Ŵanthu wo ajanga mumsumba wa Nineve ku Asiriya, ŵenga ndi mijalidu yiheni. Yehova wangukambiya muchimi waki Yona kuti waluti ku Nineve wakaŵatcheŵesi kuti aleki kuchita vinthu viheni. Kweni Yona wanguthaŵa ndipu wanguluta kunyaki. Iyu wangukwera sitima yo yalutanga ku Tarshishi.

Pa nyengu yo sitima yayendenga panyanja, kunguza chimphepu chikulu ndipu wo agwiranga ntchitu musitima yeniyi anguchita mantha. Yiwu anguromba kwa achiuta ŵawu ndipu anguŵafumba kuti: ‘Ntchifukwa wuli ivi vititichitikiya?’ Pakumaliya, Yona wanguŵakambiya kuti: ‘Ini ndini ndachitisa. Ndithaŵa vo Yehova wandikambiya kuti nkhachiti. Ndiponyeni munyanja ndipu chimphepu chimalengi.’ Wo agwiranga ntchitu musitima akhumbanga cha kumuponya kweni iyu wanguŵachichiza. Ŵati amuponya munyanja, mphepu yo yinguleka.

Yona waŵanaŵananga kuti wafwengi. Panyengu yo wabilanga munyanja, iyu wanguromba kwaku Yehova. Pavuli paki, Yehova wangutuma chisomba. Ichu chingumumeza kweni chingumubaya cha. We mumoyu mwa chisomba cho, Yona wanguromba kuti: ‘Ndilayizga kuti ndivwiyengi imwi nyengu zosi.’ Yehova wangusunga Yona mumoyu mwa chisomba kwa mazuŵa ngatatu ndipu pavuli paki wanguchitisa kuti chimuwukuliyi kumutunda.

Pakuti Yehova wangutaska Yona, kumbi venivi ving’anamuwa kuti wakhumbikanga so cha kuluta ku Nineve? Awa. Yehova wangumukambiya so Yona kuti waluti. Pa nyengu iyi Yona wanguvwiya. Iyu wanguluta kweniko ndipu wangukambiya ŵanthu aheni wo ajanga kweniko  kuti: ‘Kwaja mazuŵa 40 ndipu Nineve wambwangandulikengi.’ Pavuli paki panguchitika vinthu vinyaki. Ŵanthu a ku Nineve anguvwiya ndipu angusintha mijalidu yawu yiheni. Fumu ya ku Nineve yingukambiya ŵanthu ŵaki kuti: ‘Rombani kwaku Chiuta ndipu mulapi. Panyaki watinangengi cha.’ Yehova wati wawona kuti ŵanthu wo angulapa, wanguwunanga cha msumba wa Nineve.

Yona wangukwiya chifukwa msumba uwu ungubwangandulika cha. Ŵanaŵaniya fundu iyi: Yehova wanguzikira ndi Yona ndipuso wangumuchitiya lisungu kweni Yona wanguŵachitiya lisungu cha ŵanthu a ku Nineve. M’malu mwaki wanguja pasi pa chimiti cha monu kubwalu kwa msumba ndipu wangukondwa cha. Pavuli paki, chimiti cho chingufwa ndipu Yona wangukwiya. Mwaviyo, Yehova wangumukambiya kuti: ‘Kumbi uchitiya lisungu chimiti m’malu mwakuchitiya lisungu ŵanthu a ku Nineve? Ini ndaŵalongo lisungu ndipu abayika cha.’ Kumbi Yehova wang’anamuwanganji? Ŵanthu a ku Nineve ŵenga akukhumbika ukongwa kuluska chimiti chechosi.