Pa nyengu yo Yesu wenga ku Yerusalemu pa phwandu la Pasika mu chaka cha 30 C.E., wanguchita vinthu vakuziziswa. Ndipu venivi vinguchitiska kuti ŵanthu anandi ayambi kumugomezga. Mwakuyeruzgiyapu, munthu munyaki zina laki Nikodimu yo wenga Mfarisi kweniso wakuyeruzga mukhoti la Ayuda lo laziŵikanga kuti Mphara Yikulu ya Milandu, wangukondwa ndi vo Yesu wasambizanga. Iyu wakhumbanga kuziŵa vinandi, ndipu wanguluta kwaku Yesu ndi usiku. Panyaki wanguchita viyo chifukwa wawopanga kuti mbiri yaki yinganangika asani alongozgi anyaki Achiyuda amuwona.

Nikodimu wangukamba kuti: “Rabi, tiziŵa kuti ndimwi msambizi wakutuliya kwaku Chiuta, chifukwa palivi munthu yo wangachita visimikizu vo muchita kwambula kuti Chiuta wenayu.” Pakumuka, Yesu wangukambiya Nikodimu kuti palivi munthu yo wangasere mu Ufumu waku Chiuta kwambula kuti “wabalika so.”—Yohane 3:2, 3.

Nikodimu wakhumbanga kuziŵa kuti vingachitika wuli kuti munthu wabaliki so. Mwaviyo, wangufumba kuti: “Kumbi wangasere mumoyu mwa anyina kachiŵi ndi kubalika so?”—Yohane 3:4.

Kubalika so kung’anamuwa ivi cha. Yesu wangukonkhoska kuti: “Munthu wangasere cha mu Ufumu waku Chiuta kwambula kuti wabalika ndi maji kweniso mzimu.” (Yohane 3:5) Pa nyengu yo Yesu wabatizikanga, mzimu wakupaturika ungusikiya paku iyu. Mwaviyo, iyu wangubalika “ndi maji kweniso mzimu.” Pa nyengu iyi, kuchanya kunguvwika mazu ngakuti: “Uyu ndi Mwana wangu, mweniyo nditanja, yo watindikondwesa.” (Mateyu 3:16, 17) Chiuta wanguchita ivi kuti walongo kuti sonu Yesu wabalika so nge mwana waki wauzimu ndipu wamupaska chilindiza chakusere Ufumu wakuchanya. Pati pajumpha nyengu, pa Pentekositi wa mu 33 C.E., ŵanthu anyaki wo angubatizika angulonde mzimu wakupaturika. Mwaviyo, nawu angubalika so nge ŵana apade auzimu aku Chiuta.—Machitidu 2:1-4.

Nikodimu wanguvwisa cha vo Yesu wamusambizanga vakukwaskana ndi Ufumu. Mwaviyo, Yesu wangulutirizga kumukonkhoske vakukwaskana ndi udindu wapade wo wenga nawu nge Mwana waku Chiuta. Yesu wangukamba kuti: “Nge mo Mozesi wangusoske njoka muchipululu, ndimu so Mwana wa munthu wasoskekiyengi, kuti weyosi yo wavwana mwaku iyu waje ndi umoyu wamuyaya.”—Yohane 3:14, 15.

Nyengu yinyaki kuvuli, Ayisirayeli wo alumikanga ndi njoka za poyizoni akhumbikanga kulereska pa njoka ya mukuŵa kuti aje ndi umoyu. (Maŵerengedu 21:9) Mwakuyanana waka, ŵanthu wosi akhumbika kuvwana mwa Mwana waku Chiuta kuti afwatuliki ku ubudi ndi nyifwa ndi kuzisaniya umoyu wamuyaya. Pakukonkhoska vo Yehova wanguchita kuti wataski ŵanthu, Yesu wangukambiya Nikodimu kuti: “Pakuti Chiuta wakuchiyanja ukongwa charu, mwakuti wakupereka Mwana waki wapade, kuti weyosi wakuvwana mwaku iyu waleki kunangika, kweni waje ndi umoyu wamuyaya.” (Yohane 3:16) Pa nyengu yo Yesu wenga ku Yerusalemu, wangukamba mwakuvwika umampha kuti iyu ndi nthowa yo yazamuwovya ŵanthu kuti azitaskiki. Yapa, ndipu pajumpha myezi 6 kutuliya po wangwambiya uteŵeti waki.

Yesu wangukambiya Nikodimu kuti: “Chiuta wangutuma Mwana waki mucharu kuti waziyeruzgi charu cha.” Ivi ving’anamuwa kuti iyu wanguziya kuziyeruzga ŵanthu cha ndi kuŵasaniya kuti mbakunanga kuti alonde chilangu. Kweni nge mo wangukambiya, iyu wanguza “kuti charu chitaskiki kuporote mwaku iyu.”—Yohane 3:17.

Nikodimu wanguluta kwaku Yesu ndi usiku chifukwa cha mantha. Kweni vakuziziswa kuti Yesu wangumaliza kukambiskana nayu mwakukamba kuti: “Sonu chifukwa chakupereke cheruzgu ndi ichi: ukweru [wo wamiyanga vo Yesu wachitanga ndipuso vo wasambizanga] waza mucharu, kweni ŵanthu ayanja mdima mumalu mwa ukweru, chifukwa ntchitu zawu zenga ziheni. Pakuti munthu weyosi yo wachita vinthu viheni,  watinkha ukweru ndipu watuza cha ku ukweru, kuti ntchitu zaki zileki kuvumbulika. Kweni weyosi yo wachita cho ntchauneneska, watuza ko kwe ukweru, kuti ntchitu zaki ziwoneke kuti zichitika mwakukoliyana ndi Chiuta.”—Yohane 3:19-21.

Sonu venga kwaku Nikodimu yo wenga Mfarisi ndipuso msambizi wa Ayisirayeli, kuŵanaŵaniya umampha vo Yesu wangumukambiya vakukwaskana ndi udindu wo Yesu wenga nawu pakufiska khumbu laku Chiuta.