Peturo wanguvwisa vo Yesu wangukamba kuti asani ŵanthu aguŵiskana, akhumbika kukambiskana dankha pakuŵija. Kweni Peturo wakhumbanga kuziŵa kuti munthu wakhumbika kugowoke munyaki maulendu ngakukwana ngalinga.

Peturo wangufumba kuti: “Ambuya, kumbi mubali wangu ndingamugowoke maulendu ngalinga asani watindinangiya? Kumbi ndingamugowoke maulendu 7?” Alongozgi anyaki avisopa asambizanga kuti munthu wakhumbika kugowoke munyaki maulendu ngatatu pe. Mwaviyo, Peturo wawonanga kuti kugowoke munthu mpaka “maulendu 7” ndikuti wamulongo lisungu likulu.—Mateyu 18:21.

Chinanga kuti Peturo waŵanaŵananga viyo, kweni kuŵerenga maulendu ngo munyaku wakuguŵiska, kukoliyana cha ndi vo Yesu wasambizanga. Mwaviyo, Yesu wangukambiya Peturo kuti: “Nditikukambiya, ungamugowokiyanga maulendu 7 pe cha kweni maulendu 77.” (Mateyu 18:22) Venivi ving’anamuwa kuti munthu watenere kugowoke anyaki nyengu zosi. Peturo wakhumbikanga cha kuŵerenga maulendu ngo watenere kugowoke munthu weyosi yo wamunangiya.

Yesu wangukambiya Peturo ndi anyaki ntharika yakulongo kuti atenere kugowoke anyawu. Ntharika iyi, yakambanga za kapolu yo wangutondeka kuyezga mbuyaki yo wenga wa lisungu. Fumu yakhumbanga kulonda ngongoli kwa akapolu ŵaki. Kapolu munyaki yo wangukongola ndalama zakukwana matalente 10,000 [madinari 60,000,000] anguza nayu kwa fumu. Kweni kapolu mwenuyu watingi wawezengi cha ndalama zosi izi. Mwaviyo, fumu yo yingulamula kuti kapolu uyu, muwolu waki kweniso ŵana ŵaki wosi agulisiki kuti awezi ngongoli. Kapolu uyu wati wavwa venivi, wanguwa pasi ndi kugwadiya fumu yo, ndipu wangukamba kuti: “Chondi ndilindizgenipu ŵaka kamanavi, ndiwezengi ngongoli yosi.”—Mateyu 18:26.

Fumu iyi yati yavwa pemphu la kapolu waki, yinguchita lisungu ndipu yingumugowoke ngongoli yosi. Fumu yati yamugowoke, kapolu mwenuyu wanguluta kwa kapolu munyaki yo wenga nayu ndi ngongoli ya madinari 100. Iyu wangukonya kapolu munyaki ndi kwamba kumufyeka pakhosi. Ndipu wangumukambiya  kuti: “Ndiweze vosi vo ungubwereka kwaku ini.” Kweni kapolu munyaki yo, wanguwa pasi ndi kwamba kumuŵeyere kuti: “Ndilindizgenipu ŵaka kamanavi, ndikuweziyeningi ngongoli yinu.” (Mateyu 18:28, 29) Kweni vo kapolu mwenuyu wanguchitiya munyaki, venga vakupambana ukongwa ndi vo fumu yingumuchitiya. Iyu wanguto kapolu munyaki yo wenga nayu ndi ngongoli yimana ndipu wangumuŵika mujeri kuti wakaje mwenimo mpaka po wazamuweze ngongoli yo.

Pavuli paki, Yesu wangukamba kuti akapolu anyaki anguwona vo kapolu wambula lisungu mwenuyu wanguchitiya munyaki ndipu anguchikambiya mbuyawu. Mbuyaki wati wavwa venivi, wangukwiya ukongwa ndipu wangudanisa kapolu mwenuyu ndi kumukambiya kuti: “Kapolu wabwekabweka yiwi, ini ndingukugowoke ngongoli yaku yosi wati wandiŵeyere. Sonu watondekiyanji kumulenge lisungu kapolu munyaku nge mo ini ndingukulenge lisungu?” Fumu yeniyi yingukwiya ukongwa ndipu yingumupereka kwa asilikali kuti amuŵiki mujeri mpaka po waweze ngongoli yosi. Pakumaliya, Yesu wangukamba kuti: “Ada akuchanya nawu azamuchita namwi mwakuyanana, asani muleka kugowoke abali ŵinu ndi mtima wosi.”—Mateyu 18:32-35.

Ntharika iyi, yititisambiza kuti nasi tikhumbika kugowoke anyidu. Chiuta wakutigowoke ngongoli yikulu ya ubudi. Chechosi cho Mkhristu munyidu wangatinangiya kaya chingaŵa chikulu wuli, chingayanana cha ndi ubudi wo Chiuta wakutigowoke. Kusazgapu pa fundu iyi, Yehova watitigowoke kamoza pe cha kweni maulendu nganandi ukongwa. Kumbi nasi titenere cha kugowoke anyidu maulendu nganandi chinanga kuti tingaja ndi chifukwa chakudandauliya? Nge po Yesu wangusambiziya pa Upharazgi waki wa Paphiri, Chiuta watigowokiyengi “vo tinangisa nge mo nasi tigowoke ŵanthu wo atitinangiya.”—Mateyu 6:12.