PANYENGU ya mafumu nga Yisraele ndi Yuda, penga kagulu kapade ka anthurumi wo akambanga mazu ngaku Chiuta, ŵanthu ŵenaŵa adanikanga kuti achimi. Ŵanthu yaŵa ŵenga ndi chigomezgu chakukho ndipuso chiganga pakupereka uthenga wa cheruzgu waku Chiuta. Tiyeni tiwoni fundu zinayi zakukhumbika ukongwa zo achimi aku Chiuta angukamba.

1. Kubwangandulika kwa Yerusalemu. Panyengu yo achimi aku Chiuta, Yesaya ndi Yeremiya angwamba kutcheŵeska kuti Yerusalemu wabwangandulikengi ndi kusiyika, ndipu kwaja vyaka vinandi kuti Yerusalemu wabwanganduliki. Yiwu angukonkhoska mwakuvwika umampha ndipu anguvumbuwa chifukwa cho Chiuta wangukwiyiya msumba wo. Vo ŵanthu wo akambanga kuti amiya Yehova venga vaboza, chifukwa nawu achitanga vo visopa vaboza vachitanga nge chinyengu ndipuso viwawa.​—2 Ŵakaronga 21:​10-15; Yesaya 3:​1-8, 16-26; Yeremiya 2:1–3:13.

2. Kwamba so Kusopa Kwauneneska. Ŵanthu aku Chiuta ŵati aja mu ukapolu kwa vyaka 70, atingi afwatulikengi kutuwaku ku Babiloni. Yiwu atingi aweriyengi ku charu chawu cho chingupasuka ndipu atingi akazengengi so nyumba yakusopiyamu yaku Yehova, ku Yerusalemu. (Yeremiya 46:27; Amosi 9:​13-15) Kwati kwaja pafupifupi vyaka 200, Yesaya wangukambiya limu kuti Sirusi, ndiyu watingi wazithereskengi Babiloni, ndi kuzomerezga ŵanthu aku Chiuta kuchiyamba so kusopa kwauneneska. Mchimi Yesaya, wangukonkhoska umampha za nthowa yapade yo Sirusi watingi wagwiriskiyengi nchitu pakuthereska msumba wo.​—Yesaya 44:24–45:3.

3. Kuza kwaku Mesiya ndi vo wangukumana navu. Mesiya watingi wawiyengi mu msumba wa Betelehemu. (Mika 5:2) Iyu watingi waŵengi wakujiyuyuwa, watingi wakajilongongi ku Yerusalemu ndi kukwera pa bulu. (Zekariya 9:9) Chinanga kuti wenga wamampha mtima, kweni iyu watingi waziŵikengi ukongwa cha ndipuso ŵanthu anandi atingi azimukanengi. (Yesaya 42:​1-3; 53:​1, 3) Iyu watingi wafwengi nyifwa yakuŵaŵa. Kumbi wenuwu ndiwu wenga umari waku Mesiya? Awa, chifukwa sembi yaki yatingi yichitisengi kuti maubudi nga ŵanthu anandi ngagowokereki. (Yesaya 53:​4, 5, 9-12) Kuyukiskika kwaki ndiku kwatingi kufiskengi venivi.

4. Muwusu waku Mesiya wa pacharu chosi chapasi. Ŵanthu ambura kufikapu angafiska cha kujiwusa mwa chimangu, kweni Fumu ya Umesiya yatingi yizidanikengi kuti Karonga wa Chimangu. (Yesaya 9:​6, 7; Yeremiya 10:23) Muwusu waki watingi uchitisengi ŵanthu wosi kuja pa chimangu ndipuso chinanga ndi nyama zosi za m’chilengedu. (Yesaya 11:​3-7) Kutama kwazamumala. (Yesaya 33:24) Chinanga ndi nyifwa yazamuŵaku so cha. (Yesaya 25:8) Panyengu ya muwusu waku Mesiya, ŵanthu akufwa azamuyukiskika ndipu azamuja ndi umoyu pacharu chapasi.​—Danyele 12:13.

​—Nkhani iyi yatuliya m’buku la Yesaya, Yeremiya, Danyele, Amosi, Mika ndi Zekariya.