PAFUFUPI vyaka 470, Ayisraele ŵechendasere mu Kanani, Yehova wangulayizga ŵana ŵaku Abrahamu kuti ŵazamuja m’charu cha Kanani. Pa nyengu yo alongozekanga ndi Yoswa, Ayisraele ŵenga pafupi kulonda Charu Chakulayizgika.

Cheruzgu cho Chiuta wangupereka ku ŵanthu a m’charu cha Kanani chenga chakwenere. Yiwu anguchitisa kuti m’charu chosi cha Kanani ŵanthu achitengi ureŵi wakuchitisa soni ndipuso kubaya ŵanthu mwambula lisungu. Mwaviyo, misumba ya mu Kanani yo yinguthereskeka ndi Ayisraele, yakhumbikanga kuti ayinangiyi limu.

Ayisraele ŵechendasere m’charu cho, Yoswa wangutuma asyoli ŵaŵi wo anguchija mu msumba wa Yeriko, kunyumba ya munthukazi yo wadanikanga kuti Rahabi. Iyu wangulonde asyoli ku nyumba kwaki ndipu wanguŵavikiliya chinanga kuti wanguziŵa kuti ŵenga Ayisraele. Rahabi wenga ndi chigomezgu chifukwa chakuti wanguvwa mo Yehova wataskiyanga ŵanthu ŵaki. Iyu wangukambiya asyoli kuti amulayizgi pamasu paki, kuti iyu ndi ŵanthu a m’banja laki azakuŵabaya cha.

Pavuli paki, Ayisraele ŵati asere mu Kanani ndi kuyukiya Yeriko, Yehova wanguchitisa kuti mpanda wa Yeriko uwi mwakuziziswa. Gulu lankhondu laku Yoswa lingusere mu msumba wo mwaliŵiliŵi ndi kuwubwanganduwa kweni Rahabi ndi a m’banja laki anguŵabaya cha. Ndipu Yoswa wangurwa nkhondu zakupambanapambana mwaliŵiliŵi kwa vyaka 6, ndipu iyu wanguthereska vigaŵa vikuluvikulu va m’Charu Chakulayizgika. Pavuli paki mafuku nga Yisraele ngangugaŵana charu cho.

Yoswa wanguteŵete Chiuta kwanyengu yitali, ndipu we pafupi kufwa wanguwunganiska ŵanthu wosi. Iyu wanguŵakumbuska vo Yehova wanguchitiya apapi ŵawu ndipu wanguŵachiska kuti ateŵetiyengi Yehova. Yoswa ndi ŵara wo wateŵetiyanga nawu limoza ŵati ŵafwa, Ayisraele angumuleka Yehova ndipu angwamba kuteŵete a chiuta aboza. Kwa vyaka pafufupi 300, mtundu wa Yisraele wavwiyanga marangu ngaku Yehova, mwanthomwanthomwa. M’nyengu yeniyi, Yehova wanguzomereza arwani ŵawu nge Afilisti kuti aŵabayi. Kweni Ayisraele angumupempha Yehova kuti waŵawovyi ndipu iyu wanguŵapaska ŵakweruzga 12, kuti aŵataski.

Nyengu ya ŵakweruzga yo yikonkhoskeka m’buku la Ŵeruzgi yingwamba ndi Orniele kumaliya ndi Samsoni, munthu yo wenga wanthazi ukongwa pacharu chosi. Fundu yakukhumbika yo yikambika mwakuwerezgawerezga m’nkhani yakukondwesa yo yikulembeka m’buku la m’Bayibolu la Ŵeruzgi njakuti: Kuvwiya Yehova kuzisa vitumbiku ndipu kuleka kuvwiya kuzisa masuzgu.

​—Nkhani iyi yatuliya pa Yoswa; Ŵeruzgi; Ŵalevi 18:​24, 25.