Muzi wa Betaniya wenga kuvuma kwa Phiri la Maolivi ndipu muzi wenuwu wenga pa mtunda wa makilomita ngatatu kutuwa ku Yerusalemu. (Yohane 11:18) Mariya ndi Marita ajanga mumuzi wenuwu ndipu Yesu wanguluta kunyumba kwawu. Yiwu ajanga so ndi mzichi wawu Lazaro. Wosi ŵenga mabwezi ngaku Yesu ndipu angumulonde umampha.

Venga vakukondwesa ukongwa kuti Mesiya wazi kunyumba kwawu kuzicheza. Marita wakhumbisiskanga kuti wamulonde umampha Yesu. Mwaviyo, wangwamba kunozga chakurya chakupambanapambana. Marita wachibika, mvurwa waki Mariya wanguja po penga Yesu ndipu wavwisiyanga vo Yesu wasambizanga. Pavuli paki, Marita wangukambiya Yesu kuti: “Ambuya, kumbi muwona cha kuti mvurwa wangu wandisiliya ndija ntchitu zosi? Mukambiyeni kuti wazindiwovyeku.”—Luka 10:40.

M’malu mwakukambiya Mariya kuti waluti wakawovyi mku waki, Yesu wangupaska Marita ulongozgi wakuti watenere cha kuŵanaŵaniya ukongwa vinthu vakuliŵavu. Iyu wanguti: “Marita, Marita, ntchifukwa wuli ufipa mtima kweniso utimbanyizgika ndi vinthu vinandi? Kweni pe vinthu vimanavi ŵaka vo vikhumbika, akhumba so ntchimoza pe. Mariya wasankha chinthu chamampha ukongwa, ndipu chinthu chenichi chazamulondeka cha kwaku iyu.” (Luka 10:41, 42) Fundu yaku Yesu yenga yakuti Marita wakhumbikanga cha kumaliya nyengu yinandi wachibika chakurya chakupambanapambana. Chakurya chambula kusuzga kubika chenga chakukwana.

Vo Marita wachitanga venga vamampha. Iyu wakhumbanga kumulonde umampha Yesu. Kweni chifukwa chakuti iyu wanguŵika mtima waki wosi pachakurya cho wabikanga, vingumuchitisa kuti waleki kusambira ulongozgi wakukhumbika ukongwa wakutuliya ku Mwana waku Chiuta. Mwaviyo, Yesu wangusimikiziya Mariya kuti wangusankha umampha chifukwa vo wasambiranga vingumuwovya kwa umoyu waki wosi. Lenili ndi sambiru lamampha so ukongwa kwaku isi.

Nyengu yinyaki Yesu wangukonkhoska so sambiru lakukhumbika ukongwa. Wakusambira waki munyaki wangumufumba kuti: “Ambuya, tisambizeni kupemphera nge mo Yohane wakusambiziya akusambira ŵaki.” (Luka 11:1) Pa nyengu iyi, ndipu pajumpha chaka ndi hafu kutuliya po Yesu wangusambiziya nkhani yeniyi pa Upharazgi waki wa Paphiri. (Mateyu 6:9-13) Kweni Yesu wachisambiza pa nyengu iyi wakusambira mwenuyu watenere kuti pengavi. Mwaviyo, Yesu wanguwereza so fundu zakukhumbika zo wangukonkhoska. Pavuli paki, wangukamba ntharika yo yikonkhoska kukhumbika kwakuchita chitatata pakupemphera.

Yesu wanguti: “Tiyeruzgiyi kuti yumoza waku yimwi we ndi munyaki ndipu waluta kwaku iyu pakati pa usiku ndi kumupempha kuti, ‘Ayimwi, ndibwerekeniku viŵandi vitatu, chifukwa sonu viyo kwaza munyangu kutuliya kutali ndipu ndilivi chakurya chakuti ndimupaski.’ Kweni iyu wamukiya munyumba kuti: ‘Leka kundisuzga ini. Ndajala kali chisasa, ndipu ini ndi ŵana ŵangu tagona kali. Ndingayuka cha kuti ndikupaski kanthu.’ Nditikuneneskiyani, chinanga kuti wangakhumba cha kuyuka kuti wamupaski kanthu nge mubwezi waki, kweni chifukwa cha kupempha mwachitatata wangayuka ndi kumupaska chechosi cho wakhumba.”—Luka 11:5-8.

Yesu pakukamba ntharika iyi wang’anamuwanga kuti Yehova waleka kukhumba cha kuti wamuki vo titimupempha. M’malu mwaki wangulongo kuti asani munthu yo wakonkhoskeka muntharika iyi wanguyuka kuti wawovyi mubwezi waki yo wangupempha mwachitatata, vititisimikiziya kuti Awusefwi akuchanya wo atitiyanja ukongwa amuka mapempheru ngakuŵeyere ngakutuwa kwa ateŵeti ŵawu akugomezgeka. Yesu wangulutiriza kukamba kuti: “Nditikukambiyani kuti, lutirizgani kupempha ndipu mupaskikengi; lutirizgani kupenja ndipu musaniyengi; lutirizgani kugong’oska ndipu kukujulikiyeningi. Pakuti weyosi yo wapempha walonde, weyosi yo wapenja wasaniya, ndipu weyosi yo wagong’oska wajulikiya.”—Luka 11:9, 10.

Pavuli paki, Yesu wangulongo kukhumbika kwa fundu yo iyu wangukamba ndipu wanguyeruzgiya ndi vo da wachita ndi ŵana ŵaki. Iyu wanguti: “Ndiyani waku yimwi yo asani mwana waki wangamupempha somba, wangamupaska njoka mumalu mwa somba? Pamwenga asani wangamupempha zira, wangamupaska chipiriri? Sonu, asani yimwi chinanga kuti mwe aheni muziŵa kupereka mphasu zamampha ku ŵana ŵinu, Awusemwi akuchanya angatondeka wuli kupereka mzimu wakupaturika ku ŵanthu wo atiŵapempha?” (Luka 11:11-13) Venivi vititisimikiziya kuti Yehova ngwakukhumbisiska kuvwisiya vo isi tipempha kweniso kutipasa vo tikhumbikiya.