Ŵanthu achitanga vinthu mwakukoliyana ndi mo mtima wawu wenge asani ŵavwa pamwenga awona vo Yesu wachitanga. Venivi vinguwoneke po Yesu wenga munyumba yinyaki ku Galileya. Mfarisi munyaki zina laki Simoni wangudana Yesu kuti akaryiyi limoza chakurya. Panyaki Simoni wakhumbanga kuti wakachezi ndi Yesu yo wachitanga vakuziziswa. Yesu wanguwona kuti wenga mwaŵi wakuti wakapharazgiyi ŵanthu anyaki wo angudanika. Mwaviyo, wanguzomera nge po wanguchitiya nyengu yinyaki wati wadanika, ndipu wangurya limoza chakurya ndi akusonkhesa msonkhu kweniso ŵanthu akubuda.

Yesu angumulonde nge po alondiyanga alendu anyaki cha. Kali ku Palestine, asani munthu watenda mumisewu ya fuvu ndipu wavwala masandasi, wambutanga ukongwa kweniso wavwanga kufunda maphazi. Mwaviyo, kwenga mwambu wakuti asani mulendu weyosi wafika panyumba, amusambisanga maphazi ndi maji ngakuzizira. Kweni Yesu angumulonde viyo cha. Ndipu angumufyofyontha cha nge po achitiyanga asani alonde mulendu. Mwambu unyaki wo achitanga wenga wakudira mulendu mafuta pamutu kulongo kuti amulondere umampha. Kweni Yesu angumuchitiya cha vosi ivi. Kumbi penapa yiwu angumulondere nadi Yesu?

Alendu wosi anguzunguliya thebulu ndipu angwamba kurya. Achirya, munthukazi munyaki yo wanguleka kudanika wanguza mwachisisi. Iyu “waziŵikanga mutawuni yo kuti ngwakubuda.” (Luka 7:37) Chinanga kuti ŵanthu wosi mbakubuda, kweni viwoneka kuti munthukazi uyu wenga ndi mijalidu yiheni ndipu panyaki wenga huli. Iyu watenere kuti wanguvwa vo Yesu wasambizanga ndipuso panyaki wanguvwa Yesu wachikambiya ŵanthu ‘wosi akulakatuka ndi ntchitu ndipuso akufyoka ndi katundu muzitu, kuti azi kwaku iyu kuti waŵasisipuwi.’ (Mateyu 11:28, 29) Vo Yesu wasambizanga kweniso kuchita, vingumukwaska ukongwa munthukazi mwenuyu ndipu wangwamba kupenja Yesu mpaka wangumusaniya.

Munthukazi uyu wachiza, wanguziya kumsana kwaku Yesu ndipu wangugwada kumaphazi ngaku Yesu. Pavuli paki, wangwamba kuliya ndipu masozi ngaki ngawiyanga pamaphazi ngaku Yesu ndipu wangapuputanga ndi sisi laki. Iyu wangufyofyontha malundi ngaku Yesu ndipu wangungadila mafuta ngakununkhira ngo wanguza nangu. Simoni wawonanga vo vachitikanga kweni wangukoliyana navu cha. Ndipu mumtima mwaki wangukamba kuti: “Asani munthu uyu wenga mchimi nadi, mphanyi wamuziŵa munthukazi yo watimukwaska kuti ngwamtundu wuli. Iyu watingi waziŵengi kuti ngwakubuda.”—Luka 7:39.

Yesu wati waziŵa vo Simoni waŵanaŵananga, wangumukambiya kuti: “Simoni ndikhumba kuti ndikukambiyi kanthu kanyaki.” Simoni wanguti: “Kambani Msambizi!” Ndipu Yesu wangulutirizga kukamba kuti: “Ŵanthu ŵaŵi angubwereka ndalama ku munthu munyaki wakubwerekesa ndalama; munyaki wangubwereka madinari 500, kweni munyaki 50. Ŵati asoŵa chakuti awezi, wosi ŵaŵi wanguŵagowoke ndi mtima wosi. Sonu pa ŵanthu ŵaŵi yaŵa, ndiyani yo wangayanja ukongwa wakubwerekesa?” Simoni watenere kuti wangukondwa cha ndi vo Yesu wangukamba ndipu wangumuka kuti: “Ndiwona kuti ndi yo wangumugowoke ndalama zinandi.”—Luka 7:40-43.

Yesu wanguzomereza vo Simoni wangukamba. Pavuli paki, Yesu wangung’anamukiya ko kwenga munthukazi yo ndipu wangukambiya Simoni kuti: “Wamuwona munthukazi uyu? Ini ndasere munyumba mwaku munu, kweni wandipaska cha maji ngakuti ndisambi maphazi. Kweni munthukazi uyu wazumbwisa maphazi ngangu ndi masozi ngaki ndipu wangapuputa ndi sisi laki. Yiwi wandifyofyontha cha, kweni po ndaselere munu munthukazi uyu waleka cha kufyofyontha maphazi ngangu.” Yesu wanguwona kuti vo munthukazi uyu wanguchita vingulongo kuti walapa maubudi ngaki kutuliya pasi pa mtima. Mwaviyo, Yesu wangukamba kuti: “Nditikukambiya kuti, maubudi nga munthukazi uyu ngagowokereka chinanga kuti nganandi, chifukwa walongo chanju chikulu. Kweni yo wagowokereka maubudi ngamanavi watuŵa ndi chanju chimana.”—Luka 7:44-47.

Vo Yesu wanguchita vilongo kuti iyu wazomerezanga mijalidu yiheni cha. M’malu mwaki, vilongo kuti wavwisa kweniso wachitiya lisungu ŵanthu wo achita maubudi ngakulungakulu wo ajivwiya chitima ndi vo achita ndipu asintha ndi kuza kwaku Khristu kuti waŵawovyi. Ndipu tikayika cha kuti munthukazi uyu wanguchiskika ukongwa wati wavwa vo Yesu wangukamba kuti: “Maubudi ngaku ngagowokereka. . . . Chivwanu chaku chakutaska, luta mu chimangu.”—Luka 7:48, 50.