Nchifukwa Wuli Tikhumbika Kusambira Bayibolu?
Kumbi mutiliziŵa umampha Bayibolu? Palivi buku lelosi m’mbiri yosi ya ŵanthu lo lagaŵika ukongwa kuruska Bayibolu. Ŵanthu amitundu yosi awona kuti uthenga wo we m’Bayibolu ngwakupembuzga, upaska chilindizga ndipuso ulongozgi waki ngwakovya pa umoyu widu wa zuŵa ndi zuŵa. Kweni ŵanthu anandi mazuŵa nganu atiliziŵa ukongwa cha Bayibolu. Kaya mwe muchisopa pamwenga cha, panyaki mukhumbisiska kuliziŵa Bayibolu. Kabuku yaka, kanozgeka kuti kakuziŵiskeni vo ve m’Bayibolu.
MWECHENDAYAMBI kuŵerenga Bayibolu, nkhwakukhumbika kuziŵa fundu zimanavi zakukwaskana ndi mo Bayibolu lilili. Bayibolu, lo liziŵika so kuti Malemba Ngakupaturika, likupangika ndi mabuku 66 kwambiya ndi buku la Chiyambo kumaliya ndi buku la Chivumbuzi.
Kumbi mlembi wa Bayibolu ndi yani? Tikhumbika kuziŵa kwamuka kwa fumbu ili. Fundu njakuti, Bayibolu likulembeka ndi anthurumi 40, kwa vyaka vakujumpha 1, 600. Chakuziziswa nchakuti, ŵanthu wo akulemba Bayibolu, angukambapu cha kuti ndiwu akulilemba. Yumoza mwa ŵanthu wo akulemba Bayibolu, wakulemba kuti: ‘Malemba ngosi ngakuuzirika ndi Chiuta.’ (2 Timote 3:16) Munyaki so yo wakulemba nawu Bayibolu, wakukamba kuti: “Mzimu wa Ambuya [Yehova] ulongolore mwangu, mazu ghake ghe pa lilimi langu.” (2 Samuele 23:2) Mwaviyo, wo akulemba Bayibolu, akukamba kuti Yehova Chiuta, Fumu Yila Yakuwusa chilengedu chosi ndiyu Mlembi wa Bayibolu. Ŵanthu wo akulemba Bayibolu akulongo kuti Chiuta wakhumba kuti ŵanthu amuziŵi.
Pe fundu yinyaki yakukhumbika ukongwa kuti tiliziŵi umampha Bayibolu. Bayibolu losi le ndi fundu yikulu yimoza yakuti: Yehova ndiyu wakwenere kuwusa mtundu wa ŵanthu kuziya mu Ufumu waki wakuchanya. M’nkhani zakunthazi, muwonengi kuti fundu yikulu yeniyi, yisanirikengi kwambiya m’buku la Chiyambo mpaka Chivumbuzi.
Mweche ndi fundu zenizi mu maŵanaŵanu, ŵanaŵaniyani so uthenga wo usanirika m’buku lakuziŵika ukongwa, Bayibolu.
^ ndimi 9 Pe nthowa zakupambanapambana zakulembe madeti. M’kabuku yaka, C.E. wang’anamuwa “Yesu wati waza” ndipu B.C.E. wang’anamuwa “Yesu wechendazi.” Muwonengi madeti ngenanga m’mphata mwa peji lelosi.
Mungayanja Kuŵerenga so Nkhani Izi
VAKUKWASKANA NDI ISI
Ntchifukwa Wuli Tikhumbika Kusambira Bayibolu?—Vidiyo Yosi
Bayibolu limuka mafumbu nga ŵanthu mamiliyoni nganandi pacharu chosi ngakukwaskana ndi umoyu. Kumbi mungayanja kuja mu gulu la ŵanthu ŵenaŵa?
