Kutuliya pa unamana waki, Samuele wajanga ndi kuteŵete pachihema, malu ngo ŵanthu achisopiyangapu Yehova. Kumbi uziŵa kuti Samuele wanguchisanirika wuli pachihema? Tiyi tisambiri dankha vakukwaskana ndi Hana, anyina aku Samuele.

Kwa nyengu yitali, Hana wakhumbanga mwana kweni wabalanga cha. Iyu wanguromba kwaku Yehova ndipu wangupempha kuti wamuwovyi. Hana wangukambiya Yehova kuti asani wabalengi mwana munthurumi, wamuperekengi kuti wakajengi ndipuso kuchiteŵete pachihema. Yehova wangumuka rombu laki ndipu wangubala mwana munthurumi. Iyu wangumupaska zina lakuti Samuele. Hana wanguchita nge mo wangulayizgiya, ndipu Samuele wati wafika vyaka vitatu pamwenga vinayi wanguchimupereka kuchihema kuti wakateŵetiyengi Chiuta.

Eli wenga wa sembi mura pachihema. Ŵana ŵaki ŵaŵi anthurumi nawu ateŵetiyanga pachihema. Kumbuka kuti chihema chenga nyumba yaku Chiuta yakusopiyamu ndipu ŵanthu wo ajanga penipo akhumbikanga kuchita vinthu vamampha. Kweni ŵana aku Eli achitanga vinthu viheni ukongwa. Samuele wawonanga vo achitanga. Kumbi Samuele wachitanga vinthu viheni nge ŵana aku Eli?— Awa, iyu wangulutirizga kuchita vinthu vamampha nge mo apapi ŵaki angumusambiziya.

Kumbi uŵanaŵana kuti Eli wakhumbikanga kuchitanji nawu ŵana ŵaki?— Wakhumbikanga kuŵalanga. Wakhumbikanga so kuŵakanizga kuti angateŵetiyanga so panyumba yaku Chiuta cha. Kweni Eli ndivu wanguchita cha, mwaviyo Yehova wangukwiyiya Eli ndi ŵana ŵaki wosi ŵaŵi. Yehova wangusankha kuti waŵalangi.

Zuŵa linyaki usiku, Samuele wati wagona, wanguvwa munthu wachimudana kuti: ‘Samuele!’ Wangutchimbiriya kwaku Eli ndipu iyu wangumukambiya kuti: ‘Ndakudana cha.’ Ivi vinguchitika kwa maulendu ngatatu. Ndipu pa ulendu wachitatu, Eli wangukambiya Samuele kuti asani wachivwa so kudana, wakakambi kuti: ‘Kambani, Ambuya, ndituvwa.’ Venivi ndivu Samuele wanguchita. Pavuli paki, Yehova wangukambiya Samuele kuti: ‘Umukambiyi Eli kuti ndilangengi nyumba yaki chifukwa cha vinthu viheni vo achita.’ Kumbi uŵanaŵana kuti chenga  chipusu kuti Samuele wakambiyi Eli uthenga wenuwu?— Awa, chenga chipusu cha. Chinanga kuti Samuele wenga ndi mantha, kweni wanguchita vo Yehova wangumukambiya. Vo Yehova wangukamba vingufiskika nadi. Ŵana ŵaŵi aku Eli angubayika ndipu Eli nayu wangufwa.

Samuele nchakuwoniyapu chamampha kwaku isi. Iyu wanguchita vinthu vamampha chinanga kuti wawonanga ŵanthu anyaki achichita vinthu viheni. Nanga iwi? Kumbi ujengi nge Samuele ndipu ulutirizgengi kuchita vinthu vamampha? Asani uchitengi viyo, ukondweskengi Yehova ndipuso apapi ŵaku.