Yairo wanguwona kuti Yesu wanguchizga munthukazi yo wasuluwanga ndopa. Mwaviyo, wakayikiyanga cha kuti Yesu wangachizga mwana waki munthukazi chinanga kuti pa nyengu iyi waŵanaŵananga kuti ‘mwana waki watenere kuti wafwa.’ (Mateyu 9:18) Kumbi mwana mwenuyu watingi wachizgikengi nadi?

Yesu weche kulongoro ndi munthukazi yo wangumuchizga, kunguza anthurumi anyaki wo angutuwa kunyumba yaku Yairo ndipu angumukambiya kuti: “Mwana winu wafwa!” Yiwu angumukambiya so kuti: “Lekani kumusuzga Msambizi!”​—Mariko 5:35.

Uthenga uwu wenga wakupaska chitima ukongwa. Ndipu pa nyengu iyi, Yairo yo ŵanthu amutumbikanga ukongwa mu chigaŵa chaki, wangumala zeru chifukwa mwana waki munthukazi yumoza pe wangufwa. Yesu wati wavwa nkhani yeniyi, wangung’anamukiya Yairo ndipu wangumuchiska mwakumukambiya kuti: “Ungawopanga cha, ja ŵaka ndi chivwanu.”​—Mariko 5:36.

Pavuli paki, Yesu wanguluta kunyumba yaku Yairo. Ŵati ŵafika, angusaniya chibumuzi cha ŵanthu wo aliyanga kweniso ŵanthu ajipumanga pa chifuŵa chifukwa cha chitima. Yesu wati wasere munyumba, wangukamba mazu ngo nganguziziswa ŵanthu. Iyu wanguti: “Mwana uyu wafwa cha, kweni wagona.” (Mariko 5:39) Ŵanthu ŵenaŵa angumuseka Yesu ŵati ŵavwa mazu ngenanga chifukwa chakuti anguziŵa kuti mwana mwenuyu wafwa nadi. Kweni chifukwa chakuti Yesu wangupaskika nthazi ndi Chiuta, iyu wangulongo kuti asani munthu wafwa, wangayuskika nge po munthu wachitiya asani wagona tulu.

Pa nyengu iyi, Yesu wangukambiya ŵanthu wosi kuti atuliyi kubwalu kupatuwaku Peturo, Yakobe, Yohane ndipuso apapi a mwana yo wangufwa. Pavuli paki, Yesu limoza ndi ŵanthu 5 ŵenaŵa anguluta ko angugoneka mwana mwenuyu. Pavuli paki, Yesu wanguko janja la mwana mwenuyu ndipu wangukamba kuti: “‘Talita kumi,’ mazu ngo ngang’anamuwa kuti: ‘Msungwana, nditikukambiya, yuka!’” (Mariko 5:41) Nyengu yeniyo, iyu wanguyuka ndipu wangwamba kwenda. Ŵanaŵaniyani likondwa lo Yairo ndi muwolu waki ŵenga nalu ŵati awona kuti mwana wawu wayuskika! Pakukhumba kulongo kuti mwana uyu wayuskika nadi, Yesu wanguŵakambiya kuti amupasi chakurya.

Kumbukani kuti nyengu yinyaki Yesu wakambiyanga ŵanthu wo waŵachizganga kuti angakambiyanga ŵanthu cha vo iyu waŵachitiya. Venivi ndivu so wangukambiya apapi a mwana mwenuyu. Chinanga kuti venga viyo, nkhani iyi yinguwanda “muchigaŵa chosi.” (Mateyu 9:26) Mphakuvwika kuti weyosi wangakondwa ukongwa asani wawona mubali pamwenga mubwezi waki yo wangufwa wayuskika. Mwana uyu, wenga munthu wachiŵi kuyuskika ndi Yesu.