Wakwanjiwa muteŵeti munyidu:

Nge mo muziŵiya, Bayibolu likamba ukongwa vakukwaskana ndi ŵanthu. Anandi mwa ŵanthu ŵenaŵa ŵenga anthurumi ndi anthukazi akugomezgeka wo akumananga ndi masuzgu ngakuyanana ndi ngo nasi tikumana nangu. Yiwu ŵenga ‘ŵanthu nge ndisi.’ (Yakobe 5:17) Anyaki aweriyanga vuli chifukwa cha masuzgu kweniso kusuzgika maŵanaŵanu. Anyaki aguŵiskikanga ndi ŵanthu a mubanja lawu pamwenga ateŵeti anyawu. Penipo anyaki asuzgikanga maŵanaŵanu chifukwa cha vinthu vo angunangiska.

Venivi vinguchitiska kuti anyaki mwa ŵanthu ŵenaŵa aleki kuteŵete Yehova. Kweni kumbi anguleke limu kumuteŵete? Awa. Anandi anguchita vinthu nge wakulemba sumu yo wanguromba kuti: ‘Ndiyingayinga nge mbereri yakusoŵa. Ndipenjeni ndamteŵeti winu, pakuti marangu nginu ndangaluwa cha.’ (Sumu 119:176) Kumbi namwi mungakamba viyo?

Yehova watiŵaluwa cha ateŵeti ŵaki wo ŵenge mbereri zo zasoŵa. Iyu watiŵawovya ndipu kanandi wagwiriskiya ntchitu ateŵeti anyawu. Mwakuyeruzgiyapu, ŵanaŵaniyani mo Yehova wanguwovye muteŵeti waki Jobu, yo wangukumana ndi masuzgu nganandi kusazgapu kumala kwa chuma chaki, kufwa kwa ŵanthu a mubanja laki ndipuso matenda. Jobu wanyozekanga ndi ŵanthu wo akhumbikanga kumuwovya kweni wangukunthiyapu. Chinanga kuti nyengu yinyaki wangwamba kuŵanaŵana uheni kweni iyu wangumusiya cha Yehova. (Jobu 1:22; 2:10) Kumbi Yehova wangumuwovya wuli Jobu kuti wayambi so kuŵanaŵana umampha?

Yehova wanguwovya Jobu mwakugwiriskiya ntchitu Elihu, muteŵeti munyaki. Jobu wachikonkhoska masuzgu ngaki, Elihu wavwisiyanga. Ivi vingumuchitiska kuti wamukepu. Kumbi watingi wamukambiyengenji? Kumbi watingi wamunyozengi, wamumbengi mulandu pamwenga kumuchitiska soni, po wamuwovyanga kuti wasinthi maŵanaŵanu? Kumbi Elihu wangujiwona kuti waluskanga Jobu? Ndipu venge cha! Mwakuwovyeka ndi mzimu waku Chiuta, Elihu wangukamba kuti: ‘Nani ndenge yimwi pamasu paku Chiuta wauneneska; nani ndikuwumbika kutuliya ku dongu.’ Pavuli paki wangukambiya Jobu kuti: ‘Nde wakofya cha kuti mundiwopi, vo ndikambengi vitenere cha kumusuzgani.’ (Jobu 33:6, 7) M’malu mwakusazgiyaku masuzgu ngo Jobu wenga nangu, Elihu wangumupaska ulongozgi mwachanju ndipuso wangumuchiska.

Ziŵani kuti isi a Wupu Wakulongozga, tanozga kabuku yaka kuti tikuchiskeni ndipuso tikupaskeni ulongozgi mwachanju. Chakwamba, tinguvwisiya vo ŵanthu anyaki wo angulanda angutikonkhoske ndipu tinguŵanaŵaniya mwakuphwere vo vinguŵachitikiya. (Nthanthi 18:13) Pavuli paki, tinguromba ndipu tingwamba kusanda nkhani zo ze m’Bayibolu za mo Yehova wanguwovye ateŵeti ŵaki akali pa nyengu yo angulanda. Pakumaliya, tingusazga nkhani za m’Bayibolu zenizi ndi vo vichitika mazuŵa nganu kuti tinozgi kabuku yaka. Titikupemphani kuti muŵerengi kabuku yaka. Ziŵani kuti titikuyanjani ukongwa.

Wupu Wakulongozga wa Akaboni aku Yehova