SAMBIRU 3
Rahabe Wangugomezga Yehova
Tiyeruzgiyi kuti te m’msumba wa Yeriko. Msumba uwu we m’charu cha Kanani ndipu ŵanthu a m’msumba uwu agomezga Yehova cha. M’msumba wenuwu ndimu muja Rahabe.
Pa nyengu yo Rahabe wenga munamana, wanguvwa mo Mosese wangupatuliya Nyanja Yiyera ndi kulongozga Ayisraele kutuwa mu Egipiti. Wanguvwa so mo Yehova wanguŵawovye kuti apundi nkhondu. Sonu wavwa kuti Ayisraele azenga msasa pafupi ndi Yeriko.
Rahabe wangubisa askori chifukwa chakuti wagomezganga Yehova
Zuŵa linyaki ndi mazulu, Ayisraele ŵaŵi aluta kuti akawoni msumba wa Yeriko. Ŵanthu yaŵa adanika kuti askori. Afika kunyumba yaku Rahabe. Iyu watiŵalondere ndi kuŵaserezga munyumba. Ndi usiku, Karonga wa ku Yeriko watuvwa kuti m’msumba mwaza askori ndipu ŵe kunyumba kwaku Rahabe. Sonu karonga watuma anthurumi kuti akaŵato. Rahabe wabisa askori wo pachanya pa nyumba yaki ndipu wakambiya anthurumi wo atumika ndi karonga kuti: ‘Mbuneneska, ŵanthu wo anguza kunu kweni aluta, alondoni liŵi, muŵasaniyengi.’ Kumbi waziŵa chifukwa cho Rahabe wabisiya askori?— Chifukwa chakuti wagomezga Yehova ndipu waziŵa kuti wapaskengi Ayisraele charu cha Kanani.
Askori ŵechendatuwi munyumba yaku Rahabe, atimulayizga kuti iyu ndi abali ŵaki azamuvikilirika panyengu yo Yeriko wazamubwangandulika. Kumbi wachiziŵa cho atimukambiya kuti wachiti?— Yiwu atimukambiya kuti: ‘Umangi kachingwi kayera yaka pawindu. Asani uchitengi viyo, weyosi yo wazamuja munyumba yaku wazamutaskika.’ Rahabe wachita vosi vo askori amukambiya. Kumbi wachiziŵa cho chichitikengi pavuli paki?—
Yehova wangutaska Rahabe ndi banja laki
Pajumpha mazuŵa ngamanavi ndipu Ayisraele atamba kuzunguliya msumba uwu mwachisisi. Kwa mazuŵa 6 azunguliya msumba uwu kamoza pazuŵa. Kweni pa zuŵa la 7 azunguliya msumba uwu maulendu 7. Pavuli paki, wosi akambulizga. Yehova wachitiska kuti mpanda wa msumba ugumuki. Kweni nyumba yo ye ndi kachingwi kayera pawindu yagumuka cha. Kumbi wayiwona pachithuzi?— Rahabe ndi banja laki ataskika!
Kumbi wasambiranji kwaku Rahabe?— Rahabe wangugomezga Yehova chifukwa cha vinthu vamampha vo wangusambira vakukwaskana ndi iyu. Nawi so usambira vinthu vinandi vamampha vakukwaskana ndi Yehova. Kumbi nawi ugomezga Yehova nge mo wanguchitiya Rahabe?— Tiziŵa kuti utimugomezga nadi!
