KWA vyaka vinandi ŵana a Ayisraele anguja mu Egipiti, yiwu ŵenga ndi vinthu vinandi ndipu anguyandana. Farao munyaki wangwamba kuwusa. Fumu iyi yamuziŵanga cha Yosefe. Wakuwusa wankhaza mwenuyu, wawopanga Ayisraele chifukwa ŵenga anandi ndipu wanguŵasambuska kuti aje akapolu ndipuso wangulangula kuti ŵana wosi anthurumi wo anguwaku aponyeki mu Msinji wa Nile. Kweni munthukazi munyaki wachiganga wanguvikiliya mwana waki ndipu wangumubisa mu chiteti cho wanguchichiŵika mukati mwa mateti ngo ngenga m’mphepeti mwa msinji. Mwana waku Farao ndiyu wangumusaniya mwana mweneyu, iyu wangumudana zina lakuti Mosese. Ndipu wanguchimulera mu nyumba ya chifumu ku Egipiti.

Panyengu yo Mosese wenga ndi vyaka 40, iyu wenga mu suzgu chifukwa wangutaska mu Yisraele ku munthu wa Chiegipiti yo wagwirisanga nchitu Ayisraele mwankhaza. Mosese wanguthaŵiya ku charu chakutali ko wanguchija nge mulendu. Panyengu yo Mosese wenga ndi vyaka 80, Yehova wangumuweze ku Egipiti kuti wakakumani ndi Farao ndi kumukambiya kuti wafwatuwi ŵanthu aku Chiuta.

Farao wangukana kwa mutu wa garu. Sonu Chiuta wanguzisa milili 10 mu Egipiti. Nyengu yeyosi yo Mosese walutanga kwaku Farao kumupaska mwaŵi kuti mulili uleki kumuwiya, Farao wakananga ndipu wanguzomereza cha vo Mosese ndi Chiuta waki Yehova, amukambiyanga. Pakumaliya, mulili wa nambala 10, unguchitisa kuti ŵana wosi aumwali wo ŵenga mu Egipiti afwi kupatuwaku mabanja ngo nganguvwiya Yehova mwakupaka ndopa za mbereri yo angupereka sembi, pachanya pa khomu la nyumba zawu. M’ngelu waku Chiuta yo wanguzibaya ŵana wosi aumwali wazijumphanga nyumba zosi zo zingupakika ndopa. Pavuli paki, Ayisraele akumbukiyanga kutaskika kwakuziziswa kwenuku, mwa kuchita sekeresu chaka ndi chaka lo ladanikanga kuti Phaska.

Mwana waki waumwali wati wafwa, Farao wangulangula Mosese ndi Ayisraele wosi kuti atuwi mu Egipiti. Yiwu anguwunganiska wumba mwaliŵiliŵi kuti atuwi mu Egipiti. Kweni Farao wangusintha maŵanaŵanu ngaki. Iyu ndi asilikali anandi apa magareta anguŵalondo. Ayisraele anguwoneka kuti angusoŵa kwakuthaŵiya ŵati afika pa Nyanja Yiyera. Yehova wangugaŵa Nyanja Yiyera ndipu Ayisraele angudumuwa pakati pa nyanja pamchenga wakumira. Panyengu yo Aegipiti anguŵalondo mu nyanja, Chiuta wanguchitisa maji ngo ngangugaŵika kuti ngaweriyepu ndi kubizga Farao ndi ankhondu ŵaki.

Pavuli paki, anguzenga musasa pafupi ndi Phiri la Sinai ndipu Yehova wanguchita nawu phanganu. Mwakugwiriskiya nchitu Mosese nge mwendapakati, Chiuta wangupaska Ayisraele marangu kuti ngaŵalongozgengi ndi kuŵavikiliya pa chakuchitika chechosi cha umoyu wawu. Asani Ayisraele anguzomereza muwusu waku Chiuta mwakugomezgeka, Yehova watingi waŵengi nawu ndipu watingi wachitisengi mtundu wawu kuja thumbiku ku ŵanthu anyaki.

Kweni Ayisraele anandi angumukwiyisa Chiuta chifukwa chakuleka kugomezgeka. Mwaviyo, Yehova wanguchitisa kuti mtundu wo, uzunguliyi mu chipululu kwa vyaka 40. Pavuli paki, Mosese wangulangula kuti Yoswa munthu yo wenga murunji, wasere m’malu ngaki. Ndipu pakumaliya, Ayisraele ŵenga akunozgeka kusere m’charu cho Chiuta wangulayizga Abrahamu.

​—Nkhani iyi yatuliya pa Chituwa; Ŵalevi; Maŵerengedu; Marangu; Sumu 136:​10-15; Machitidu 7:​17-36.