SAMBIRU 8
Josiya Wenga ndi Mabwezi Ngamampha
Kumbi uŵanaŵana kuti kuchita vinthu vamampha nkhwakusuzga?— Ŵanthu anandi aŵanaŵana viyo. Bayibolo lititikambiya kuti venga vakusuzga ukongwa kuti Josiya yo wenga mwana wachiti vinthu vamampha. Kweni wenga ndi mabwezi ngamampha ngo ngangumuwovya. Tiyi tisambiri vinandi vakukwaskana ndi Josiya ndipuso mabwezi ngaki.
Josiya wenga mwana waku Amoni, fumu ya Ayuda. Amoni wachitanga vinthu viheni ukongwa ndipu wasopanga angoza. Awiski ŵati ŵafwa, Josiya wanguja fumu ya Ayuda. Kweni pa nyengu iyi wenga ndi vyaka 8 pe! Kumbi uŵanaŵana kuti nayu wachitanga vinthu viheni nge awiski?— Awa, wachitanga vinthu viheni cha!
Zefaniya wangutcheŵeska ŵanthu kuti aleki kusopa angoza
Chinanga mphanyengu yo wenga munamana, Josiya wakhumbisiskanga kuvwiya Yehova. Mwaviyo, wangusankha kuja pa ubwezi ndi ŵanthu ŵija wo ayanjanga Yehova. Ndipu yiwu angumuwovya kuti wachitengi vinthu vamampha. Kumbi anyaki mwa abwezi aku Josiya ŵenga ayani?
Mubwezi waki munyaki wenga Zefaniya. Zefaniya wenga mchimi yo wangutcheŵeska Ayuda kuti akumanengi ndi soka likulu chifukwa cha kusopa angoza. Josiya wanguvwiya Zefaniya ndipu wasopanga angoza cha kweni wasopanga Yehova.
Munyaki wenga Yeremiya. Iyu wayanananga msinkhu ndi Josiya, ajanga kumoza kweniso akuliyanga limoza. Ayanjananga ukongwa, mwakuti Josiya wati wafwa, Yeremiya wangulemba sumu yakulongo chitima cho wenga nachu chifukwa cha nyifwa yaku Josiya. Yeremiya ndi Josiya awovyananga kuti achitengi vinthu vamampha kweniso kuti avwiyengi Yehova.
Josiya ndi Yeremiya awovyananga kuti achitengi vinthu vamampha
Kumbi ungasambiranji kwaku Josiya?— Chinanga mphanyengu yo wenga munamana, iyu wakhumbisiskanga kuchita vinthu vamampha. Iyu waziŵanga kuti wakhumbikanga kuja pa ubwezi ndi ŵanthu wo ayanjanga Yehova. Nawi uwonesesengi kuti usankha mabwezi ngo ngatanja Yehova kweniso ngo ngangakuwovya kuchita vinthu vamampha.
ŴERENGA M’BAYIBOLO LAKU
Mungayanja Kuŵerenga so Nkhani Izi
BUKU LANGU LA NKHANI ZA M’BAYIBOLO
Fumu Yamampha Yakumaliya ya Yisraele
Weche mnyamata, Josiya wanguchita vinthu mwambula mantha.
