Yesu ndi akusambira ŵaki ŵati atuwa ku Galileya, angumbuka Msinji wa Yorodani ndipu anguselere cha kumwera ndi kujumpha m’chigaŵa cha Pereya. Nyengu yinyaki po Yesu wenga ku Pereya, wangukambiya Afarisi mo Chiuta wawone kumalisa nthengwa. (Luka 16:18) Kweni pa nyengu iyi, Afarisi ŵenaŵa angwambisa so nkhani yeniyi kuti ayesi Yesu.

Mozesi wangulemba kuti munthulumi wangamalisa nthengwa asani muwolu waki we “ndi suzgu linyaki.” (Marangu 24:1) Mwaviyo, ŵanthu ŵenga ndi maŵanaŵanu ngakupambanapambana pa vifukwa vo munthu wangamalisiya nthengwa. Ŵanthu anyaki aŵanaŵananga kuti vifukwa vimanavimana vingachitiska kuti munthu wamalisi nthengwa. Chifukwa cha venivi, Afarisi angufumba Yesu kuti: “Kumbi marangu ngazomereza kuti munthulumi wapati muwolu waki pa chifukwa chechosi?”—Mateyu 19:3.

M’malu mwakukonkhoska vo ŵanthu aŵanaŵananga, Yesu wanguŵakambiya vo Chiuta wanguchita wachiyambisa nthengwa. Iyu wanguŵakambiya kuti: “Kumbi mukuŵerenga cha kuti yo wanguŵalenga pakwamba, wangulenga munthulumi ndi munthukazi, ndipu wangukamba kuti: ‘Pa chifukwa chenichi munthu wazamuleka awisi ndi anyina ndipu wazakujibatika ku muwolu waki, ndipu wosi ŵaŵi azamuja liŵavu limoza’? Yiwu mbaŵi so cha, kweni liŵavu limoza. Mwaviyo, cho Chiuta wamanga pamoza, munthu wangapatuwanga cha.” (Mateyu 19:4-6) Pa nyengu yo Chiuta wangwambisa nthengwa yaku Adamu ndi Eva, wanguŵakambiyapu cha kuti azimalisi nthengwa yawu.

Afarisi akhumbanga kususkana ndi Yesu. Mwaviyo, angumufumba kuti: “Nanga ntchifukwa wuli Mozesi wangulamula kupereka kalata yachipata ndi kumupata?” (Mateyu 19:7) Yesu wanguŵamuka kuti: “Mozesi wangukuzomerezani kupata awolu ŵinu chifukwa cha kunonopa kwa mitima yinu, kweni ndimu venge cha pakwamba.” (Mateyu 19:8) Mazu ngakuti “pakwamba” ngo Yesu wangukamba, ngang’anamuwanga nyengu yaku Mozesi cha, kweni nyengu yo Chiuta wangwambisa nthengwa mu munda wa Edeni.

Yesu wangukamba fundu yakukhumbika ukongwa yakuti: “Nditikukambiyani kuti munthu weyosi yo wapata muwolu waki kwambula kuti wachita malusu ngaheni ngakugonana [por·neiʹa mu Chigiriki], ndipu wato munthukazi munyaki, wachita chigololu.” (Mateyu 19:9) Mwaviyo, malusu ngaheni ngakugonana ndichu chifukwa chimoza pe cho chisanirika m’Malemba cho chingachitiska kuti munthu wamalisi nthengwa.

Venivi vinguchitiska akusambira aku Yesu kukamba kuti: “Asani ndimu viliri pakati pa munthu ndi muwolu waki, mbwenu mbumampha kuleka kuto.” (Mateyu 19:10) Yapa, vilongole limu kuti asani munthu wakhumba kuto pamwenga kuyirwa wakhumbika kuziŵa kuti nthengwa nja umoyu wosi.

Pakukamba vakukwaskana ndi ŵanthu ambula kuto ndi kuyirwa, Yesu wangukamba kuti ŵanthu anyaki akuwa viyo, ndipu aŵavi khumbu lakugonana. Anyaki angato cha chifukwa akutheneka. Penipo anyaki atijiko kuti aleki kuto pamwenga kuyirwa chifukwa akhumba kuŵika maŵanaŵanu ngawu ngosi pa Ufumu wakuchanya. Pavuli paki, Yesu wangukambiya ŵanthu wo amuvwisiyanga kuti: “Yo wangafiska kuja wambula kuto [pamwenga kuyirwa], waje.”—Mateyu 19:12.

Pavuli paki, ŵanthu angwamba kuza ndi ŵana anamana kwaku Yesu, kweni akusambira ŵaki aŵakanizanga. Yiwu atenere kuti anguchita ivi chifukwa akhumbanga cha kuti ŵana wo asuzgengi Yesu. Kweni Yesu wati wawona vo akusambira ŵaki achitanga, wangukwiya ndipu wanguŵakambiya kuti: “Alekeni ŵana azi kwaku ini, mungaŵakanizanga cha, chifukwa Ufumu waku Chiuta ngwa ŵanthu ange ŵana ŵenaŵa. Nditikuneneskiyani kuti weyosi yo watondeka kulonde Ufumu waku Chiuta nge mwanamana, wazamuserepu cha mu Ufumu wo.”—Mariko 10:14, 15; Luka 18:15.

Lenili ndi sambiru lamampha ukongwa! Kuti tizilonde vitumbiku vo Ufumu waku Chiuta uzisengi, tikhumbika kuja ŵanthu akujiyuyuwa kweniso akukhumbisiska kusambira vinthu nge po ŵana anamana achitiya. Pavuli paki, Yesu wangulongo kuti watanja ŵana anamana ndipu wanguŵanyamuwa ndi kuŵatumbika. Iyu watanja so ŵanthu wosi wo ‘alonde Ufumu waku Chiuta nge mwanamana.’—Luka 18:17.