Pa nyengu iyi, Yesu wenga weche kunyumba ya Mfarisi wati wachizga munthu yo watamanga matenda ngakutupama. Yesu wanguwona kuti ŵanthu anyaki wo angudanika pa chakurya chenichi ayanjanga kuja malu ngapachanya ukongwa. Mwaviyo, wangusaniriyapu mwaŵi kuti waŵasambizi kukhumbika kwakuja akujiyuyuwa.

Yesu wangukamba kuti: “Asani munthu wakudanani ku phwandu lanthengwa, mungajanga pamalu ngakuzirwa ukongwa cha. Chifukwa panyaki munthu munyaki wakuzirwa kuluska yiwi nayu so wadanika. Pavuli paki, yo wakudanani mosi wangaza ndi kukamba kuti, ‘Yaŵa ndiwu aje po mwaja.’ Asani vaŵa viyo muchitengi soni kuchija pamalu ngambula kuzirwa.”—Luka 14:8, 9.

Pavuli paki, Yesu wangulutirizga kukamba kuti: “Asani mwadanika, lutani ndi kuja pamalu ngambula kuzirwa, kuti asani munthu yo wakudanani waza, wazikukambiyeni kuti, ‘Ayimwi, kajeni pamalu ngakuzirwa pa.’ Asani vaŵa viyo mutumbikikengi pa masu pa ŵanthu wo mwadanikiya nawu limoza.” Munthu yo wachita venivi walongo kuti we ndi mijalidu yamampha kweniso walongo chinthu chinyaki chakukhumbika ukongwa. Yesu wangukamba kuti: “Chifukwa weyosi yo watijikuzga, wayuyulikengi ndipu weyosi yo watijiyuyuwa, wakwezekengi.” (Luka 14:10, 11) Mwaviyo, Yesu wachiskanga ŵanthu wo amuvwisiyanga kuti ajengi akujiyuyuwa.

Pavuli paki, Yesu wangukamba so fundu yinyaki kuti wasambizi Mfarisi yo wangumudana vakukwaskana ndi ŵanthu wo watenere kuŵadana, kuti wakondwesi nadi Chiuta. Iyu wangukamba kuti: “Asani mwanozga chakurya chamsana pamwenga chamazulu, mungadananga abwezi ŵinu cha, pamwenga aku ŵinu ndi avurwa ŵinu, pamwenga abali ŵinu kweniso anyinu akukhupuka. Chifukwa asani mwachita viyo, nawu so angazikudanani, ndipu vazamuja nge kuti atikuweziyani. Kweni asani mwanozga phwandu, danani akavu, akupunduka, vilima kweniso achibulumutiya. Ndipu mwazamukondwa chifukwa chakuti alivi chakuti akuweziyeni.”—Luka 14:12-14.

Kanandi ŵanthu adana mabwezi, achibali pamwenga ŵanthu wo aja nawu pafupi kuti aziryiyi limoza chakurya. Ndipu Yesu wangukamba kuti kuchita viyo nkhunanga cha. Kweni iyu wangukamba kuti kudana ŵanthu wo akhumbika chovyu nge akavu, vilima pamwenga achibulumutiya kungazisa vitumbiku vinandi. Yesu wangukambiya munthu yo wangumudana kuti: “Mwazamuwezeke mu nyengu ya chiyuka cha ŵanthu arunji.” Yumoza mwa ŵanthu wo angudanika wati wavwa venivi, wangukamba kuti: “Ngwakutumbikika munthu yo waturya mu Ufumu waku Chiuta.” (Luka 14:15) Munthu uyu wanguwona kuti ndi mwaŵi ukulu ukongwa kusere mu Ufumu waku Chiuta. Chinanga kuti iyu wanguchita viyo, ndi ŵanthu wosi cha wo angulongo kuwonga nge mo Yesu wangukonkhoske muntharika iyi:

“Munthu munyaki wangunozga chiphwandu ndi mazulu ndipu wangudana ŵanthu anandi. . . . Wangutuma kapolu waki kuti wakakambiyi ŵanthu akudanika kuti, ‘Zaningi, chifukwa vosi vanozgeka kali.’ Kweni wosi angwamba kupereka vifukwa vakukaniya. Wakwamba wangumukambiya kuti, ‘Ndikugula munda, sonu ndikhumba kuti ndiluti kuchiwuwona. Pepani ukongwa, ndifikengi cha.’ Munyaki wangukamba kuti, ‘Ndagula ng’ombi 10 zapagoli, sonu ndikhumba kuti ndiluti kuchiziyesa. Pepani ukongwa, ndifikengi cha.’ Ndipu munyaki wangukamba kuti, ‘Ndato ŵaka sonu munthukazi, mwaviyo ndizengi cha.’”—Luka 14:16-20.

Vifukwa vo ŵanthu ŵenaŵa angupereka venga vambula kuvwika. Munthu weyosi wechendaguli munda pamwenga viŵetu watamba dankha waviwona. Mwaviyo, pengavi chifukwa chakuti aluti so kuchiviwona pavuli pakuti agula kali. Munthu yo wazumbulika kachitatu wanozgekiyanga nthengwa cha chifukwa ndipu wato kali munthukazi. Mwaviyo, chifukwa cho nayu wangupereka chenga chambula kuvwika ndipu watingi wakengi ku phwandu lo wangudanika. Mweneku wa phwandu wati wawona kuti ŵanthu wosi akana wangukambiya kapolu waki kuti:

“Luta liŵi mumisewu yikuluyikulu ndi mutinthowa ta mutawuni, ukato akavu, vilima, achibulumutiya ndi akupunduka ndipu ukazi nawu kunu.” Kapolu mwenuyu wati wadana ŵanthu ŵenaŵa, munyumba mwenga mweche malu. Mwaviyo, mbuyaki wangumukambiya kuti: “Luta mumisewu ndi mutinthowa, kaŵachiski kuti ŵazi ndi chilatu chakuti nyumba yangu yizazi. Chifukwa nditikukambiyani kuti palivi yumoza wa ŵanthu wo  angudanika yo wazamuyesa chakurya changu chamazulu.”—Luka 14:21-24.

Ntharika yo Yesu wangukamba yingulongo kuti Yehova Chiuta ndi Yesu Khristu adana munthu weyosi kuti wazisere mu Ufumu wakuchanya. Ayuda, ukongwa alongozgi avisopa ndiwu ŵenga akwamba kudanika. Kweni anandi mwa ŵanthu ŵenaŵa angukana mwaŵi wenuwu pa nyengu yosi yo Yesu wachitanga uteŵeti waki pacharu chapasi. Mwaviyo, mwaŵi wenuwu unguperekeka ku ŵanthu anyaki. Vo Yesu wangukamba muntharika yaki, vingulongore limu kuti kunthazi Ayuda wo akandirizgikanga kweniso ŵanthu amitundu yinyaki wo angusere Chiyuda, ndiwu angudanika kuti akasere mu Ufumu wakuchanya. Pavuli paki, mwaŵi wachitatu kweniso wakumaliya unguperekeka ku ŵanthu wo Ayuda aŵawonanga kuti mbambula kwenere pamasu paku Chiuta.—Machitidu 10:28-48.

Mwaviyo, vo Yesu wangukamba vilongo nadi kuti mazu ngo munthu munyaki yo wangudanika ku phwandu wangukamba ngauneneska. Munthu uyu wanguti: “Ngwakutumbikika munthu yo waturya mu Ufumu waku Chiuta.”