Pati pajumpha mazuŵa ngatatu kutuliya po Natanayeli wangujaliya yumoza wa akusambira aku Yesu akwamba, Yesu ndi akusambira ŵaki anyaki anguselere chakunkhondi, ku boma la Galileya, ko kwenga kwawu. Yiwu akanga mutawuni ya Kana, kwawu kwaku Natanayeli. Tawuni ya Kana yenga muchigaŵa cha mapiri kunkhondi kwa tawuni ya Nazareti, ko Yesu wangukuliya. Yiwu anguluta ku Kana chifukwa angudanika ku zowala.

Mariya yo wenga anyina aku Yesu, nayu wanguluta ku zowala zenizi. Viwoneka kuti Mariya waziŵananga ndi wo akwatisanga. Ndipu watenere kuti wanguŵawovya kulondere alendu ndipuso kuŵaphwere. Ndichu chifukwa chaki wanguziŵa liŵi kuti vinthu vinyaki vamala, ndipu wangukambiya Yesu kuti; “Vinyu waŵamaliya.”—Yohane 2:3.

Pakukamba mazu yanga, Mariya wakhumbanga kuti Yesu wachitepu kanthu. Pakumuka, Yesu wangugwiriskiya ntchitu ntharika kulongo kuti wakana. Iyu wanguti: “Ama, ini ndi yimwi vititikwaska wuli?” (Yohane 2:4) Nge Fumu yakusankhika ndi Chiuta, chilatu chaku Yesu chenga kuchita vo abali ŵaki ndi mabwezi ngaki amukambiyanga cha, kweni vo Awisi akuchanya angumukambiya. Mariya wangusiya nkhani iyi m’manja mwa mwana waki ndipu wangukambiya ŵanthu wo awovyanga pa zowala izi kuti: “Muchiti chechosi cho wangakukambiyani.”—Yohane 2:5.

Pamalu ngo, anguŵikapu misuku 6 yakupangika ndi mya. Ndipu msuku wewosi wakwananga malita 40 nga maji. Yesu wangukambiya ŵanthu wo awovyanga pa zowala izi kuti: “Zazani maji mumisuku.” Pavuli paki, iyu wangukamba kuti: “Tonimu, mukapaski wakuwonere phwandu.”—Yohane 2:7, 8.

Wakuwonere phwandu wangukondwa ukongwa wati walaŵa vinyu chifukwa wenga wakunowa ukongwa, kweni wanguziŵa cha kuti vinyu yo wangupangika mwakuziziswa. Mwaviyo, iyu wangudana munthulumi mweneku wa nthengwa ndipu wangumukambiya kuti: “Munthu weyosi watuzga dankha vinyu wamampha, asani ŵanthu aloŵe, ndipu watuzga vinyu wawuliwuli. Kweni yiwi upereka vinyu wamampha mpaka sonu.”—Yohane 2:10.

Ichi chenga chakuziziswa chakwamba cho Yesu wanguchita. Akusambira ŵaki ŵati awona venivi, angwamba kumugomezga ukongwa. Pavuli paki, Yesu, anyina ndipuso avurwa ŵaki angusoka ndi kuluta ku Kaperenao, tawuni yo yenga chakunkhondi kwa Nyanja ya Galileya.