Kumbi wawuziŵa Ufumu wo tikamba?— Hinya, ndi Ufumu waku Chiuta. Ufumu wenuwu ndiwu wazamusambusa charu chosi kuti chizije paradayisu. Kumbi ungayanja kuti tisambiri vinandi vakukwaskana ndi Ufumu wenuwu?—

Ufumu wewosi uja ndi fumu. Ndipuso fumu yiwusa ŵanthu a m’charu chaki. Kumbi Fumu ya Ufumu waku Chiuta utiyiziŵa?— Ndi Yesu Khristu. Waja kuchanya. Pambula kuswera yapa wawusengi tosi pa charu. Kumbi uŵanaŵana kuti tazamukondwa asani Yesu wazija Fumu ya charu chosi?—

Tazamukondwa ukongwa! Ŵanthu azamupumana cha pamwenga kuchita nkhondu m’Paradayisu. Ŵanthu wosi azamuyanjana. Palivi yo wazamutama pamwenga kufwa. Wo atondeka kuwona azamuwona, ambula kuvwa azamukuvwa, ŵanthu wo atondeka kwenda azamukwenda ndipuso kutchimbiya. Weyosi wazamuja ndi chakurya chakukwana. Nyama nazu zazamuja mwachimangu ndi nyama zinyaki kweniso isi. Ŵanthu wo akufwa azamuyuskika. Anthurumi ndi anthukazi anandi wo waŵasambira mu kabuku yaka nge Rebeka, Rahabe, Davidi ndi Eliya nawu so azamuyuskika!  Kumbi ungayanja kuti uziwonani nawu asani aziyuskika?—

Yehova watikuyanja ukongwa ndipu wakhumba kuti ukondwengi. Asani ulutirizgengi kusambira vakukwaskana ndi Yehova ndipuso kumuvwiya, wazamuja ndi umoyu wambula kumala m’paradayisu wakutowa! Kumbi ndivu ukhumba?—