Mawa laki, pa Sabata Nisani 9, Yesu ndi akusambira ŵaki angutuwaku ku Betaniya, ndipu anguselere ku Yerusalemu. Pa nyengu yo ŵenga pafupi kufika ku Betifage, tawuni yo yenga pa Phiri la Maolivi, Yesu wangukambiya akusambira ŵaki ŵaŵi kuti:

“Lutani mumuzi wo we panthazi po ndipu mwamusaniya bulu yo amumangiriya kweniso mwana waki. Kaŵafwatuweni ndi kuza nawu kwaku ini. Asani munthu munyaki wachikufumbani mukakambi kuti, ‘Ambuya atiŵakhumba.’ Asani mwachikamba ŵaka viyo, wakukupaskani nyengu yeniyo.”—Mateyu 21:2, 3.

Akusambira aku Yesu anguziŵa cha kuti vo wanguŵakambiya vakoliyananga ndi uchimi wa m’Bayibolu. Kweni pati pajumpha nyengu, yiwu anguziŵa kuti vo vinguchitika vingufiska uchimi waku Zekariya. Zekariya wangukambiya limu kuti Fumu yo Chiuta wangulayizga yazamusere mu Yerusalemu ‘mwakujiyuyuwa ndipuso yazamukwera pabulu, pakamwana kabulu, pakabulu kanthulumi, kamwana ka bulu munthukazi.’—Zekariya 9:9.

Akusambira aku Yesu ŵati afika ku Betifage, angwamba kufwatuwa kabulu kanthulumi ndi anyina. Ŵanthu wo anguma pafupi ŵati awona venivi angufumba kuti: “Ntchifukwa wuli mufwatuwa bulu?” (Mariko 11:5) Kweni yiwu ŵati ŵavwa kuti Ambuya ndiwu anguŵatuma, anguŵazomereza kuti ato abulu aluti nawu kwaku Yesu. Akusambira aku Yesu angutandika malaya ngawu ngakubwalu pamsana pabulu mura ndi kamwana kaki, kweni Yesu wangukwera pakabulu kamana.

Pa nyengu yo Yesu wenga pafupi kufika ku Yerusalemu, ŵanthu anandi angwamba kuza. Anandi atandikanga malaya ngawu mumsewu. Penipo anyaki aphajuwanga mphanda za vimiti pamwenga “vivwati mudondu” ndipu atandikanga pasi. Yiwu adanirizanga kuti: “Mutaskeni chondi! Wakutumbikika ndiyu yo watuza mu zina laku Yehova! Ngwakutumbikika Ufumu wo utuza wa awusefwi a Davidi!” (Mariko 11:8-10) Afarisi wo ŵenga pagulu lenili anguguŵa ukongwa ndi vo ŵanthu yaŵa akambanga. Ndipu angukambiya Yesu kuti: “Msambizi, akanizeni akusambira ŵinu.” Yesu wangumuka kuti: “Nditikukambiyani kuti, asani yaŵa angaja cheti, mya yidanirizengi.”—Luka 19:39, 40.

Yesu wati wawona tawuni ya Yerusalemu, wangwamba kuliya ndipu wangukamba kuti: “Yiwi ukaziŵengi msanawale vinthu vakukwaskana ndi chimangu . . . kweni vabisika kwaku yiwi kuti uleki kuviwona.” Ŵanthu wo ajanga mu Yerusalemu alindizganga kuzibayika chifukwa alekiyanga dala kuvwiya. Pavuli paki, Yesu wangukamba uchimi wakuti: “Arwani ŵaku azakukuzingilizga ndi mpanda wakukho wa vinthu vakusongoka ndipu azakukuzunguliya ndi kukuyukiya kutuliya kuvigaŵa vosi. Yiwu azakukuwisiya pasi pamoza ndi ŵana ŵaku wo ŵe mwaku yiwi, ndipu azamulekapu cha paku yiwi mwa pachanya pa mwa unyaki.” (Luka 19:42-44) Vo Yesu wangukamba vinguchitika nadi, chifukwa Yerusalemu wangubwangandulika mu 70 C.E.

Yesu wati wasere mu Yerusalemu, “tawuni yosi yinguyaŵayika ndipu ŵanthu atingi: ‘Ndiyani mwenuyu?’” Ndipu gulu la ŵanthu lingulutirizga kukamba kuti: “Uyu ndi mchimi Yesu wa ku Nazareti, ku Galileya!” (Mateyu 21:10, 11) Ŵanthu wo ŵenga pa gulu lenili, wo anguwona Yesu wachiyuska Lazaro, akambiyanga anyawu vakukwaskana ndi chakuziziswa chenichi. Yapa, Afarisi anguziŵiya limu kuti palivi cho angachita, mwakuti akambiskananga kuti: “Charu chosi chilondo iyu.”—Yohane 12:18, 19.

Nge mo wachitiyanga nyengu zosi asani waluta ku Yerusalemu, Yesu wanguluta kunyumba yakusopiyamu kuti wakasambizi ŵanthu. Kwenuku, wanguchizga ŵanthu achibulumutiya kweniso akupunduka. Ŵara ŵa asembi ndipuso alembi angukwiya ukongwa ŵati awona vakuziziswa vo Yesu wanguchita kweniso ŵati ŵavwa anyamata achidaniriza munyumba yakusopiyamu kuti: “Mutaskeni chondi, Mwana waku Davidi!” Alongozgi achisopa angufumba Yesu kuti: “Kumbi utuvwa vo yaŵa akamba?” Iyu wanguŵamuka kuti: “Kumbi mukuŵerenga cha venivi kuti, ‘Mumulomu mwa ŵana mutuwengi mazu ngakuthamika’?”—Mateyu 21:15, 16.

Yesu wangulereska vinthu vo vachitikanga munyumba yakusopiyamu. Kweni chifukwa chakuti nyengu yingumala, iyu ndi akusambira ŵaki angutuwaku. Zuŵa la Nisani 10 lechendakwani, iyu wanguwere ku Betaniya, ndipu wangugona kweniko pa Sabata.