PATI pajumpha mazuŵa 10 kutuliya po Yesu wangukwere kuchanya, akusambira ŵaki akukwana 120 anguwungana mu nyumba ku Yerusalemu pa nyengu ya Phwandu la Ayuda pa Pentekoste mu 33 C.E. Mwamabuchibuchi, chiwawa cha nge kuputa kwa mphepu chinguzaza nyumba yosi. Mwakuziziswa, akusambira angwamba kuŵereŵeta vineneru vo yiwu aviziŵanga cha. Kumbi vakuziziswa ivi vang’anamuwanganji? Chiuta wangutumiza mzimu utuŵa kwa akusambira.

Kubwalu kwenga ŵanthu anandi chifukwa chakuti kunguza alendu akutuliya vyaru vakupambanapambana wo anguza pa phwandu lo. Yiwu anguzizwa ukongwa kuvwa akusambira aku Yesu achiŵereŵeta vineneru va ŵanthu wo mwakuvwika umampha. Pakukonkhoska vo vinguchitika, Petro wangukambapu za uchimi waku Yoele wo Chiuta wangukamba kuti, “ndipunguliyengi mzimu” wangu ndipu wo awulondiyengi uŵachitisengi kuti achiti nchitu zakuzizwisa. (Yoele 2:​28, 29) Ukaboni wanthazi wa mzimu utuŵa ungulongole limu pakweru kuti panguchitika kusintha kwakukhumbika ukongwa. Yapa Chiuta wanguleka kwanja Yisraeli ndipu wangwamba kwanja mpingu wasonu wa Chikhristu. Wo akhumbanga kuteŵete Chiuta mwakuzomerezeka akhumbikanga kuja akulondo Khristu.

Pa nyengu iyi suzgu yingukuwa ukongwa ndipu arwani anguŵika akusambira mu jeri. Kweni usiku, m’ngelu waku Yehova wangujula visasa va jeri ndipu wangukambiya akusambira kuti alutirizgi kupharazga. Ndipu kwati kwacha, yiwu anguchita vo m’ngelu wangukamba. Yiwu angusere mu nyumba yakusopiyamu ndipu angwamba kusambiza ŵanthu uthenga wamampha wakukwasana ndi Yesu. Ŵanthu avisopa wo aŵasuskanga angukwiya ukongwa ndipu anguŵakambiya kuti aleki kupharazga. Akutumika wo angumuka mwambula mantha kuti, ‘Titenere kuvwiya Chiuta kuluska munthu.’​—Machitidu 5:​28, 29.

Suzgu yingulutiriya mbwenu. Ndipu Ayuda anyaki akambanga wakusambira Stefano kuti wachitiyanga mutafu Chiuta ndipu angumuponya mya mpaka kufwa. Mnyamata munyaki wa ku Tarso zina laki Saulo, wanguwona vo vinguchitika ndipu iyu wanguzomereza kubayika kwa munthu yo. Pavuli paki, wanguluta ku Damasko kuchimanga so weyosi yo walondonga Khristu. Saulo we mu nthowa, ukweru wakutuwa kuchanya ungumuŵaliya ndipu wanguvwa mazu ngakuti, “Saulo, Saulo, chifukwa chine utindiŵemba ine?” Saulo wanguleka kuwona chifukwa cha ukweru wo ungumuŵaliya ndipu iyu wangufumba kuti, “Mwe ayani, Ambuya?” Iyu wanguvwa kwamuka kuti: “Ine ndine Yesu.”​—Machitidu 9:​3-5.

Pati pajumpha mazuŵa ngatatu, Yesu wangutuma wakusambira ŵaki Hananiya kuti wakachizgi Saulo, kuti wayambi so kuwona. Saulo wangubatizika ndipu wangwamba kupharazga vakukwaskana ndi Yesu mwachiganga. Saulo wangwamba kuziŵika ndi zina lakuti wakutumika Paulo ndipu wenga munthu waphamphu mu mpingu wa Chikhristu.

Akusambira aku Yesu apharazganga uthenga wamampha wa Ufumu waku Chiuta kwa Ayuda ndi Asamaria pe. M’ngelu waku Chiuta wanguwoneke Kornelio, munthu wakopa Chiuta yo wenga so mura wa asilikali Achiroma, ndipu wangumukambiya kuti wakutumika Petro wazengi kwaku iyu. Petro limoza ndi anyaki angupharazgiya Kornelio ndi a m’banja laki. Petro weche kulongoro, mzimu utuŵa unguza pa ŵanthu wo ŵenga Ayuda cha wo ŵenga ndi chigomezgu, ndipu wakutumika wanguŵakambiya kuti abatiziki mu zina laku Yesu. Mwaŵi wakusaniya umoyu wambula kumala ungujulikiya ŵanthu amitundu yosi. Mpingu wosi wenga wakunozgeka kupharazga uthenga wamampha ku vigaŵa vosi.

​—Nkhani iyi yatuliya pa Machitidu 1:1–11:21.