Yesu wati watuwa ku Pereya, wangufika muchigaŵa cha Betaniya cho chenga pa mtunda wamakilomita ngatatu kutuliya kuvuma kwa Yerusalemu. Pa nyengu iyi, Mariya ndi Marita aliyanga nyifwa ya mzichi wawu Lazaro yo wangutayika pati pajumpha mazuŵa ngamanavi. Ŵanthu anandi anguza kunyumba kwawu kuti aziŵapembuzgi.

Pavuli paki, munthu munyaki wangukambiya Marita kuti Yesu watuza ndipu Marita wangutchimbiya kuti wakakumani nayu. Marita wangukambiya Yesu vo iyu ndi mvurwa waki Mariya aŵanaŵananga kwa mazuŵa nganayi. Iyu wanguti: “Ambuya, mukaŵengi kunu, mzichi wangu watingi wafwengi cha.” Chinanga kuti Marita wangukamba viyo, kweni vilongo kuti wengavi chivwanu cha. Ve viyo chifukwa iyu wangukamba kuti: “Ndiziŵa kuti chechosi cho mungapempha Chiuta, Chiuta wakupaskeningi.” (Yohane 11:21, 22) Iyu wanguziŵa kuti Yesu watingi wamuyuskengi mzichi waki.

Yesu wangukambiya Marita kuti: “Mzichi waku wayukengi.” Marita waŵanaŵananga kuti Yesu wakambanga za chiyuka cho chazamuchitika kunthazi pacharu chapasi, chilindizga cho Abrahamu kweninso ŵanthu anyaki ŵenga nachu. Marita wangulongo kuti wenga ndi chivwanu kuti venivi vazamuchitika nadi. Iyu wanguti: “Ndiziŵa kuti wazamuyuka pa chiyuka, pa zuŵa lakumaliya.”—Yohane 11:23, 24.

Kweni kumbi Yesu watingi wamuyuskengi nadi Lazaro pa nyengu yeniyi? Iyu wangukumbuska Marita kuti Chiuta wangumupaska nthazi zakuyuskiya ŵanthu akufwa. Yesu wanguti: “Yo wavwana mwaku ini chinanga wangafwa wazamuja so ndi umoyu. Ndipu weyosi yo we ndi umoyu kweniso wavwana mwaku ini, wazamufwapu cha.”—Yohane 11:25, 26.

Yapa, Yesu wang’anamuwanga kuti akusambira ŵaki alekengi kufwa cha. Ve viyo chifukwa nayu wangufwa nge po wangukambiya akutumika ŵaki. (Mateyu 16:21; 17:22, 23) M’malu mwaki, wang’anamuwanga kuti munthu wangazisaniya umoyu wamuyaya asani wavwana mwaku iyu. Ndipu ŵanthu anandi azamuja ndi umoyu wamuyaya asani aziyuskika. Chinanga kuti ve viyo, ŵanthu akugomezgeka wo alutirizgengi kuja ndi umoyu mpaka pakumaliya pa mugonezi wunu azamukufwa cha. Mwaviyo, weyosi yo wavwana mwaku Yesu wakhumbika kusimikiza kuti chinanga wangafwa, wazamulonde umoyu wamuyaya.

Kweni kumbi Yesu yo wangukamba kuti, “Ini ndini chiyuka ndi umoyu” wangumuyuska Lazaro yo wanguja mumasanu kwa mazuŵa? Yesu wangufumba Marita kuti: “Kumbi utivigomezga venivi?” Iyu wangumuka kuti: “Hinya Ambuya, ndigomezga kuti ndimwi Khristu, Mwana waku Chiuta, yo taja tichilindizga kuti watuza mucharu.” Chifukwa chakuti Marita wenga ndi chivwanu kuti Yesu watingi wayuskengi mzichi waki pa zuŵa lenili, wangutchimbiriya kunyumba ndipu wangukambiya mvurwa waki pakuyija kuti: “Msambizi waza ndipu watikudana.” (Yohane 11:25-28) Mariya wati wavwa venivi, wangusoka mwaliŵi ndipu ŵanthu anyaki wo aŵanaŵananga kuti waluta kumasanu ko anguŵika Lazaro angumulondo.

Mariya wati wafika ko kwenga Yesu wanguliya ndipu wanguwa pamaphazi ngaki. Pavuli paki, wangukamba so mazu ngo Marita wangukamba kuti: “Ambuya, mukaŵengi kunu, mzichi wangu watingi wafwengi cha.” Yesu wati wawona kuti Mariya waliya kweniso chigulu cha ŵanthu wo ŵenga penipo aliya, wangutamantha pamwenga kuti wangusuzgika mumtima, wangusuzgika maŵanaŵanu ndipu wanguliya. Ŵanthu ŵati awona venivi, anguziŵa kuti Yesu wamuyanjanga nadi Lazaro. Ndipu anyaki angukamba kuti: ‘Asani Yesu wangufiska kubanuwa masu nga munthu wachibulumutiya, kumbi wangulekiyanji kovya Lazaro kuti waleki kufwa?’—Yohane 11:32, 37.