wenga Esau ndipu mumana wenga Yakobe. Esau wajanga pakhomu cha chifukwa waziŵanga kuŵinga. Penipo Yakobe wayanjanga kuja pakhomu.

Pa nyengu yo, mwana wakwamba ndiyu wapasikanga malu ngakulu kweniso ndalama asani awisi ŵafwa. Ichi chadanikanga kuti chihara. Chinyaki mwa vihara vo a mu banja laku Yisaki atingi alondiyengi, venga vinthu vo Yehova wangulayizga Abrahamu. Esau wangatoliyangaku kanthu cha malayizgu ngenanga kweni Yakobe waziŵanga kuti ngenga ngakukhumbika ukongwa.

Zuŵa linyaki Esau wangufika panyumba wavuka ukongwa chifukwa wangutandala kuchiŵinga. Iyu wanguvwa kununkhira kwa chakurya cho Yakobe wabikanga ndipu wanguti: ‘Nde ndinja! Ndipaseku chiperi!’ Yakobe wanguti: ‘Ndikupasengi kweni undilayizgi dankha kuti undipasengi chihara chaku.’ Esau wangumuka kuti: ‘Ndilivi nachu ntchitu chihara changu! Ungato. Ndikhumba ŵaka kurya.’ Kumbi uŵanaŵana kuti vo Esau wanguchita venga vazeru? Awa. Esau wangusinthisa chinthu chakukhumbika ukongwa ndi mbali yimoza ya chiperi.

Nyengu yinyaki Yisaki wati wakota ukongwa, wakhumbanga kuti watumbiki mwana waki wakwamba. Rebeka wangumuwovya mwana  waki mumana Yakobe kuti walonde vitumbiku. Esau wati waziŵa wangukwiya ukongwa ndipu wakhumbanga kubaya muvurwa waki. Yisaki ndi Rebeka akhumbanga kuvikiriya Yakobe ndipu angumukambiya kuti: ‘Luta ukaje ndi Labani muzichi ŵa anyoku mpaka po Esau wajalikiya mtima pasi.’ Yakobe wanguvwiya vo apapi ŵaki angumukambiya ndipu wanguthaŵa kuti waleki kubayika.